មេបញ្ជាការកងទ័ពអ៊ីស្ត្រាអែល លោកឧត្ដមសេនីយ៍ «Amikam Norkin» បានប្រកាសក្នុងសន្និសីទការសែត នាក្រុង «Herzliya» (ភាគកណ្ដាលប្រទេស) កាលពីថ្ងៃអង្គារថា យន្ដហោះប្រភេទ «F-35» ឈ្មោះ «Adir» ដែលមានន័យ​ហៅថា «អានុភាព» បានចេញធ្វើ​«ប្រតិបត្តិការ និងរួមចំណែក ក្នុងបេសកកកម្មវាយលុក»។ 

លោកមេទ័ពអ៊ីស្ត្រាអែល បានបន្តថា៖ «យើងបានបើកការវាយប្រហារ ដំបូងគេ នៅលើពិភពលោក ចេញពីយន្ដហោះប្រភេទ "F-35" មួយគ្រឿង។ (...) យើងបានវាយលុកពីរដង នៅក្នុងតំបន់មជ្ឈឹមបូព៌ា ដោយប្រើយន្ដហោះ "F-35" ហើយយើងជាប្រទេសដំបូងគេ ដែលបានប្រើយន្ដហោះប្រភេទនេះ។»។

លោកឧត្ដមសេនីយ៍ មិនបានបញ្ជាក់ឲ្យច្បាស់ថា តើការវាយប្រហារ ដោយប្រើយន្ដហោះសង្គ្រាមខាងលើ ត្រូវបានធ្វើឡើង នៅទីណា និងពេលណាទេ។

ក្នុងរយៈពេលប៉ុន្មានឆ្នាំចុងក្រោយ កងទ័ពអាកាសអ៊ីស្ត្រាអែល ធ្លាប់បានបញ្ចេញយន្ដហោះ (មិនមែន F-35) ឲ្យធ្វើការវាយប្រហារ ទៅលើគោលដៅសំខាន់ៗ ចំនួនជាង១០ ដែលស្ថិតក្នុងទឹកដី នៃប្រទេសជិតខាងរបស់ខ្លួន។ ក្នុងនោះ ដូចជាការវាយប្រហារ ទៅលើកងទ័ព​របស់របបប្រធានាធិបតី បាឆារ អាល់-អាសាធ (Bachar al-Assad) នៃប្រទេសស៊ីរី - ក្បួនដឹកជញ្ជូនអាវុធ របស់ក្រុម ហេស្បូឡា (Hezbollah) ក្នុងប្រទេសលីបង់ និងចុងក្រោយថ្មីៗនេះ គឺវាយប្រហារ ទៅលើទីតាំងសិកមួយចំនួន របស់ប្រទេសអៀរ៉ង់។

កាលពីចុងឆ្នាំ២០១៦ ប្រទេសអ៊ីស្ត្រាអែល ដែលល្បីថាមានកងទ័ព ពោរពេញដោយអានុភាពស្រាប់ បានទទួលយន្តហោះសង្គ្រាម «F-35» ដំបូងគេ ដើម្បីយកមកបំពាក់ ឲ្យកងទ័ពរបស់ខ្លួន កាន់តែមានប្រៀបជាងប្រទេសជាច្រើន នៅក្នុងតំបន់ ដែលសុទ្ធសឹងជាសត្រូវ របស់ខ្លួន។ មកដល់ថ្ងៃនេះ រដ្ឋអេប្រ៊ឺ (ឈ្មោះប្រទេសអ៊ីស្ត្រាអែល) មានយន្ដហោះដ៏ទំនើបខាងលើ ចំនួន៥០គ្រឿង ដែលផលិតដោយសហគ្រាសអាមេរិក ឈ្មោះ «Lockheed Martin» និងដែលត្រូវបាន ដាក់ឈ្មោះបន្ថែម ហៅថា «Adir» ឬ «អានុភាព»។

កាលពីខែធ្នូ ឆ្នាំទៅម៉ិញ ប្រទេសអ៊ីស្ត្រាអែលបានប្រកាសថា យន្ដហោះ «អានុភាព» របស់ផងខ្លួន អាចធ្វើប្រតិបត្តិការបាន តែនៅពេលនោះ អ៊ីស្ត្រាអែលនៅមិនទាន់អះអាងថា មានការវាយប្រហារ ដោយប្រើយន្ដហោះប្រភេទថ្មីនេះ នៅឡើយ។

កាលពីថ្ងៃទី១០ ខែឧសភា គោលដៅយោធារបស់ប្រទេសអៀរ៉ង់ ចំនួន១០កន្លែង នៅក្នុងប្រទេសស៊ីរី បានរងការវាយប្រហារយ៉ាងចាស់ដៃ ពីសំណាក់កងទ័ពអាកាសអ៊ីស្ត្រាអែល។ ប្រទេសនេះអះអាងថា ការវាយប្រហារខាងលើ ធ្វើឡើងដើម្បីឆ្លើយតប ទៅនឹងការបាញ់រ៉ុក្កែត ពីសំណាក់កងទ័ពអៀរ៉ង់ ចូលក្នុងទឹកដីដែលខ្លួនកាន់កាប់ នៃតំបន់ «Golan»។ ការវាយប្រហារ បានសម្លាប់​ទាហាន ស្និតរបបលោក បាឆារ អាល់អាសាធ ចំនួន២៧នាក់ ក្នុងនោះ១១នាក់ ជាទាហានអៀរ៉ង់៕