យោងតាមគេហទំព័រ របស់អាជ្ញាធរអប្សរា បានរៀបរាប់ឲ្យដឹងថា ព្រះពុទ្ធបដិមាទាំងពីរអង្គនេះ មានកម្ពស់ ២៧ សង់ទីម៉ែត្រ ទទឹង ១៩ សង់ទីម៉ែត្រ និងមួយអង្គទៀត មានកម្ពស់ ៣០សង់ទីម៉ែត្រ ទទឹង ១៦ សង់ទីម៉ែត្រ ស្ថិត​ក្នុង ព្រះឥរិយាបថសមាធិ និងផ្ចាញ់មា ហើយកសាងពីលោហធាតុ។ ព្រះពុទ្ធបដិមាទាំងពីរ ត្រូវបានលោក ហែម ម៉ៃ បុគ្គលិកបច្ចេកទេស នៃនាយកដ្ឋានអភិរក្សប្រាសាទ ក្រៅឧទ្យានអង្គរ ប្រទះរកឃើញ នៅពេលលោក កំពុង​បំពេញការងារ។

មុនពេលរកឃើញបដិមានេះ នៅល្ងាចថ្ងៃទី ២៤ មានលោកតាអាចារ្យម្នាក់ មកប្រាប់លោក ហែម ម៉ៃ ថាក្មេងៗ​បានឃើញ រូបស្នាមព្រះបាទ នៅលើផ្ទាំងថ្មធំមួយ លុះព្រឹកឡើង លោកបានទៅពិនិត្យ ជាមួយក្រុមការងារ ក៏​ប្រទះឃើញស្នាមព្រះបាទ មិនទាន់ឆ្លាក់រួច នៅផ្ទាំងថ្មនោះមែន ហើយស្នាមព្រះបាទនេះ មានប្រវែងបណ្តោយ ២.៥ម៉ែត្រ ទទឹង ១.៣ម៉ែត្រ និងមានជម្រៅ ២.៨៥ ម៉ែត្រ។

នៅទីនោះ មានដើមឈើដុះពីលើ ស្លឹកឈើជ្រុះកប់ក៏ច្រើន និងមានទឹកជ្រៅទៀត លោកក៏បានឲ្យក្មេងៗ សម្អាត​កន្លែងនោះ ក៏បានប្រទះ ព្រះពុទ្ធបដិមានៅទីនោះតែម្តង។

លោក ឈាន រដ្ឋា ប្រធានស្តីទី នាយកដ្ឋានអភិរក្សប្រាសាទក្រៅឧទ្យានអង្គរ បានបញ្ជាក់ថា ព្រះពុទ្ធបដិមា ទាំងពីរ​អង្គនោះ ត្រូវបានរក្សាទុក ក្នុងនាយកដ្ឋានរបស់លោកនៅឡើយ ដើម្បីរង់ចាំក្រុមជំនាញបុរាណ វិទ្យា ធ្វើការសិក្សាវិភាគ កំណត់អត្តសញ្ញាណ និងអាយុកាលសិន។ ប៉ុន្តែក្រុមអ្នកជំនាញវិញ នៅមិនទាន់ហ៊ាន អះអាង​ឲ្យច្បាស់លាស់នៅឡើយទេ ចំពោះបដិមាទាំងពីរអង្គនេះ៕