ផែនទីដែលរដ្ឋាភិបាលប្រើប្រាស់ សម្រាប់បោះបង្គោលសព្វថ្ងៃនេះ ជាផែនទីមួយ ដែលប្រធានគណៈ​កម្មាធិការ​កិច្ចការព្រំដែនកម្ពុជា លោក វ៉ា គឹមហុង អះអាងថា ធ្លាប់បានថ្វាយ អង្គព្រះបរមរតនៈកោដ្ឋ ដែលកាលនោះ​ព្រះ​អង្គ បានបញ្ជាក់ថា នោះជា«ផែនទីក្លែងក្លាយ»។ នេះជាការអះអាង នៅក្នុងសេចក្ដីថ្លែងការណ៍មួយ របស់​ក្រុម​ប្រឹក្សាឃ្លាំមើលកម្ពុជា ក្នុងថ្ងៃទី២៨ ខែសីហា ឆ្នាំ២០១៥នេះ ទាក់ទងនឹងផែនទីព្រំដែន ដែលរដ្ឋាភិបាលកម្ពុជា បានប្រើប្រាស់ក្នុងពេលកន្លងមក ដើម្បីយកទៅចរចា ជាមួយប្រទេសវៀតណាម ហើយក្រុមនេះ បានបញ្ជាក់​ទៀត​ថា ខ្លួនមិនដែលទទួលស្គាល់ ជាដាច់ខាត ចំពោះសន្ធិសញ្ញា ព្រំដែនបំពេញបន្ថែម ឆ្នាំ២០០៥ ទៅលើ​សន្ធិ​សញ្ញា​ព្រំដែនរដ្ឋខុសច្បាប់ កម្ពុជា- វៀតណាម ឆ្នាំ១៩៨៥ ឡើយ។

ក្រុមប្រឹក្សាឃ្លាំមើលកម្ពុជា ដែលមានលោក ប៉ែន ណាត ជាប្រធាន បានស្រង់នូវព្រះឱង្ការ នៃអតីតអង្គ​ព្រះ​មហាក្សត្រ នរោត្តម សីហនុ មកសរសេរ ក្នុងសេចក្ដីថ្លែងការណ៍នេះថា៖ «ឯកឧត្តម វ៉ា គឹមហុង ហ៊ានបង្ហាញខ្ញុំ នូវផែនទីក្លែងក្លាយ ជាផែនទីពីសម័យសង្គមរាស្រ្តនិយម។ (...) ផែនទីទាំងឡាយណា ដែលផ្ទុយពីការកំណត់ ក្នុងមាត្រា២ នៃរដ្ឋធម្មនុញ្ញឆ្នាំ១៩៩៣ ជាផែនទី មិនអាចយកប្រើប្រាស់ ក្នុងការបោះបង្គោល ជាមួយវៀតណាម​ជាដាច់ខាត។»

បន្ថែមពីលើការដកស្រង់ខាងលើ លោក ប៉ែន ណាត បានយកសំណេរ ដែលមាននៅក្នុងសេចក្តី​ថ្លែងការណ៍​របស់​ខ្លួន ចុះថ្ងៃទី ១១ ខែតុលា ឆ្នាំ២០០៥ មករំលឹកឡើងវិញថា៖ «“សូមចូលរួមកាន់ទុក្ខ ចំពោះភាព​គ្រោះថ្នាក់​យ៉ាង​ធ្ងន់​ធ្ងរ នៃ​បញ្ហាបូរណភាពទឹកដីខ្មែរ”។ តំណាងរាស្រ្តបក្សសមរង្ស៊ី ២៤ រូប (នៅពេលនោះ បាន) ដើរចេញ ពី​រដ្ឋសភា ប្រឆាំង​សន្ធិសញ្ញា​នេះ​ដែរ។»

ការប្រកាសខាងលើ របស់ក្រុមប្រឹក្សាឃ្លាំមើលកម្ពុជា ដែលមានមូលដ្ឋាន នៅប្រទេសណ័រវេស បានផ្សាយ​ចេញ បន្ទាប់​ពី​ការ​ផ្ទៀងផ្ទាត់ ផែនទីព្រំដែនកម្ពុជា ត្រូវ​បាន​ធ្វើឡើង យ៉ាងគគ្រឹកគគ្រេង រវាងផែនទីព្រំដែន ដែល​រដ្ឋាភិបាល​​កម្ពុជា​ប្រើប្រាស់ ជាមួយនឹងផែនទី ផ្ញើរ​ទុក​នៅ​ប្រទេសមហាអំណាចនានា និងនៅអង្គការ​សហ​ប្រជាជាតិ។ បន្ទាប់​​ពី​ការ​ផ្ទៀង​ផ្ទាត់នោះ រដ្ឋាភិបាលខ្លួនឯង ក៏ដូច​ជា​រាជបណ្ឌិតសភាកម្ពុជា (ដែលជា​ស្ថាប័ន​មួយ របស់​រដ្ឋា​ភិបាល​​ដដែល) តែង​បាន​ប្រកាសថា ផែនទីទាំង​អស់ មាន​លក្ខណៈដូចគ្នាទាំងស្រុង។ តែការ​ប្រកាស​នោះ មិន​ទាន់​​​ត្រូវ​​បាន​គណបក្ស​​សង្គ្រោះ​​ជាតិ និងអ្នកគាំទ្រ​​គណបក្ស​នេះ បង្ហាញពីជំហរ​ទទួល​យក​នៅ​ឡើយ។

