ទោះជាមានការព្រមាន ថានឹងមានបាតុកម្ម​ប្រឆាំងវត្តមាន​លោកក៏ដោយ ក៏លោកនាយករដ្ឋមន្ត្រី ហ៊ុន សែន នៅ​តែអះអាងថា លោកនឹងទៅចូលរួម ក្នុងអង្គប្រជុំ នៃអង្គការសហប្រជាជាតិ ចាប់ផ្តើមពីថ្ងៃទី២៥ ដល់ថ្ងៃទី២៧ ខែ​កញ្ញា ឆ្នាំ២០១៥។ លោក ហ៊ុន សែន ថែមទាំងបានអះអាងទៀតថា «សន្ទរកថា»របស់លោក ដែលត្រូវ​ថ្លែងនៅ​ទី​នោះ នឹងលើកឡើង ពីការកំចាត់គ្រាប់មីន ដោយខុសពីគោលបំណងដើម របស់អង្គប្រជុំ ដែលលើកឡើង ពីការ​ត្រួតពិនិត្យ ការអភិវឌ្ឍន៍សហវត្សរ៍ និងគោលដៅអភិវឌ្ឍន៍ ដោយចិរភាព​ឆ្នាំ២០៣០។

នាពិធីបិទសន្និបាត ស្តីពី ការប្រឡងប្រណាំងទីក្រុងស្អាត រមណីយដ្ឋានស្អាត សេវាល្អ ឆ្នាំ២០១៤ កាលពី​រសៀល​ថ្ងៃទី២២ ខែកញ្ញានេះ លោកនាយករដ្ឋមន្រ្តីកម្ពុជា បានលើកឡើងថា៖ «មេដឹកនាំពិភពលោក នឹងនាំ​គ្នា​ប្រជុំនៅអង្គការសហប្រជាជាតិ នៅបុរីញូវយ៉កទាំងអស់។ (...) កិច្ចប្រជុំអង្គការសហប្រជាជាតិ ដែលមាន​មេ​ដឹក​នាំពិភពលោក គោលបំណងដើម្បីត្រួតពិនិត្យការអភិវឌ្ឍន៍សហវត្សរ៍ និងដាក់ចេញ នូវគោលដៅអភិវឌ្ឍន៍ ដោយ​ចិរភាពឆ្នាំ២០៣០ ដែលមានដល់១៧ ចំណុច។ (...) តែគ្មានគោលដៅកំចាត់គ្រាប់មីន (...) ក្នុងសន្ទរកថារបស់ខ្ញុំ ទោះបីជាគេមិនដាក់ ក៏ខ្ញុំត្រូវតែដាក់ដែរ ព្រោះអាហ្នឹងត្រូវដោះមីន។»

យោងតាមគេហទំព័រ គណបក្សប្រជាជនកម្ពុជា បានបញ្ជាក់ថា លោកនាយករដ្ឋមន្ត្រី ហ៊ុន សែន ដែលបាន​ចាក​ចេញ ពីកម្ពុជា នៅថ្ងៃទី២៣ ខែកញ្ញានោះ នឹងថ្លែងសុន្ទរកថានាថ្ងៃទី២៦ ខែកញ្ញា ក្នុងកិច្ចប្រជុំកំពូល អង្គការ​សហប្រជាជាតិ សម្រាប់អនុម័តរបៀបរវារៈ អភិវឌ្ឍន៍ក្រោយឆ្នាំ២០១៥។ លុះថ្ងៃទីថ្ងៃទី២៧ ខែកញ្ញា លោក​នាយក​រដ្ឋមន្រ្តី នឹងចូលរួមកិច្ចប្រជុំ ប្រមុខដឹកនាំពិភពលោក ស្តីពី សមភាពយេនឌ័រ និងការលើកកម្ពស់ស្ត្រី និង​បន្តថ្លែងសុន្ទរកថាជាថ្មី។ ចុងបញ្ចប់លោក នឹងជួបជាមួយប្រជាពលរដ្ឋកម្ពុជា រស់នៅអាមេរិក មុននឹង​ចាកចេញ​មកកម្ពុជាវិញ។

គេហទំព័រគណបក្សប្រជាជនកម្ពុជា បានសរសេរទៀតថា៖ «សម្តេចតេជោនាយករដ្ឋមន្រ្តី ហ៊ុន សែន និងមេ​ដឹកនាំ​ពិភពលោក ចំនួន ១៥០ប្រទេស គ្រោងនឹងជួបជុំគ្នា ក្នុងកិច្ចប្រជុំកំពូល ៣ថ្ងៃ នៅទីស្នាក់ការកណ្តាល អង្គការ​សហប្រជាជាតិ នៃបុរីញូយ៉កសហរដ្ឋអាមេរិក ដែលនឹងប្រព្រឹត្តទៅនៅចុងសប្តាហ៍នេះ ។ (...) នៅ​ក្នុង​កិច្ចប្រជុំកំពូលនោះ សម្តេចតេជោ ហ៊ុន សែន គ្រោងនឹងថ្លែងសុន្ទរកថាចំនួន២ គឺនៅថ្ងៃទី២៦ កញ្ញា និងថ្ងៃ​​ទី២៧ កញ្ញា ជាបន្តបន្ទាប់ ។  (...) សម្តេចតេជោ សែន ក្នុងដំណើរស្នាក់នៅ ក្នុងបុរីញូយ៉កនៅចុងសប្តាហ៍នេះ សម្តេច​គ្រោងនឹងជួបសំណេះសំណាលជាមួយនឹង ប្រជាពលរដ្ឋខ្មែរ មកពីគ្រប់ទិសទីកន្លែងទាំងអស់ ក្នុង​សហរដ្ឋ​អាមេរិក។»

