នៅតាមដងផ្លូវ វិលត្រឡប់ទៅផ្ទះ បន្ទាប់ពីបានចេញពីធ្វើការងារនោះ ភ្នាក់ងារនគរបាល នៃរដ្ឋការ៉ូលីន​ខាង​ជើង (Caroline du Nord សហរដ្ឋអាមេរិក) លោក ដេន ហិច (Dan Hicks) បានចោលភ្នែកទៅ ឃើញបុរស​ម្នាក់ កំពុងអង្គុយនៅលើស្ពាន នៅតាមបណ្ដោយផ្លូវ ដែលទំនងជាចង់លោត​សម្លាប់ខ្លួន ទៅលើចរាចរណ៍ យ៉ាង​ស្អេក​ស្កះ នៅខាងក្រោម។ ទោះជាលោកផុតម៉ោងធ្វើការក៏ដោយ តែភ្នាក់ងារនគរបាល លោក ដេន ហិច ដែល​នៅ​ក្បែរ​កន្លែងកើតហេតុ មុនភ្នាក់ងារផ្សេងមកដល់នោះ បានព្យាយាមចូលទៅជិតបុរសនោះ ដើម្បីធ្វើ​អន្តរាគមន៍ កុំ​ឲ្យ​ហេតុការណ៍ដ៏រន្ធត់ អាចកើតឡើងបាន។ ឈុតឆាកនេះ ថែមទាំងត្រូវបានថតជាប់ ដោយ​កាម៉េរ៉ា​​សុវត្ថិភាព​មួយ នៅក្បែរនោះថែមទៀត។

លោក ដេន ហិច ទំនងជាបានរកឃើញ នូវពាក្យពិសេសៗ ចំគោលដៅមួយចំនួន ដើម្បីនិយាយទៅកាន់​បុរស​នោះ ទើបបណ្ដាលឲ្យជន ដែលចង់គិតខ្លីនេះ ហុចដៃងាកក្រោយ ងើបចេញពីកន្លែងមរណៈ មកផ្នែក​ខាង​លើ​ស្ពាន​​វិញ។ តែហេតុការណ៍ បានកើតឡើងដែលគ្មាននរណាស្មានដល់៖ នោះគឺភ្នាក់ងារនគរបាល បានយក​បុរស​ ដែល​ប៉ុនប៉ងធ្វើអត្តឃាត មកដាក់ក្នុងរង្វង់ដៃ ហើយអោបយ៉ាងណែន ក្នុងរយៈពេល១០វិនាទី។

លោក ដេន ហិច បានថ្លែងប្រាប់ប្រព័ន្ធផ្សព្វផ្សាយ ក្នុងស្រុកថា៖ «បុរសនោះ បានទទួលនូវការអោប យ៉ាង​ស្និតស្នាលពីខ្ញុំ បើទោះជាបុរសនោះ មិនចង់ក៏ដោយ»។ រូបភាពវីដេអូ និងកិច្ចសម្ភាសជាមួយភ្នាក់ងារ​នគរបាល ត្រូវបានទូរទស្សន៍អាមេរិកជាច្រើន យកមកផ្សាយ ហើយរូបភាព នៅផ្ទាល់កន្លែងនោះ ត្រូវបានបង្ហោះ​ដាក់​ចែក​ផ្សាយ នៅលើគេហទំព័រ យូធូប និងជាពិសេសនៅលើបណ្ដាញសង្គម បង្កការរញ្ជួយបេះដូង កាន់តែ​ច្រើន​ឡើង។ នៅចំពោះ ការកោតសរសើរទាំងនេះ លោក ដេន ហិច បានថ្លែងឡើងថា៖ «ខ្ញុំគ្រាន់តែបានធ្វើភារកិច្ច របស់ខ្ញុំប៉ុណ្ណោះ»។

លោក ដេន ហិច បានពន្យល់ប្រាប់​សារព័ត៌មានក្នុងស្រុកទៀតថា បុរសនោះ មានបញ្ហា​ខាងផ្លូវចិត្ត​យ៉ាង​ធ្ងន់​ធ្ងរ។ ប៉ុន្តែលោកចង់ជួយបុរសនោះ ដើម្បីធ្វើយ៉ាងណា អាចស្វែងរកពន្លឺ សម្រាប់ជីវិតរបស់ខ្លួន ដោយប្រើដៃ​ទាំងពីរ ជៀសជាងជម្រើស នូវទង្វើមួយដែលគិតខ្លី យ៉ាងដូច្នេះ៕