លោក អ៊ុំ សំអាន តំណាងរាស្រ្ត មកពីគណបក្សសង្គ្រោះជាតិ ធ្លាប់បានអះអាង និងទទួលស្គាល់ថា អង្គអតីត​ព្រះ​មហាក្សត្រកម្ពុជា ធ្លាប់មានព្រះបន្ទូលថា លោក វ៉ា គឹមហុង ប្រធានគណៈកម្មាធិការចម្រុះខណ្ឌសីមា និង​បោះ​បង្គោលព្រំដែនកម្ពុជា បានយក«ផែនទីក្លែងក្លាយ ថ្វាយទ្រង់ទត។

» សូមអានអត្ថបទលម្អិត និងទស្សនាជាវីដេអូបន្ថែម ដោយចុចនៅលើទីនេះ។

តែការលើកឡើង ថារដ្ឋាភិបាលកម្ពុជា ដែលដឹកនាំដោយលោកនាយករដ្ឋមន្ត្រី ហ៊ុន សែន បាន​ប្រើប្រាស់​«ផែនទី​​ក្លែង​ក្លាយ» ត្រូវបានទាត់ចោល ដោយរដ្ឋាភិបាលខ្លួនឯង និងតាមរយៈមន្ត្រីជាន់ខ្ពស់ ជាបន្តបន្ទាប់។ រដ្ឋាភិបាល និងគណបក្សប្រជាជនកម្ពុជា (ដែលកំពុងកាន់អំណាច) បានហៅការចោទរដ្ឋាភិបាល ថាប្រើ «ផែនទី​​ក្លែង​ក្លាយ» នេះ គ្រាន់តែចង់បានប្រជាប្រិយភាពពីពលរដ្ឋ របស់ក្រុម ឬគណបក្សនោះប៉ុណ្ណោះ។ ហើយ​​ដើម្បី​​ជម្រះ​មន្ទិលនេះ យុទ្ធនាការ​ផ្ទៀងផ្ទាត់ផែនទី ត្រូវបានរដ្ឋាភិបាលយកមកប្រើប្រាស់ រហូតឈានទៅ​ដល់​​ការ​​ព្រមាន ថា​នឹង​​ចាត់​​វិធានការ​តាម​ផ្លូវ​ច្បាប់ ប្រឆាំង​នឹង​នរណា ឬ​ក្រុម​ណា​ក៏ដោយ ដែលនៅតែ​ហ៊ាន​និយាយ​ថា រដ្ឋាភិបាល​ប្រើ​​«ផែនទី​​​ក្លែង​ក្លាយ»។

» សូមអានអត្ថបទលម្អិត និងទស្សនាជាវីដេអូបន្ថែម ដោយចុចនៅលើទីនេះ។

ផ្ទុយទៅវិញ យុទ្ធនាការផ្ទៀងផ្ទាត់ផែនទីនោះ ត្រូវបានក្រុមប្រឹក្សាឃ្លាំមើលកម្ពុជាដដែល វាយតម្លៃថា មាន​បំណង​ដើម្បី​លុបលាង​កំហុសប្រវត្តិសាស្ត្រ ដែលរដ្ឋាភិបាល ដឹកនាំដោយលោក ហ៊ុន សែន ធ្វើឡើងក្នុង​អំឡុង​ពេល នៃការដឹកនាំ​របស់​ខ្លួន។ សេចក្ដីថ្លែងការណ៍ បានសរសេរថា៖ «រដ្ឋាភិបាលកម្ពុជា ប្រើប្រាស់ផែនទី​ផ្សេង មកផ្ទៀងផ្ទាត់ ក្នុង​បំណង​ចង់​ស្តារ​ប្រជាប្រិយភាពនយោបាយ, ចង់លុបលាងកំហុសប្រវត្តិសាស្រ្ត និងចង់ឲ្យ​ប្រជា​ពលរដ្ឋស្ងប់ចិត្ត។ ប៉ុន្តែ​ការ​បោះបង្គោលព្រំដែន លើដីជាក់ស្តែង រដ្ឋាភិបាលប្រីប្រាស់ផែនទីមិន​ត្រឹមត្រូវ "ក្លែង​ក្លាយ"​ ជាផែនទី​អម​​សន្ធិ​សញ្ញា​ព្រំដែនរដ្ឋ រវាងកម្ពុជា និងវៀតណាមឆ្នាំ១៩៨៥។»៕