ពលរដ្ឋខ្មែរ-អាមេរិកាំងមួយចំនួន បានប្រកាសពីគម្រោង របស់ពួកគេ ថានឹងធ្វើបាតុកម្មប្រឆាំងនឹងរូបលោក ហ៊ុន សែន នៅទីក្រុងញ៉ូយក ជាពិសេសបាតុកម្ម នៅមុខអាគារ របស់អង្គការសហប្រជាជាតិតែម្ដង។។ ពួកគេ បាន​ចាត់​ទុ​កលោក ហ៊ុន សែន ថាជាមេដឹកនាំ ដែលមិនគោពសិទ្ធិមនុស្ស និងលទ្ធិប្រជាធិបតេយ្យ ពិតប្រាកដ​នៅ​កម្ពុជា។ ជាងនេះបាតុកម្ម របស់ពលរដ្ឋខ្មែរអាមេរិកកាំងទាំងនោះ នឹងធ្វើការទាមទារ ឲ្យរដ្ឋាភិបាលកម្ពុជា គោរព​កិច្ចព្រមព្រៀងទីក្រុងប៉ារីស និងធ្វើការរៀបចំ ឲ្យមានភាពត្រឹមត្រូវ ដោយសេរី និងយុត្តិធម៌ សម្រាប់​ការ​បោះឆ្នោត នៅឆ្នាំ២០១៨ខាងមុខ ដើម្បីបង្ហាញការផ្លាស់ប្តូរអំណាចមួយ ដោយសន្តិវិធី និងស្របច្បាប់។

តាមការប្រកាស របស់ក្រុមបាតុករ បានឲ្យដឹងថា បាតុកម្មនោះ នឹងធ្វើឡើងនៅថ្ងៃទី២៦ ខែកញ្ញា មុខទីស្នាក់ការ​ធំ របស់អង្គការសហប្រជាជាតិ ក្នុងបុរីញូវយ៉ក សហរដ្ឋអាមេរិក ចាប់ពីចាប់ពីម៉ោង ១០ និង ៣០ នាទី ព្រឹក​ដល់​ម៉ោង ៣ រសៀល។ ពលរដ្ឋដែលចូលរួមធ្វើបាតុកម្មនោះ មានប្រមាណច្រើនជាង៥០០នាក់ មកពីរដ្ឋមួយចំនួន នឹងធ្វើបាតុកម្មទាមទារយុត្តិធម៌ សម្រាប់ពលរដ្ឋខ្មែរ នៅក្នុងប្រទេសកម្ពុជា ក្នុងឱកាសសម័យប្រជុំទី៧០ របស់​អង្គការសហប្រជាជាតិ។ ពលរដ្ឋទាំងនោះ មកពីបណ្តារដ្ឋមួយចំនួន នៃសហរដ្ឋអាមេរិកដូចជា រដ្ឋវឺជីនៀ (Virginia), រដ្ឋម៉ារីឡែន (Maryland), រដ្ឋញូយ៉ក(New York), រដ្ឋម៉ីនីសូតា (Minnesota), រដ្ឋកាលីហ្វ័រញ៉ា (California), រដ្ឋនូហ្យឺហ្សី (New Jersey) និងរដ្ឋផេនស៊ីលវេនីញ៉ា (Pennsylvania) ជាដើម។

ចំពោះសំនួរថា នឹងមានការចូលរួម ពីសមាជិកគណបក្សសង្គ្រោះជាតិ ក្នុងបាតុកម្មនេះឬយ៉ាងណា ទស្សនាវដ្តី​មនោរម្យ.អាំងហ្វូ មិនអាចស្វែងរកការបញ្ជាក់ ឬការអះអាង ពីអ្នកនាំពាក្យគណបក្សប្រឆាំង បាន​នៅឡើយ។ តែ​សម្រាប់អ្នកនាំពាក្យរដ្ឋាភិបាល ក៏ដូចជាអ្នកនាំពាក្យគណបក្សប្រជាជនកម្ពុជា បានលើកឡើងថា ការ​ធ្វើ​បាតុកម្ម ជា​សិទ្ធិសេរីភាព​របស់បុគ្គលម្នាក់ៗ៕