ការភ្ញាក់ផ្អើលបានកើតឡើង សឹងតែមួយចំហៀងរាជធានីភ្នំពេញ។ ក្រុមមន្រ្តីនគរបាល មកពីពីរខណ្ឌ បាន​​ដេញ​ប្រមាញ់ តាមបុរសម្នាក់ ដែលបានបើករថយន្ដគេចខ្លួន ពីទីកន្លែងកើតហេតុ បន្ទាប់ពីបុរសនេះ បានបង្ក​គ្រោះ​ថ្នាក់ចរាចរណ៍ ជាមួយម៉ូតូជាច្រើនគ្រឿង នៅម្ដុំស្ដុបទេពផន កណ្ដាលរាជធានីភ្នំពេញ។ ហេតុការណ៍ដេញ​តាម​ឃាត់រថយន្ដនេះ បានធ្វើពីស្ដុបទេពផន តាមផ្លូវម៉ៅសេទុង រហូតដល់វត្តសន្សំកុសល ហើយបានបើកបុករះ អ្នក​ចត​ម៉ូតូ នៅតាមផ្លូវនៅទីនោះ រហូតទាល់ទៅលែងរួច ទើបឈប់ឡាន។

ករណីនេះបានបង្កឡើង នៅម៉ោង៣រសៀល ថ្ងៃទី១៥ ខែ កញ្ញ ឆ្នាំ២០១៥ ដោយបុរសមិនស្គាល់​អត្តសញ្ញាណ​ម្នាក់ បើករថយន្ដធុន តូយូតា កាម៉ារី (PRURS) ពណ៍សមួយគ្រឿង ស្លាកលេខភ្នំពេញ ២Z-៤៧៩១។ បើតាម​ប្រភព ដែលបានឃើញហេតុការណ៍ បានឲ្យដឹងថា រថយន្ដជនបង្កបានបើកបុករះ អ្នកឈប់នៅតាមផ្លូវរហូត ពី​ខណ្ឌទួលគោក រហូតដល់ខណ្ឌមានជ័យ និងទីបំផុតបានឈប់ នៅមុខផ្ទះលេខ ១២AEo ក្រុមទី២ភូមិប្រាំ ក្នុង​សង្កាត់​បឹងជំពុន ខណ្ឌមានជ័យ រាជធានីភ្នំពេញ ព្រោះបានបុកជាប់ទ្វារផ្ទះ ទៅមុខលែងរួច។

មន្ត្រីយោធាមួយរូប លោក គង់ ប៊ុនថន ដែលបានតាមរថយន្តខាងលើ តាំងពីដំបូង បានថ្លែងប្រាប់​ទស្សនាវដ្តី​មនោរម្យ.អាងហ្វួឲ្យដឹងថា មុនដំបូង គឺម្ចាស់ឡានមួយនេះ បានបង្កគ្រោះថ្នាក់ចររាចរណ៍ បន្ទាប់មក​ព្យាយាម​បើកគេច។ ពេលនោះ កម្លាំងនគរបាលជាច្រើននាក់របស់ខណ្ឌ  បានដេញតាមពីក្រោយ។ នៅតាមផ្លូវ ឡាន​ខាងលើបានបើកបុករះ អ្នកឈប់នៅជាយផ្លូវ រហូតមកដល់ម្ដុំវត្តសន្សំកុសល ទើបឈប់។ ដោយសាររថយន្ដ ដែលរងការខូចខាតជាច្រើន បានគាំងទ្វាបើកមិនរួចនោះ បុរសអ្នកបើកបរខាងលើ បានទាញកាំភ្លើខ្លី​មក​បាញ់​កញ្ចក់ឡានបំបែក ដើម្បីរំដោះខ្លួនចេញ មុននឹងរត់គេចខ្លូន​បាត់ស្រមោល។

មន្ត្រីយោធានៅកងពល ង៧០ រូបនេះ បានបន្ថែម​ទៀត​ថា ដំបូងសមត្ថកិច្ចតាម ព្រោះតែគ្រោះថ្នាក់​ចររាចរណ៍​ទេ ពេលឡាននេះឈប់ គេឃើញមានថ្នាំញៀន នៅ​ក្នុង​ឡាន ប្រមាណ៥កញ្ចប់ ហើយបុរសអ្នកបើក មាន​កាំភ្លើងខ្លី​នៅ​នឹងដៃ ថែមទៀតផង។

តាមសម្តីបុរសម្នាក់ ជាម្ចាស់ម៉ូតូរងគ្រោះ ដោយសារបុរសខាងលើ បានប្រាប់ឲ្យដឹងថា មិនមែនតែម៉ូតូរបស់​លោកទេ ដែលខូចនោះ តែនៅមានម៉ូតូឈប់ នៅកៀនផ្លូវជាច្រើន ដែលនៅជិតលោក ប្រមាណ៦ ទៅ៧គ្រឿង​ទៀត ខូចខាតដូចគ្នា ព្រោះឡាននេះ បើកបុករះគ្មានសំចៃ។ បច្ចុប្បន្ន ឡានបង្កគ្រោះថ្នាក់ ត្រូវបានការិយាល័យ​ប្រយុទ្ធប្រឆាំងគ្រឿងញៀន នៃក្រសួងមហាផ្ទៃ ស្ទួចយកទៅរក្សាទុក ដើម្បីធ្វើការស៊ើបអង្កេត៕