ពីក្នុងចំណោមវីដេអូជាច្រើន ដែលត្រូវបានដាក់បង្ហោះ នៅលើគេហទំព័រចែកផ្សាយវីដេអូ ដូចយ៉ាង យូធូប (Youtube) វីម៉េអូ (Vimeo) ដេលីម៉ូឆិន (Dailymotion) ... ក្រុមអនាមិក ឬហៅតាមភាសាអង់គ្លេស «Anonymous» បានគ្រោងបើកការវាយលុកមួយ ដ៏សម្បើមដៃ ប្រឆាំងនឹងក្រុមរដ្ឋអ៊ីស្លាម (ពាក្យអារ៉ាប់ហៅ Daech ពាក្យកាត់បារាំងហៅ EI ពាក្យកាត់អង់គ្លេសហៅ ISIS)។ ប្រតិកម្មរបស់ក្រុមអនាមិក បានកើត​ឡើង​ភ្លាមៗ ដើម្បីជាការឆ្លើយតប យ៉ាងចាស់ដៃ ទៅនឹងការវាយប្រហារភេរវកម្ម បង្កឡើងដោយក្រុមរដ្ឋអ៊ីស្លាម កណ្ដាល​រដ្ឋធានីប៉ារីស កាលពីយប់ថ្ងៃសុក្រសប្ដាហ៍មុន។

នៅចំពោះហេតុការណ៍ ដែលមានស្លាប់មនុស្ស មិនតិចជាង១២៩នាក់ និងរបួសប្រមាណជា ៣៥២នាក់នោះ ក្រុម​អនាមិកខាងព័ត៌មានវិទ្យា បានសន្យាថា នឹងស្វែងរកអ្នកទទួលខុសត្រូវ នៃការវាយប្រហារ ជាមួយ​នឹង​សកម្មភាព នៃសមាជិករបស់ខ្លួន ដែលមាននៅជុំវិញផែនដី។ នៅក្នុងវីដេអូមួយ ដែលនិយាយជា​ភាសា​បារាំង បានឲ្យដឹងថា៖ «វានឹងក្លាយជាប្រតិបត្តិការមួយ ដែលមានទំហំដ៏សម្បើម ជាងពេលណាៗ​ទាំង​អស់ និង​មិន​ដែលមាន ពីមុនមក»។

ក្រុមអនាមិក បានព្រមានបន្តថា៖ «ភេរវកម្មនេះ នឹងមិនអាចស្ថិតនៅ ដោយគ្មានទោសពៃនោះឡើយ។ ដូច្នេះ​ហើយ សមាជិកអានាមិកមកពីគ្រប់ជ្រុងជ្រោយ នៃពិភពលោកទាំងមូល នឹងដេញតាមចាប់ពួកអ្នកឯង។ ពិត​ហើយ! ក្រុមអ្នកឯងជាសត្វជន្លេន ដែលបានសម្លាប់មនុស្សស្លូតត្រង់ ជាច្រើននាក់ ហើយយើងនឹងដេញ តាម​ចាប់​ពួក​អ្នកឯង ឲ្យចេញពីរន្ធ ដូចយើងធ្លាប់បានធ្វើ កាលពីភេរវកម្ម ទៅលើទស្សនាវដ្ដី"Charlie Hebdo"។»

កាលពីខែមិនាកន្លងទៅ ដើម្បីតបនឹងភេរវកម្ម ប្រឆាំងទស្សនាវដ្ដី «Charlie Hebdo» ក្រុមអនាមិកបានផ្សាយ នូវបញ្ជីឈ្មោះគណនី នៅលើបណ្ដាញសង្គមទ្វីសធើរ (Twitter) ចំនួន ៩២០០ គណនី ដែលមាន​ជាប់​ពាក់​ព័ន្ធ នឹងក្រុមរដ្ឋអ៊ីស្លាម។ មួយភាគធំនៃគណនីទាំងនេះ ត្រូវបានបង្កើតឡើង ជាគណនីខ្មោច ដើម្បីពង្រីក​ឥទ្ធិពល របស់​ក្រុមអ៊ីស្លាមនិយមជ្រុល និងដើម្បីស្វែងរកយុទ្ធជនថ្មីៗ ឲ្យមករួមស្ម័គ្រប្រយុទ្ធ ជាមួយ​ក្រុម​រដ្ឋ​អ៊ីស្លាម ហើយ​ត្រូវ​បាន​លប់ចោល ដោយក្រុមហ៊ុន ទ្វីសធើរ។

នៅក្នុងវីដេអូ របស់ក្រុមអនាមិក បានឲ្យដឹងបន្ថែមថា៖ «សូមពួកអ្នកឯងរង់ចាំចុះ ពីមហាប្រតិកម្មដ៏សម្បើម របស់​ក្រុមអាមិក។ ពួកអ្នកឯងត្រូវដឹងថា យើងនឹងរកអ្នកឯងឲ្យឃើញ ហើយយើងនឹងមិនលះបង់អ្វី សូម្បី​បន្តិច​ឡើយ។ យើងនឹងធ្វើប្រតិបត្តិការ ដ៏ខ្លាំងក្លាមួយ មិនដែលមានពីមុន ប្រឆាំងពួកអ្នកឯង។ សូមរង់ចាំចុះ នូវ​ការ​វាយប្រហារ តាមប្រព័ន្ធបច្ចេកវិទ្យា។ សូមពួកអ្នកឯងត្រៀមខ្លួន ថាសង្គ្រាមបានចាប់ផ្ដើមហើយ។ ពួក​អ្នក​ឯង​ត្រូវដឹងថា៖ ពលរដ្ឋ​បារាំងរឹងមាំ ខ្លាំងជាងអ្វីៗទាំងអស់ ហើយនឹងងើបឈរឡើង ប្រឈម​នឹងភាព​ឃោឃៅ​យង់​ឃ្នង កាន់​តែ​ខ្លាំង​ជាង​មុន។»

ការប្រកាសសង្គ្រាម របស់ក្រុមអនាមិកក្នុងពិភពលោកនេះ មិនប្រាកដថា ត្រូវបានស្វាគមន៍ ដោយមនុស្ស​គ្រប់​គ្នាឡើយ ជាពិសេសនៅចំពោះមុខអាជ្ញាធរ។ អ្នកទទួលខុសត្រូវ នៃនគរបាល​បច្ចេកវិទ្យាបារាំង​មួយរូប បាន​និយាយថា ប្រតិបត្តិការរបស់ក្រុមអនាមិកនេះ អាចរំខានការងារស៊ើបអង្កេត របស់អាជ្ញាធរ ដោយ​ហេតុ​ថា គណនី​ទ្វីសធើរ ឬហ្វេសប៊ុក របស់អ្នកជាប់ពាក់ព័ន្ធ នឹងក្រុមរដ្ឋអ៊ីស្លាមទាំងនោះ អាចជាការបំភ្លឺ ដល់​ក្រុម​អ្នក​ស៊ើប​អង្កេត ដើម្បី​ស្វែងរកបណ្ដាញ របស់ក្រុមភេរវជនបាន។ តែផ្ទុយទៅវិញ បើ​គណនី​របស់​អ្នក​ទាំង​នោះ ត្រូវ​បាន​លប់​ចេញ នោះនឹងធ្វើឲ្យការស៊ើបអង្កេត របស់ក្រុមអាជ្ញាធរ ប្រែក្លាយដូចខ្វាក់ភ្នែក ឬ​ថ្លង់​​ស្ដាប់​អ្វី​លែង​បាន៕