ខ្មោចលង៖ «ខ្ញុំរាងចាល ឈប់ថតរូបតែម្នាក់ឯងទៀតហើយ»
- ដោយ: ឈូករ័ត្ន អត្ថបទ និងយកការណ៍៖ ឈូករ័ត្ន ([email protected]) - បារីស ថ្ងៃទី០៩ វិច្ឆិកា ២០១៥
- កែប្រែចុងក្រោយ: November 09, 2015
- ប្រធានបទ: ខ្មោចលង
- អត្ថបទ: មានបញ្ហា?
- មតិ-យោបល់
-
នេះហើយ គេហៅថា ការភ័យលោះព្រលឹង ព្រោះជឿងថា មាន«ខ្មោចលង»។ នាង ណាតាសា បូដេន (Natasha Boden) អាយុ២៦ឆ្នាំ បានរត់ចេញពីគេហដ្ឋានរបស់ខ្លួន ក្នុងក្រុង «Blackpool» ទាំងព្រលឹងនៅចុងសក់ និងបានបដិសេធ លែងត្រឡប់មកជាន់វិញ បន្ទាប់ពីនាងបានឃើញស្រមោលបុរសម្នាក់ មកឈរពីក្រោយខ្នងនាង នៅពេលដែលនាងថតរូបខ្លួនឯងតាមទូរស័ព្ទ។
ហេតុការណ៍នេះ បានកើតឡើងតាំងពីសប្ដាហ៍មុន ក្រោយពីបានឆ្នៃម៉ូដសក់ថ្មី នាង បូដេន ចង់ថតរូបខ្លួនឯងនេះ ដើម្បីចង់ដឹងថា តើមុខមាត់របស់នាង បានផ្លាស់ប្ដូរ និងស្អាតយ៉ាងដូចម្ដេច។ ប៉ុន្តែនៅពេលនាងសម្លឹងមើលរូបថត ដែលនាងថតរូបរួច នៅក្នុងបន្ទប់នោះ នាងភ័យដល់ថ្នាក់លោះព្រលឹង។ នាងបានថ្លែងប្រាប់សារព័ត៌មានអង់គ្លេស «The Sun» ថា៖ «ខ្ញុំព្រឺសម្បុរគីង្គក់ខ្ញាក នឹងរូបស្រមោលមុខមនុស្សប្រុសម្នាក់ ដែលឈរពួននៅពីក្រោយ ខាងស្ដាំដៃខ្ញុំ»។
សម្រាប់ស្ត្រី ដែលមានកូនស្រីមួយនាក់រូបនេះ វាពិតជាមានខ្មោចលង បានបង្ហាញខ្លួន នៅក្នុងរូបថតរបស់នាង។ នាង បានថ្លែងបន្តទៀតថា៖ «ខ្ញុំភ័យឡើងញ័រខ្លួន។ ពេលនោះ ខ្ញុំនៅក្នុងផ្ទះតែម្នាក់ឯង ហើយរឿងម្យ៉ាងដែលខ្ញុំគិតចេញមក មានតែរត់គេចភ្លាម ចេញពីទីនោះ។ ខ្ញុំបានចេញ ទៅស្នាក់នៅសណ្ឋាគារ អស់ប៉ុន្មានយប់។»
តាមពិតទៅ ការភ័យភិតរបស់នាង មិនមែនគ្មានហេតុផលនោះទេ។ នាងបានរៀបរាប់ថា កាលពី៦សប្ដាហ៍មុន មានព្លុកប៉ុន្មាននាក់ របស់ក្រុមហ៊ុនចាត់ចែងបុណ្យសពមួយ បានមកជួបនាងដល់ក្នុងផ្ទះ ហើយបានប្រាប់នាង ថាពួកគេមកកាន់ទីនេះ ដើម្បីយកសាកសពមួយចេញទៅ។ បើទោះពួកព្លុកទាំងនោះ បានកែសំដីវិញ ថាពួកគេបានច្រឡំជាន់អាគារ (ផ្ទះនៅលើក្រោមគ្នា) នោះក៏ដោយ តែដំណឹងនេះ បានធ្វើឲ្យនាង ណាតាសា បូដេន ផតពោះបាត់ព្រលឹង រួចជាស្រេចហើយ។
ក្រោយមក នាងចេះតែមានអារម្មណ៍ ជាបន្តបន្ទាប់ថា ផ្ទះរបស់នាងនេះ មានខ្មោចលង។ នាងនិយាយរៀបរាប់ទៀតថា៖ «អ្នកជិតខាងរបស់ខ្ញុំម្នាក់ ទើបនឹងស្លាប់។ ខ្ញុំមិនដឹងថា តើអ្នកជិតខាង ដែលស្លាប់នោះ មានជាប់ទាក់ទង នឹងស្រមោលបុរសម្នាក់ នៅក្នុងរូបថត ឬយ៉ាងណាទេ។ ប៉ុន្តែខ្ញុំរាងចាល ឈប់ថតរូបតែម្នាក់ឯងទៀតហើយ។»
នាង ណាតាសា ជាមួយស្វាមី និងកូនស្រីអាយុ២ឆ្នាំ ទើបនឹងរើមកនៅផ្ទះថ្មីនេះ កាលពីប៉ុន្មានខែមុនប៉ុណ្ណោះ ហើយនាងអះអាងថា នាងមិនដែលជឿ រឿងខ្មោចព្រាយបីសាចនោះឡើយ។ ប៉ុន្តែក្នុងពេលនេះ នាងនិងគ្រួសារទាំងមូល ត្រូវរកផ្ទះនៅ សារជាថ្មីទៀត។ អ្នកម្ដាយវ័យក្មេងរូបនេះ បានឲ្យដឹងថា ស្វាមីនាង លោក ម៉ាក (Mark) កំពុងរៀបចំឥវ៉ាន់ ចេញពីផ្ទះនោះឲ្យអស់ ខណៈខ្លួននាងញាក់សាច់ ស្បថឈប់ឈានជើង ទៅជាន់នៅទីនោះជារៀងរហូត។ នាងបានបង្ហើបឲ្យដឹងថា៖ «នៅពេលខ្ញុំរើមកដល់ផ្ទះនោះដំបូង ខ្ញុំក៏បានសង្កេតឃើញដែរ ថាក្ដាកម្រាលក្នុងផ្ទះ សង្កៀតគ្នាយ៉ាងរណ្ដំ ខណៈនៅក្នុងផ្ទះ មិនមាននរណាម្នាក់សោះ។ នៅពេលនោះ ខ្ញុំគិតថា ប្រហែលបណ្ដាលមកពី អាគារផ្ទះនោះចាស់ពេក ទើបក្ដាកម្រាលវារង្គើដូច្នេះ។ តែឥឡូវនេះ ខ្ញុំលែងគិតអញ្ចឹងទៀតហើយ។»៕
» នេះជារូបថតទាំងស្រុង របស់នាង ណាតាសា បូដេន ដោយមានបន្ថែមរង្វង់ ត្រង់ស្រមោលមុខមនុស្ស៖
