នៅ​កម្ពុជា ជេរ​ប្រមាថ និង​គម្រាម​តាម​ហ្វេសប៊ូក ត្រូវ​«​មាន​ទោស»

ករណីញុះញង់ ការជេរប្រមាទ ការគម្រាមកំហែងជាដើម នៅតាមបណ្តាញអ៊ីធើណែត ឬហ្វេសប៊ូក ត្រូវបានចាត់ទុកថា ជាបទល្មើសព្រហ្មទណ្ឌ។ ដូចយ៉ាងយុវជន ផង់ សីហា អាយុ ២៧ឆ្នាំ កាលពីម្សិលម៉ិញថ្ងៃទី ៧ ខែកញ្ញា កន្លងមកនេះ ត្រូវបានព្រះរាជអាជ្ញា អមសាលាដំបូងរាជធានីភ្នំពេញ សម្រេចចោទប្រកាន់ តាមមាត្រា២៣៣ នៃក្រមព្រហ្មទណ្ឌ។
Loading...
  • ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) -ភ្នំពេញថ្ងៃទី៨ កញ្ញា ២០១៥
  • កែប្រែចុងក្រោយ: September 16, 2015
  • ប្រធានបទ: ចរាចរណ៍
  • អត្ថបទ: មានបញ្ហា?
  • មតិ-យោបល់

បន្ទាប់ពីត្រូវបានសាកសួរ ដោយព្រះរាជអាជ្ញា លោក សៀង សុខ រួច យុវជន ផង់ សីហា ត្រូវបានបញ្ជូន ទៅ​ឃុំ​ខ្លួនជាបណ្តោះអាសន្ន នៅពន្ធនាគារព្រៃស តាមអំណាចក្រមព្រហ្មទណ្ឌ មាត្រា២៣៣ ដែលត្រូវផ្តន្ទាទោស ឲ្យ​ជាប់ពន្ធនាគារចន្លោះ ពី៦ខែ ដល់ ២ឆ្នាំ ពីបទ «គំរាមថានឹងសម្លាប់» លោក សុខ ទូច ប្រធានក្រុម​ការងារស្រាវ​ជ្រាវព្រំដែន នៃរាជបណ្ឌិតសភាកម្ពុជា តាមបណ្តាញសង្គម នាពេលកន្លងមក។

ចំណាត់ការយ៉ាងរហ័ស របស់សមត្ថកិច្ច ក្នុងការចាប់ខ្លួនយុវជនរូបនេះ ក៏ទទួលបានការគាំទ្រដែរ ពីបណ្តាមន្រ្តី នៃអង្គការសង្កមស៊ីវិលមួយចំនួន។ ប៉ុន្តែមន្រ្តីអង្គការសង្គមស៊ីវិលទាំងនោះ បានស្នើឲ្យសមត្ថកិច្ចជំនាញ​ទាំង​នោះ អនុវត្តដោយឈរលើគោរលការណ៍ច្បាប់ ឯករាជ្យ អព្យរាក្រិត្យ និងតម្លាភាព ក្នុងការបង្ហាញភស្តុតាង ចំពោះ​ការចោទប្រកាន់ ដែលស៊ីចង្វាក់។

មន្រ្តីអង្គការសង្គមស៊ីវិល ដែលធ្វើការពាក់ព័ន្ធនឹងច្បាប់ សិទ្ធិមនុស្ស បានស្នើឲ្យមានវិធានការដូចគ្នានេះ តាម​ផ្លូវច្បាប់ ទៅលើក្រុម ឬបុគ្គល ដែលបានធ្វើការគម្រាមសម្លាប់ លោក កឹម សុខា អនុប្រធានទីមួយនៃរដ្ឋសភា មកពីគណបក្សសង្គ្រោះជាតិ នាពេលកន្លងមកនេះដែរ។

សូមរំលឹកថា ជនសង្ស័យ ដែលសមត្ថកិច្ចចាប់ខ្លួនបាននេះ ជាម្ចាស់គណនីហេ្វសប៊ុកឈ្មោះ សី ហុយ (Sey Hu) ដែលបានគម្រាមសម្លាប់ លោក សុខ ទូច កាលពីថ្ងៃទី២៩ ខែសីហាថ្មីៗនេះ។ អាយុ ២៧ឆ្នាំ មាន​ស្រុក​កំណើត ខេត្តព្រៃវែង យុវជនរូបនេះ ត្រូវបានសមត្ងកិច្ចចាប់ខ្លួន កាលពីថ្ងៃទី៥ ខែកញ្ញា តាមច្រកព្រំដែន​ប៉ោយប៉ែត ព្រំដែនកម្ពុជា-ថៃ និងបញ្ជូនមកសាលាដំបូងរាជធានីភ្នំពេញ នាព្រឹកថ្ងៃទី៧ ខែកញ្ញា ហើយបន្ត​ឃុំ​ខ្លួន​នៅព្រៃសតែម្តង បន្ទាប់ពីបញ្ចប់ការសាកសួរ ដោយព្រះរាជអាជ្ញា។

