ថ្លែងក្នុងពិធីបិទសន្និបាត ស្តីពី ការប្រឡងប្រណាំង ទីក្រុងស្អាត រមណីយដ្ឋានស្អាត សេវាល្អ ឆ្នាំ២០១៤ នា​ថ្ងៃ​ទី២២ ខែកញ្ញា ឆ្នាំ២០១៥នេះ លោកនាយករដ្ឋមន្រ្តី បានប្រើពាក្យធ្ងន់ៗ សំដៅទៅលើប្រធាន​គណបក្ស​​សង្គ្រោះ​ជាតិ លោក សម រង្ស៊ី និងជម្រុញឲ្យមេដឹកនាំ គណបក្សប្រឆាំងនេះ ធ្វើការបកស្រាយ ឲ្យ​បាន​ច្បាស់​នូវ​ពាក្យ ប្រដូច​លោក (ហ៊ុន សែន) ទៅនឹងមេដឹកនាំផ្ដាច់ការ ការដាហ្វី របស់ប្រទេសលីប៊ី។

ការថ្លែងខ្លាំងៗជាសាធារណៈ របស់លោក ហ៊ុន សែន បានធ្វើឡើង បន្ទាប់ពីកាសែតបារាំងមួយឈ្មោះថា លីបេរ៉ាស្យុង (Libération) បានចុះផ្សាយកិច្ចសម្ភាស ដ៏លំអិតមួយ ជាមួយលោក សម រង្ស៊ី ដែល​មាន​​លើក​ឡើង នូវសម្ដី​មួយម៉ាត់ថា៖ «លោក ហ៊ុន សែន ភ័យខ្លាចនឹងការទទួលវាសនា ដូច​លោក កាដាហ្វី  (Hun Sen a la hantise de connaître le même sort que celui de Kadhafi)»។

លោក ហ៊ុន សែន បានថ្លែងបង្ខំឲ្យលោក សម រង្ស៊ី ធ្វើការបកស្រាយជាបន្ទាន់ នូវពាក្យប្រដូចខាងលើនោះ។ លោកថា បើមិនដូច្នេះទេ អ្វីដែលលោក សម រង្ស៊ី រំពឹងថាបាននោះ មុខជាមិនបានឡើយ ព្រោះ (សម រង្ស៊ី) មិន​មែនជាដៃគូសន្ទនា ដ៏ស្មោះត្រង់នោះឡើយ ហើយវប្បធម៌សន្ទានា ក៏នឹងត្រូវបញ្ចប់ ជាមួយរូបលោកដែរ។

មិនត្រឹមតែប៉ុណ្ណឹង លោកនាយករដ្ឋមន្រ្តី នៅឲ្យលោក សម រង្ស៊ី បកស្រាយលើពាក្យមួយ មុនលោកចូលសភា ដែលបានលើកឡើងថា ដើម្បីចាប់ចោរ ត្រូវចូលឲ្យកៀក នឹងមេចោរនោះ។ លោក ហ៊ុន សែន បានថ្លែងឡើងថា៖ «អ្នកឯង ត្រូវមានការបកស្រាយមួយសមស្រប ដើម្បីធានាកិត្តិយសខ្ញុំ និងក្រុមគ្រួសាររបស់ខ្ញុំ អត់មាននិយាយ​លេងសើចទេ។ អត់មានលេងសើចទេ ន័យយ៉ាងម៉េចដែលថា  “ដើម្បីចាប់ចោរបាន ទាល់តែចូលកៀក នឹង​មេ​ចោរ”។ ន័យនេះយ៉ាងម៉េច? និយាយឲ្យច្បាស់មក។ (...) ទាល់តែចូលសភា ទើបចាប់មេចោរបាន។ អញ្ចឹង​អ្នក​ឯង គ្មានភាពស្មោះត្រង់ណាមួយនោះទេ។ (...) គ្មានការបកស្រាយណាមួយទេ គឺអ្វីដែលអ្នកឯងចង់បាន គឺ “អត់”។ ម៉ោង​នេះហើយ គ្មានសល់អ្វី សន្លឹកបៀរ“អាត់”ណាមួយ ដើម្បីតថ្លៃនោះទេ គឺអស់ហើយ។»

