បើតាមគណនីហ្វេសប៊ុក ដែលបានយកករណីនេះ មកបង្ហោះ បានឲ្យដឹងថា ករណីគ្រោះថ្នាក់ចរាចរណ៍ដ៏រន្ធត់ បានកើតឡើង កាលពីវេលាម៉ោង១១ព្រឹក ថ្ងៃទី ០៨ខែ កញ្ញា ឆ្នាំ២០១៥ រវាងរថយន្តធន់ធ្ងង់ និងម៉ូតូ ស្ថិត​នៅ​តាមបណ្តោយ ផ្លូវជាតិលេខ៤ ចន្លោះគីឡូម៉ែត្រ លេខ១៩០ និងលេខ១៩១ ត្រង់ចំណុចផ្លូវកោង ភូមិព្រៃនប់១ ឃុំព្រៃនប់ ស្រុកព្រៃនប់ ខេត្តព្រះសីហនុ។ ដូចនៅក្នុងរូបថតបញ្ជាក់ស្រាប់ បុរសជាអ្នកជិះម៉ូតូ បានរងគ្រោះ​ដាច់ជើងមួយចំហៀង និងបានធ្លាយគ្រឿងក្នុង ចេញមកក្រៅ។

គណនីហ្វេសប៊ុកដដែល បានឲ្យដឹងទៀតថា រថយន្តធន់ធ្ង ដែលពាក់ស្លាកលេខ ភ្នំពេញ 3B 9590 នេះ បាន​បើកបរតាមបណ្តោយផ្លូវជាតិ ៤ រហូតមកកដល់ត្រង់ចំណុចផ្លូវកោង ក្នុងភូមិព្រៃនប់១ ទើបបានបុក​ជាមួយ​ម៉ូតូ។ បុរសម្ចាស់ម៉ូតូ ដែលជារងគ្រោះ ដាច់ជើង និងធ្លាយគ្រឿងក្នុងនោះ មានឈ្មោះ ស៊ុន ទ្រី មានអាយុ ៥៧ ឆ្នាំមានមុខរបរកម្មករ ស្នាក់នៅក្នុង ភូមិព្រៃនប់១ ឃុំព្រៃនប់ ស្រុកព្រៃនប់ ខេត្តព្រះសីហនុ។

រូបភាពដ៏រន្ធត់ និងតក់ស្លុត ត្រូវបានបង្ហោះ នៅលើបណ្ដាញសង្គម ក្នុងថ្ងៃដដែល និងបង្កឲ្យមានការចែករំលែក យ៉ាងច្រើន។ អ្នកប្រើប្រាស់ហ្វេសប៊ុក ជាច្រើនបានលើកឡើងថា គេគួរតែធ្វើការបិទបាំងរូបភាពខ្លះ ដែល​ពោរ​ពេញដោយភាពសហាវ និងបង្កឲ្យប៉ះពាល់ដល់អារម្មណ៍ របស់អ្នកទស្សនា ដោយហេតុថា នៅលើបណ្ដាញ​សង្គម មានមនុស្សគ្រប់ប្រភេទប្រើប្រាស់ ក្នងនោះ មានទាំងកុមារអាយុក្រោយ១៨ឆ្នាំ និងអ្នកមានជំងឺខាង​បេះ​ដូង ឬអារម្មណ៍នោះផង៕