ទស្សនាវដ្ដីអង់គ្លេស «ឌឺថែម (The Times)» បានបង្ហើបរឿងនេះ ពីអ្នកនាំពាក្យម្នាក់ នៃក្រុមអ្នករៀបចំ ការប្រគុំដន្ត្រី នៅ​ទីនោះ។ មូលហេតុដែលគេអាចដឹង នៅពេលនេះ ដោយមកពីលក្ខខ័ណ្ឌឧត្តុនិយមមិនអំណោយផល នឹងឲ្យអ្នកចម្រៀង​ណាក៏ដោយ អាចច្រៀងដោយផ្ទាល់បាន។

នាងប៊ីយ៉ុនស្សេ នៅលើវេទិកា ច្រៀងចម្រៀងភ្លេងជាតិ។ AP Photo/Pablo Martinez Monsivais

បើនិយាយទៅ អ្នកចម្រៀងប៊ីយ៉ុនស្សេ (Beyoncé) បន្លំយើង ពិតជាបានល្អមែន! ក្នុងខណៈដែលពិភពលោក បានសម្លឹង​មើល​នាង​ច្រៀងភ្លេងជាតិ កាលពីថ្ងៃច័ន្ទទី២១មករា ក្នុងពិធីសម្បថឡើងកាន់តំណែង ជាប្រធានាធិបតី​សហរដ្ឋ​អាមេរិក ជា​មួយនឹងការកោតស្ងប់ស្ងែងនោះ ទស្សនាវដ្ដី«ឌឺថែម»ឯណេះ បានមកបំបែកក្ដីស្រមៃរបស់យើង​ ដោយបានបង្ហើបថា នាងប៊ីយ៉ុនស្សេ បានច្រៀងចម្រៀងភ្លេងជាតិនេះ ជាមួយនឹងចម្រៀងមួយ ដែលបាន«ថតទុកជាមុន»។

ទស្សនាវដ្ដីបានលើកយក សម្ដីរបស់អ្នកនាំពាក្យម្នាក់ នៃការរៀបចំប្រគុំដន្ត្រីប្រចាំពិធីធ្វើសម្បថ មកអះអាងថា «ថត​ចម្រៀងនេះ នៅក្នុងស្ទូឌីយ៉ូ ទុកបង្កា ជារឿងមួយធម្មតាទេ សម្រាប់កម្មវិធីធំៗបែបនេះ។ ហើយនាងប៊ីយ៉ុនស្សេ បាន​សម្រេចចិត្តបែបនេះ នៅមុនការសម្ដែងហ្នឹងបន្តិច ថានឹងធ្វើយ៉ាងដូច្នេះ ជាជាងការច្រៀងដោយផ្ទាល់ ដែលនឹងអាច មានបញ្ហានៅលើវេទិការ។»

ជាពិសេស នៅពេលច្រៀង គេសង្កេតឃើញ នាងប៊ីយ៉ុនស្សេបានដោះកាសស្ដាប់ត្រជៀកចេញ (កាស - សម្រាប់ធ្វើ​សម្លេងអោយលឺមកវិញ) មើលទៅដូចជា«នាងមិនចាំបាច់ត្រូវការ» របស់នេះទៀតទេ។ តែដឹងអី ... បើគ្រាន់តែធ្វើ​មាត់​ម្ហបៗ តាមចម្រៀងដែលថតទុកនោះ។

មិនមែនជាលើកទីមួយ ដែលរឿងបែបនេះកើតមានឡើង ក្នុងពិធីធំៗយ៉ាងពិសេសៗ ដូចពិធីសម្បថចូលកាន់តំណែង ជាប្រធានាធិបតីនេះជាដើម។  កាលពីឆ្នាំ១៩៩១ ខណៈកំពុងផុងជាប់ក្នុងសង្គ្រាមនៅឈូងសមុទ្រពែករ្ស៍ អ្នកចម្រៀង​វីតស្នី ហូស្តុន (Whitney Houston) បានសន្ដំអារម្មណ៍ ក្នុងពិធីប្រកួតបញ្ចប់កីឡាបាល់អោប ជាមួយនឹងចម្រៀង ដែល​បានថតទុកដូចគ្នា៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី២២ ខែមករា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