ប្រតិកម្មនឹងការលើកឡើង របស់លោកនាយករដ្ឋមន្ត្រីខាងលើ មន្ត្រីជាន់ខ្ពស់មួយរូប នៃនាំគណបក្ស​សង្គ្រោះ​ជាតិ ដែលផ្ដល់កិច្ចសម្ភាស ដោយសុំមិនបញ្ចេញឈ្មោះ បានលើកឡើងថា លោក ហ៊ុន សែន ក៏ធ្លាប់ប្រើពាក្យ មេចោរ ឬកូនចោរ ទៅលើមេដឹកនាំគណបក្សសង្គ្រោះជាតិ និងសកម្មជនរបស់គណបក្សនេះដែរ។ មន្ត្រីរូបនេះ បានបន្តថា កាលនោះលោកនាយករដ្ឋមន្ត្រី ហ៊ុន សែន បានហៅ លោក សម រង្ស៊ី ជា«មេចោរ» និងមន្ត្រី​-សកម្ម​ជន ជា«កូនចោរ» នៅបន្ទាប់ពីលោក សម រង្ស៊ី និយាយថា «ឈប់ចាក់ក្រឡេករដ្ឋាភិបាលហើយ»​នោះ។ សំនួរ​សួរ​ទៅ​វិញថា តើមកទល់ពេលនេះ លោកនាយករដ្ឋមន្ត្រី បានធ្វើការបកស្រាយ ហើយឬនៅ?

» សូមអានអត្ថបទបន្ថែម ដោយចុចនៅលើទីនេះ។

សូមរំលឹកឡើងវិញថា ការលើកឡើង ទាក់ទងនឹងមេដឹកនាំផ្ដាច់ការ នៃប្រទេសលីប៊ី ជាចម្លើយដែលត្រូវលោក សម រង្សី ឆ្លើយទៅនឹងសំណួរ របស់អ្នកសារព័ត៌មានបារាំង ដែលសួរថា៖ «ជាមួយនឹងការផ្ដន្ទាទោស ទៅលើ​សកម្មជននយោបាយ មកពីបក្សប្រឆាំងទាំង១១នាក់ តើ"វប្បធម៌"សន្ទនានឹងត្រូវស្លាប់ឬ»? លោក សម រង្ស៊ី បាន​ឆ្លើយ (ដូចដែលទស្សនាវដ្ដីមនោរម្យ.អាំងហ្វូ សូមបកប្រែចម្លើយក្រៅផ្លូវការនេះ) ថា៖ «ទេ។ ដំណើរការនៃ​ការ​បោះឆ្នោត នៅបន្តរៀបចំ ជាមួយការចុះឈ្មោះនៃអ្នកបោះឆ្នោត និងការរៀបចំ បញ្ជីឈ្មោះបោះឆ្នោតថ្មីមួយ។ យើង​មានការអត់ធ្មត់ ព្រោះយើងជឿជាក់ ទៅលើអ្វីដែលកើតឡើង នៅពេលអនាគត។ (...) វប្បធម៌សន្ទនា មាន​រូបរាងនៅពេលនេះ ក៏ដើម្បីជាការធានា សម្រាប់ក្រុម ឬបក្សមួយទៀតដែរ។ ប្រសិនជាគណបក្សប្រឆាំង ឡើង​កាន់​អំណាចនោះ របបលោក ហ៊ុន សែន បារម្ភពីការប្រមាញ់ - ពីការកំចាត់ - ពីការរៀបចំនីតិវិធីច្បាប់ តាម​ចាប់​ចង ព្រោះរបបនេះ បានប្រព្រឹត្តិ នូវឧក្រិដ្ឋកម្មជាច្រើន។ លោក ហ៊ុន សែន ភ័យខ្លាចនឹងការទទួលវាសនា ដូច​លោក កាដាហ្វី។ លោកមិនចង់បាន ការសងសឹកនោះទេ។ លោកចង់ឲ្យកូនចៅជំនាន់ក្រោយ ទាំងសងខាង អាច​ធ្វើការជាមួយគ្នា។ យើងរៀបចំគម្រោង សម្រាប់ថ្ងៃអនាគត។ (...) គេត្រូវបង្កើត នូវការធានាដ៏ពិតប្រាកដ ដើម្បី​ឲ្យការផ្លាស់ប្ដូរ​អំណាច អាចធ្វើទៅបាន ដោយគ្មានអំពើហិង្សា។»។