ហេតុការណ៍ដ៏សោកសង្រេងនេះ បានកើតឡើង កាលពីវេលាម៉ោង៩ និង៥០នាទីព្រឹក ថ្ងៃទី០៤ ខែកញ្ញា ឆ្នាំ​២០១៥ នៅភូមិឈូក ឃុំសន្លុង ស្រុកខ្សាច់កណ្តាល ខេត្តកណ្តាល។ ក្មេងប្រុសរងគ្រោះឈ្មោះ ណាត វណ្ណៈ អាយុ២ឆ្នាំ បានស្លាប់ នៅពេលកំពុងបង្ហោះខ្លែងលេង នៅក្រោយភូមិ រួចរត់ភ្លេចខ្លួន ជ្រុលជើងធ្លាក់ចូល ក្នុង​ស្រះទឺកនៅទីនោះ បណ្តាលឱ្យលង់ទឹកស្លាប់ភ្លាម មួយរំពេច។

ឪពុកក្មេងរងគ្រោះ លោក ថា ណាត អាយុ៣១ឆ្នាំ ដែលមានមុខរបរ ជាកម្មកសំណង់ និងម្តាយឈ្មោះ ថេង មេត្តា អាយុ២៦ឆ្នាំ ដែលជាកម្មកររោងចក្រ រស់នៅភូមិឃុំ កើតហេតុខាងខាងលើ មិនបាននៅកន្លែង​កើត​ហេតុ​ទេ ពេលកូនរបស់ខ្លូនមានគ្រោះថ្នាក់ ដោយអ្នកទាំងពីរ ទៅបំពេញការងារដូចរាល់ដង ហើយបានផ្ញើរ​កូន​ប្រុស ជាមួយយាយតានៅផ្ទះ។ ក្រោយពីធ្លាក់ចូល ក្នុងទឹកស្រះភ្លាម មានក្មេងៗពីនាក់ បានរត់ទៅប្រាប់អ្នក​ភូមិ​ថា មានក្មេងលង់ទឹកស្រះ។ ប៉ុន្តែបានហួសពេលទៅហើយ ព្រោះទម្រាំអ្នកភូមិ បាននាំគ្នាចុះទៅរាវរកនោះ គេ​បាន​ប្រទះ​ឃើញ ត្រឹមតែសាកសព របស់កុមារ ណាត វណ្ណៈ ប៉ុណ្ណោះ។

បើតាមមន្ត្រីនគបាល នៅទីតាំងកើតហេតុ បានប្រាប់ឱ្យដឹងថា ករណីក្មេងប្រុសលង់ទឺកស្លាប់នេះ មកពី​ឪពុក​និងម្តាយមិនបាននៅផ្ទះ មើលកូនឱ្យបានដិតដល់ ដោយផ្ញើរជាមួយយាយតាក្មេងរងគ្រោះ ឱ្យជួយមើល។ បច្ចុប្បន្ន​សាកសពក្មេងប្រុស វណ្ណៈ ត្រូវបានសមត្តកិច្ច ប្រគល់អោយឪពុកម្តាយ យកទៅធ្វើបុណ្យតាម​ប្រពៃណី ទាំង​សោកសង្រេង។ មន្ត្រីនគរបាលខេត្តតាកែវ បានថ្លែងអំពាវនាវ ទៅកាន់មាតាបិតាទាំងឡាយ សូមកុំធ្វេស​ប្រហែស ជាមួយនឹងការមើលថែទាំកូន ព្រោះគ្រោះថ្នាក់ វាអាចឆក់យកជីវិតកូន ជាទីស្រឡាញ់ តែមួយ​ប៉ព្រិច​ភ្នែក​ប៉ុណ្ណោះ៕