នៅក្នុងឆ្នាំ១៩៩៧ ព្រឹត្តិការណ៍សំខាន់ចំនួនពីរ ដែលបានធ្វើឲ្យប្រទេសកម្ពុជា ត្រូវវិលវល់ជាមួយនឹង​អំពើ​ហិង្សា សារជាថ្មីនោះ គឺការគប់គ្រាប់បែក ទៅលើក្រុមអ្នកតវ៉ា តាមបែបប្រជាធិបតេយ្យ នៅមុខរដ្ឋសភាចាស់ នៅថ្ងៃទី៣០ ខែមិនា និងការធ្វើរដ្ឋប្រហារ ពីសំណាក់កងកម្លាំង ដឹកនាំដោយនាយករដ្ឋមន្ត្រីទីពីរ លោក ហ៊ុន សែន ទម្លាក់នាយករដ្ឋមន្ត្រីទីមួយ ព្រះអង្គម្ចាស់ នរោត្ដម រណឫទ្ធិ ពីតំណែង នៅថ្ងៃទី៥-៦ ខែកក្កដា។ ប្រសិន​ជាមានអ្នកនៅចង់ចាំ ពីព្រឹត្តិការណ៍ គប់គ្រាប់បែក នៅមុខរដ្ឋសភាចាស់ ដែលធ្វើឲ្យមនុស្សស្លាប់ និងរបួស​ជា​ច្រើននោះ ប៉ុន្តែហេតុការណ៍ដែលទាក់ទងនឹងចេតិយ នៃការរំលឹកវិញ្ញាណក្ខន្ធ របស់ក្រុមបាតុករ ដែលបាន​ស្លាប់​នៅពេលនោះ មិនសូវជាមាននរណាបានដឹងទេ។

ដើម្បីរំលឹកព្រឹត្តិការណ៍នេះ មកវិញ លោក យឹម សុវណ្ណ អ្នកតំណាងរាស្ត្រ និងជាអ្នកនាំពាក្យរបស់​គណបក្ស​សង្គ្រោះ​ជាតិ បានយករូបថតមួយចំនួន មកចុះផ្សាយនៅលើទំព័រហ្វេសប៊ុករបស់លោក ដោយមានសរសេរ​ពន្យល់​ផងថា៖ «ចេតិយដែលបងប្អូនជនរួមជាតិ បានឃើញនេះ លោកប្រធាន សម រង្សុី និងសហការី​របស់​លោក បានកសាងឡើង ដើម្បីរំលឹកវិញ្ញាណក្ខន្ធ វីរបាតុករអហិង្សា ដែលបានពលីជីវិត ពេលចូលរួមធ្វើ​បាតុកម្ម​ទាមទារ ឲ្យមានការកែទំរង់ប្រព័ន្ធយុតិ្តធម៌ នៅកម្ពុជា កាលពីថ្ងៃទី៣០ ខែមិនា ឆ្នាំ១៩៩៧»។

«ចេតិយនេះត្រូវបាន អ្នកមានអំណាច យកទៅបោះចោល នៅក្នុងទន្លេចតុមុខ។ លោកប្រធាន សម រង្សីុ និង​សហការីរបស់លោក បានតស៊ូស្រង់យកចេតិយ ដ៏កំសត់នេះ ចេញពីទន្លេចតុមុខ ហើយយកទៅដំកល់ នៅ​កន្លែង ដែលវីរបាតុករបានបាត់បង់ជីវិត នៅមុខមន្ទីររដ្ឋសភាចាស់។»

អ្នកនាំពាក្យឲ្យគណបក្សសង្គ្រោះជាតិ បានសរសេរបន្តថា៖ «បន្ទាប់ពីមានការតស៊ូដ៏ស្វិតស្វាញ និងមិន​រាថយ របស់លោកប្រធាន សម រង្សីុ លោកអនុប្រធាន គង់ គាំ និងអតីតថ្នាក់ដឹកនាំ និងសកម្មជនគណបក្ស​ជាតិ​ខែ្មរ និង ក្រោយពីមានការសំរបសំរួល ជាមួយអាជ្ញាធររាជធានីភ្នំពេញ ឆ្នាំ១៩៩៧ ចេតិយថ្មី ដែលយើង​មើល​ឃើញ នាពេលបច្ចុប្បន្ន នៅមុខមន្ទីររដ្ឋសភាចាស់ ត្រូវបានសាងសង់ឡើងជាផ្លូវការ សំរាប់កូនខែ្មរ​ជំនាន់​ក្រោយ​ចង​ចាំ នូវវីរភាពដ៏អង់អាចក្លាហាន របស់បងប្អូនវីរបាតុករ ក្នុងការតស៊ូដើម្បី លទិ្ធប្រជាធិបតេយ្យ សេរីភាព និង​យុតិ្តធម៌ នៅក្នុងប្រទេសកម្ពុជា។»

សូមបញ្ជាក់ជូនដែរថា ជនដៃដល់ ដែលបានប្រព្រឹត្តិទង្វើគប់គ្រាប់បែក វាយប្រហារហ្វូងបាតុករនោះ នៅមិន​ត្រូវ​បានចាប់ខ្លួន យកមកផ្ដន្ទាទោសនៅឡើយ។ ក្រសួងមហាផ្ទៃកម្ពុជា ធ្លាប់បានគូរព្រាងរូបថតជនសង្ស័យ ដើម្បី​តាមចាប់ខ្លួន តែមិនមានលទ្ធផលអ្វីឡើយ។ នៅចំពោះការទាមទារ ពីសំណាក់ក្រុមគណបក្សប្រឆាំង និង​ពី​សំណាក់អង្គការសមាគម ដែលធ្វើការក្នុងវិស័យសិទ្ធិមនុស្ស ក្រសួងមហាផ្ទៃធ្លាប់បានប្រកាសថា មិន​បាន​បិទ ឬផ្អិបសំនុំរឿងនេះទុកចោលទេ តែនៅកំពុងស្រាវជ្រាវ និងមានដំណើរការទៅមុខនៅឡើយ៕