ឮសូរ ដូចជាមិនសូវស្រួលទេ សម្រាប់ប្ដីប្រពន្ធតារា ប្រេដ ភីត និងអេនជឺលីណា ជូលី ជាពិសេសមិន​ស្រួល​ទាល់​តែសោះ ចំពោះតារាស្រីដ៏ល្បីឈ្មោះនេះតែម្ដង។ តាមសារព័ត៌មាន និងទស្សនាវដ្ដីអាមេរិកជាច្រើន បាន​ឲ្យដឹងថា កំពូលតារាទាំងពីរ បានឈានជិតមកដល់ការបាក់បែកគ្នា ដ៏គួរឲ្យសោកស្ដាយមួយ។ ទស្សនាវដ្ដី​«Star» បាន​បញ្ជាក់ថា ប្រេដ ភីត ទំនងជាបានដាក់ឱសានវាទ ទៅឲ្យភរិយារបស់ខ្លួន នាង អេនជឺលីណា ដើម្បី​ឲ្យ​នាង​ព្យាបាលជំងឹរបស់នាង ដែលបានញាំញ៉ីតារាស្ត្រី តាំងពីច្រើនឆ្នាំមកហើយ។

ទស្សនាវដ្ដីបានពន្យល់ថា បញ្ហាសុខភាពរបស់តារា បានបង្កគ្រោះថ្នាក់ ដល់គ្រួសារទាំងមូល ហើយ ប្រេដ ភីត សាកល្បងនឹងនិយាយឲ្យ អេនជឺលីណា ដឹងពីភាពខ្វាយខ្វល់របស់លោក។ ប៉ុន្តែរឿងដែលពិបាកខ្លាំងនោះ គឺ​នាង អេនជឺលីណា ខ្លួននាង មិនចង់មើលព្យាបាលជំងឺរបស់ខ្លួន។

ប្រភពមួយដែលស្និត នឹងគូស្វាមីភរិយាតារា បានបង្ហើបប្រាប់ទស្សនាវដ្ដីថា ប្រេដ ភីត មិនមានជំរើសអ្វីផ្សេង ក្រៅតែពីដាក់ឱសានវាទ ទៅឲ្យភរិយារបស់ខ្លួន៖ នោះគឺតារាស្ត្រីត្រូវព្យាបាលខ្លួន ឬបើមិនអញ្ចឹង ប្រេត ភីត នឹងចាកចេញពីនាង ហើយយកកូនៗទៅជាមួយ។ ប្រភពនោះ បាននិយាយថា៖ «ប្រេដ ចង់ឲ្យ អេនជី ផ្ចង់​អារម្មណ៍​ទៅលើសុខភាពរបស់នាង និងគ្រួសារ នៅមុនអ្វីៗត្រូវហួសពេល។ ប្រេដ បាននិយាយ​ប្រាប់ អេនជី ថា លោកមិនចង់ឲ្យកូនៗទាំងអស់ ស្ថិតក្នុងស្ថានភាពដូចនេះ យូរតទៅទៀតឡើយ។ ហើយលោក​ក៏​មិន​អាច​ឈរ​នៅ​ស្ងៀម រង់ចាំមើលម្ដាយរបស់កូនៗលោក ស្លាប់ក្នុងថ្ងៃណាមួយនោះដែរ។»

ស្ថានភាពរបស់តារា អេនជឺលីណា ជូលី បានបង្កការខ្វាយខ្វល់ជាទូទៅ តាំងពីច្រើនឆ្នាំមកហើយ ជាពិសេស​ប្រព័ន្ធផ្សព្វផ្សាយជាច្រើន ក៏បានធ្វើសេចក្ដីរាយការណ៍ ជាញ៉យដង ពីបញ្ហានេះដែរ។ ស្ត្រីអ្នកថែរក្សាកូនៗ របស់​ប្ដីប្រពន្ធតារាមួយរូប បានទម្លាយប្រាប់សារព័ត៌មានមួយថា អេនជឺលីណា ជូលី បានរងគ្រោះនឹង​ជំងឺ​«បាយ​មិន​បាន» ហើយដោយសារជំងឺនេះ នាងបានចូលសម្រាកព្យាបាល នៅក្នុងមន្ទីរពេទ្យជាច្រើនថ្ងៃ កាល​ពី​ប៉ុន្មាន​ឆ្នាំ​មុន។

ប៉ុន្តែ នៅចំពោះឱសានវាទរបស់ ប្រេដ ភីត នាង អេនជឺលីណា ជូលី ហាក់នៅមិនទាន់​យកចិត្តទុកនៅឡើយ បើ​ទោះជាតារាបានស្រកទម្ងន់ មកនៅត្រឹមតែ ៣៧,៦គីឡូក្រាម​នោះក៏ដោយ។ ប្រភពខាងលើដដែល បានថ្លែង​ប្រាប់​​ទស្សនាវដ្ដី«Star» ទៀតថា៖ «ប្រេដ ស្រឡាញ់ភរិយារបស់ខ្លួន និងចង់ឲ្យនាង មានសុខភាពល្អ។ ប៉ុន្តែគឺ អេនជី ខ្លួន​​ឯង​នោះ​ទេ ដែលមិនចង់ថែខ្លួន។»៕