តាំង សារ៉ាក់៖ នៅ​កម្ពុជា ហេតុអ្វី​ព្រះ​សង្ឃ​ខ្មែរ​ក្រោម​ចេះ​តែ​ខុស!

មេដឹកនាំសហព័ន្ធខ្មែរក្រោម បានលើកឡើងថា ការរឹតត្បិត នៃការរស់រៀន និងសិក្សាធម៌វិន័យ របស់ព្រះពុទ្ធ ទើប​ធ្វើ​ឲ្យ​ព្រះសង្ឃ​ខ្មែរ​ក្រោម​មួយ​ចំនួន ចាកចេញមក រស់នៅទឹកដីខ្មែរកណ្តាល។ តែមេដឹកនាំរូបនោះ ឆ្ងល់ថា តើ​មាន​ខុស​ទាស់​ត្រង់​ណា គ្រាន់​តែ​សង្ឃ​ខ្មែរក្រោម រស់នៅទឹកដីខ្មែរកណ្តាល?
Loading...
  • ដោយ: ក. សោភណ្ឌ អត្ថបទ៖ ក.សោភ័ណ្ឌ ([email protected]) - យកការណ៍៖ ហេង វុទ្ធី - ភ្នំពេញថ្ងៃទី ០៩ធ្នូ ២០១៥
  • កែប្រែចុងក្រោយ: December 09, 2015
  • ប្រធានបទ: ខ្មែរក្រោម
  • អត្ថបទ: មានបញ្ហា?
  • មតិ-យោបល់

បញ្ហាចេះតែកើតមាន មិនចេះចប់ មិនចេះហើយ ទៅលើព្រះសង្ឃខ្មែក្រោម ដែលកំពុងរស់នៅលើទឹកដីខ្មែរ។ ហេតុអ្វីព្រះសង្ឃខ្មែរក្រោម រស់នៅកម្ពុជា ចេះតែមានបញ្ហារហូត? នេះបើតាមសង្កេត និងលើកជាចម្ងល់ឡើង របស់លោក តាំង សារ៉ាក់ ប្រធានសាខាសហព័ន្ធខ្មែរកម្ពុជាក្រោម។

ប្រសាសន៍របស់លោក សារ៉ាក់ បានធ្វើឡើង នៅក្នុងសន្និសីទសារព័ត៌មាន ជាមួយនឹងព្រះតេជគុណ គីម សីលា នៅវត្តស្ទឹងមានជ័យ ទាក់ទងនឹងសំនុំរឿង ការទិញកុដិលេខ១៧ ដោយមានលិខិតស្នាមត្រឹមត្រូវ ពី​សំណាក់ព្រះសង្ឃ គីម សីលា តែបែរជាព្រះអង្គ ដែលជាអ្នកទិញ មិនអាចទៅរស់នៅបាន។

មេដឹកនាំសហព័ន្ធរូបនេះ បានថ្លែងឡើងមិនមែនសំដៅ លើតែមួយចំណុចរបស់ព្រះតេជគុណ គីម សិលា នោះ​ទេ ប៉ុន្តែលោកចង់មានប្រាសាសន៍ ទៅដល់រឿងរ៉ាវជាច្រើន ដែលព្រះសង្ឃខ្មែរក្រោម ត្រូវបាន​គេលាប​ពណ៍ជាបន្តបន្ទាប់។

លោកបានរំលឹករឿងរ៉ាវខ្លះមកវិញថា កាលពីពេលកន្លងទៅ អាជ្ញាធរធ្លាប់បានចោទ និងផ្សិកព្រះសង្ឃ​ខ្មែរ​ក្រោម​ពីរអង្គ​នៅវត្តអង្គតាម៉េញ ដោយចោទប្រកាន់ថា បានរកឃើញសម្លៀកបំពាក់មនុស្សស្រី នៅក្នុងកុដិ។ បន្ថែមពីលើរឿងនេះ នៅមានរឿងរ៉ាវ របស់សង្ឃខ្មែរក្រោម ជាច្រើនទៀត ដែលទទួលរងការលាបពណ៍ ឬបណ្តេញ​ចេញពីវត្តជាដើម។

រីឯករណីរបស់ព្រះសង្ឃ គីម សីលា ក៏ត្រូវបានលោក តាំង សារ៉ាក់ ចាត់ទុកថា ជាការចោទប្រកាន់ លាប​ពណ៌​ដូចគ្នា។ លោកបញ្ជាក់ថា ម្តងចោទថា ទ្រងទម្លាក់ពុទ្ធរូប ចូលក្នុងទឹកស្រះ នៅពេលរកមិនឃើញភស្តុតាង​ជាក់​ស្តែង ខាងមន្រ្តីសង្ឃ និងចៅស្តីទីក្នុងវត្ត បង្វែរការចោទប្រកាន់ ថាព្រះសង្ឃ គីម សិលា ទិញរបស់ក្នុងវត្ត ខុស​វិន័យសង្ឃ។

នៅក្រោយការធ្វើសន្និសីទកាសែត នៅរសៀលម្សិលម៉ិញ (ថ្ងៃទី០៨ ខែធ្នូ) រហូតមកដល់ ថ្ងៃទី០៩ ខែធ្នូនេះ កុដិ​លេខ១៧ ដែលព្រះសង្ឃ គីម សិលា បានជាវ នៅមិនទាន់អាចបើកសោរ បាននៅឡើយ។

សម្រាប់ព្រះតេជគុណ គីម សិលា វិញ បានមានសង្ឃដីកា ជាមួយទស្សនាវដ្ដីមនោរម្យ.អាំងហ្វូ តាម​ទូរស័ព្ទ​នៅ​ព្រឹកនេះថា ព្រះអង្គនៅតែព្យាយាម រកដំណោះស្រាយ ទោះជាមានការចោទប្រកាន់លោក មួយលើកជាពីរ​លើក​ក៏ដោយ។ សង្ឃអង្គនេះ បានបន្ថែមទៀតថា នៅពេលប្រជុំខាងគណម្មាការស្ដីទីនៅក្នុងវត្ត មិនបាន​លើក​ឡើង ពីបញ្ហាបោះចោលព្រះពុទ្ធរូបទៀតទេ និងថែមទាំងមិននិយាយ រឿងប្រគល់កុដិឲ្យលោកដែរ។

ព្រះអង្គមានសង្ឃដីកាថា៖ «ចង់្យអាត្មាបោះបង់ប្រាក់៥ម៉ឺនដុល្លារ និងកុដិមួយ ហើយខូចឈ្មោះអាត្មា អាត្មា​មិន​អាចមិនតវ៉ាបានទេ សូមអាជ្ញាធរទាំងផ្លូវពុទ្ធចក្រ និងអាណាចក្រ មេត្តាជួយដោះស្រាយអាត្មាផង ថាអាត្មា​ខុស​អី»។

បញ្ហខាងលើ នៅតែមិនអាចដោះស្រាយបាននៅឡើយ ចាប់តាំងពីថ្ងៃកើតមានរឿង ផ្អើលឆោឡោ (ថ្ងៃទី០៥ ខែធ្នូ) រហូតកមដល់ថ្ងៃទី០៩ ខែធ្នូនេះ។ ជាពិសេស ទស្សនាវដ្ដីមិនទាន់ទទួល បានការឆ្លើយតប ពីសំណាក់​ព្រះចៅអធិការ ​វត្តស្ទឹងមានជ័យ បាននៅឡើយ ដោយព្រះអង្គបដិសេធ មិនជួបជាមួយអ្នកសារព័ត៌មាន​ឡើយ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...