សំណេរគម្រាម ជាមួយនឹងរូបថតកាំភ្លើង និងរូបថតលោក សុខ ទូច ដែលបានបង្ហោះ នៅលើទំព័រ​ហ្វេសប៊ុក​នោះ មានន័យជាអាថ៌ថា៖ «ទុកបាញ់ក្បាល សុខ ទូច អាបណ្ឌិតខួរឆ្កែ អាបណ្ឌិត កែប្រែប្រវត្តិសាស្រ្ត អា​បណ្ឌិត​លក់ខួរឲ្យយួន»។

» សូមអានអត្ថបទបន្ថែម ដោយចុចនៅលើទីនេះ

គេនៅមិនទាន់ដឹងថា តើករណីរបស់យុវជន សីហា នេះ ត្រូវបានអាជ្ញាធរស៊ើបអង្កេត ឃើញជាមួយនឹងវត្ថុតាង​ពិតប្រាកដ (មានកាំភ្លើងមែន ឬយុវជនបានប្រព្រឹត្ត ទៅទិញអាវុធ និងចាប់ផ្ដើមសកម្មភាព ដើម្បីឈានទៅ​អនុវត្តន៍ ដូចអ្វីដែលខ្លួនបានសរសេរ) ឬនៅត្រឹមតែជាការសង្ស័យ នោះឡើយ។

ប៉ុន្តែប្រសិននៅត្រឹមជាការសង្ស័យ នោះបើតាមច្បាប់រដ្ឋធម្មនុញ្ញ ដែលជាច្បាប់កំពូល ត្រង់មាត្រា៣៨ បាន​បង្ហាញថា វិមតិសង្ស័យត្រូវបានជាប្រយោជន៍ ដល់ជនជាប់ចោទ។ ជនជាប់ចោទណាក៏ដោយ ត្រូវទុកជា​មនុស្ស​ឥតទោស ដរាបណាតុលាការ មិនទាន់កាត់ទោសជាស្ថាពរ។ មាត្រាដដែលនេះ បានចែងបន្តថា៖ «ការ​ចោទ​ប្រកាន់ ការចាប់ខ្លួន ការឃាត់ខ្លួន ឬការឃុំខ្លួនជនណាមួយ នឹងអាចធ្វើទៅកើត លុះត្រាតែអនុវត្តត្រឹមត្រូវ តាម​បញ្ញត្តិច្បាប់។ ការបង្ខិតបង្ខំ ការធ្វើបាបលើរូបរាងកាយ ឬប្រព្រឹត្តិកម្មណាមួយ ដែលបន្ថែមទម្ងន់ ទណ្ឌកម្ម អនុវត្ត​ចំពោះជនជាប់ឃុំឃាំង ឬជាប់ពន្ធនាគារត្រូវហាមឃាត់ មិនឱ្យធ្វើឡើយ។ អ្នកដៃដល់ អ្នករួមប្រព្រឹត្ត និង​អ្នក​សមគំនិត ត្រូវទទួលទោសតាមច្បាប់។ ការទទួលសារភាព ដែលកើតឡើង ពីការបង្ខិតបង្ខំតាមផ្លូវកាយក្ដី តាម​ផ្លូវ​ចិត្ត​ក្ដី មិនត្រូវទុកជាភស្តុតាង នៃពិរុទ្ធភាពទេ។»

ករណីនៃការគម្រាបសម្លាប់ តាមរយៈបណ្តាញសង្គម ត្រូវបានគេប្រទះឃើញជាញឹកញាប់ណាស់ ក្នុងពេល​កន្លងមក។ តួយ៉ាងក្នុងឆ្នាំ២០១៣ មេដឹកនាំក្រុមប្រឆាំង លោក កឹម សុខា ធ្លាប់ទទួលរងនូវការកម្រាម សម្លាប់​នេះ តាមបណ្តាញសង្គម ហ្វេសប៊ូកដែរ។ លោកធ្លាប់បានដាក់ពាក្យបណ្តឹង ដើម្បីស្នើឲ្យសមត្ថកិច្ច ស្វែងរក​ចាប់​ខ្លួន តែរហូតមកដល់ថ្ងៃនេះ នៅមិនទាន់មានមុខសញ្ញា ហើយជននោះ ក៏កំពុងស្ថិតនៅក្រៅ​សំណាញ់​ច្បាប់ នៅឡើយ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...