សមាជិកព្រឹទ្ធសភា មកពីគណបក្ស សម រង្សី និងជាអ្នកជំនាញខាងព្រំដែន របស់គណបក្សសង្គ្រោះជាតិ លោក ហុង សុខហួរ អាចនឹងប្រឈមទល់នឹងបទចោទ ចំនួន៣ ដែលបទចោទណាមួយ ក៏សុទ្ធតែមានទោស ត្រូវជាប់ពន្ធនាគារ ជាច្រើនឆ្នាំ។ នេះបើតាមប្រភព ពីមន្ត្រីតុលាការ បានថ្លែងបង្ហើបដឹង នៅព្រឹកថ្ងៃទី១៦ ខែ​សីហានេះ។

នៅ​ព្រឹក​ថ្ងៃទី​១៦ ខែសីហា ឆ្នាំ​២០១៥ នេះ លោក ហុង សុខហួរ ត្រូវបានក្រុមអាជ្ញាធរ បញ្ជូនត្រឡប់មក​តុលាការ​វិញ ដើម្បីអនុញ្ញាឲ្យចៅក្រមស៊ើបសួរ លោក ​កោ វណ្ឌី ​ធ្វើការ​សាកសួរ​។ សមាជិកព្រឹទ្ធសភា មកពី​គណបក្សប្រឆាំងរូបនេះ ត្រូវបានអាជ្ញាធរ គ្រប់គ្រងដោយរដ្ឋាភិបាលលោក ហ៊ុន សែន ចាប់ខ្លួនកាលពី​ព្រឹក​ថ្ងៃ​ម្សិលម៉ិញ ពីក្នុងគេហដ្ឋានរបស់តំណាងរាស្ត្រ មកពីគណបក្សសង្គ្រោះជាតិ លោក យន្ដ ថារ៉ូ នៅ​ភូមិ​គោក​ឃ្លាង សង្កាត់​ភ្នំពេញ​ថ្មី ខណ្ឌ​សែន​សុខ។

ការចាប់ខ្លួនសមាជិកព្រឹទ្ធសភា ទាំងអភ័យឯកសិទ្ធិនេះ បានធ្វើឡើងតាមបញ្ជា លោកនាយករដ្ឋមន្ត្រី ហ៊ុន សែន ដែលបានប្រកាសកាលពីថ្ងៃទី១៣ ខែសីហា បញ្ជាឲ្យកងកម្លាំងសមត្ថកិច្ច តាម​ស្វែង​រកចាប់ខ្លួន លោក ហុង សុខហួរ។ លោក ហ៊ុន សែន បានចោទលោក សុខហួរ ពីបទ«ក្បត់ជាតិ»​ បន្ទាប់ពីសមាជិកព្រឹទ្ធសភា មកពី​គណបក្ស​ប្រឆាំង​រូបនេះ បានធ្វើអត្ថាធិប្បាយ ពីសន្ធិសញ្ញា កម្ពុជា-វៀតណាម នាឆ្នាំ​១៩៧៩ ទាក់ទង​នឹង​ឃ្លាមួយ ដែលលោក ហ៊ុន សែន បានចាត់ទុកថា ជាការក្លែងបន្លំមួយ មានចេតនា​បង្ក​ចល្លាចល។

ការធ្វើអត្ថាធិប្បាយ ថតជាវីដេអូ ដែលត្រូវបានបង្ហោះ នៅលើទំព័រហ្វេសប៊ុករបស់លោក សម រង្ស៊ី ប្រធាន​គណបក្ស​សង្គ្រោះជាតិនោះ ត្រូវបានលោកនាយករដ្ឋមន្ត្រីអះអាងថា ជាការប្រព្រឹទ្ធបទល្មើស​ជាក់ស្ដែង ហើយ​អាចអនុញ្ញាតឲ្យអាជ្ញាធរ​ ធ្វើការចាប់ខ្លួន​សមាជិកព្រឹទ្ធសភារូបនេះ ដោយមិនចាំបាច់​ មានការដកអភ័យ​ឯក​សិទ្ធិ​​​ជាមុន។

ក្រោយពីចាប់ខ្លួន លោក សុខហួរ ត្រូវបានបញ្ជូនខ្លួនភ្លាមៗ ទៅធ្វើការស៊ើបសួរ នៅស្នងការដ្ឋាននគរបាល រាជធានីភ្នំពេញ មុននឹងបញ្ចូនទៅតុលាការសាលាដំបូង នៅរសៀលថ្ងៃដដែល។ លោក​មាស ច័ន្ទ​ពិសិដ្ឋ ព្រះ​រាជអាជ្ញារង ដែលបានទទួលបន្ទុកសាកសួរ សមាជិកព្រឹទ្ធសភានោះ បានស្នើឲ្យចោទប្រកាន់ លោក ហុង សុខហួរ នូវបទចោទប្រកាន់ ចំនួន៣ករណី៖ បទ​ក្លែង​លិខិត​សាធារណៈ បទ​ប្រើ​លិខិត​សាធារណៈ​ក្លែង និង​បទ​ញុះញង់​ អោយមាន​បទល្មើស​ម​ជ្ឈឹ​ម ឬ​ឩ​ក្រិ​ដ្ឋ​មិន​បានសម្រេច​។ ប៉ុន្តែគេមិនឃើញ មានបទចោទ ទាក់ទងនឹង​«ទង្វើក្បត់ជាតិ»នោះទេ។

លោក ហុង សុខហួរ ត្រូវបានបញ្ជូនត្រឡប់ទៅឃុំខ្លួន នៅស្នងការដ្ឋាននគរបាល រាជធានីភ្នំពេញ ក្នុងយប់​ថ្ងៃ​ទី១៥ ខែសីហា មុននឹងបញ្ជូនខ្លួន មកសាលាដំបូងរាជធានី ជាថ្មីទៀត នាព្រឹកនេះ។ ចៅក្រមស៊ើបសួរ អាច​នឹង​កំណត់ពីបទចោទទាំងនេះ នៅបន្ទាប់ពីធ្វើការសាកសួររួច។

ក្នុងច្បាប់ក្រមព្រហ្មទណ្ឌកម្ពុជា ត្រង់​មាត្រា ៦២៩. បទ​ក្លែងបន្លំ​ឯកសារ​សាធារណៈ បាន​ចែងថា ការ​ក្លែង​បន្លំ​ប្រព្រឹត្ត​ នៅក្នុង​លិខិតយថាភូត ឬ​ការ​ក្លែងបន្លំ​ប្រព្រឹត្ត ​នៅក្នុង​ឯកសារ​ដែល​ចេញ​ឲ្យ​ដោយ​រាជការ​សាធារណៈ ដើម្បី​ធ្វើការ​កត់សម្គាល់​សិទ្ធិ អត្តសញ្ញាណ ឬ​ឋានៈ ឬ​ដើម្បី​យល់ព្រម​ផ្តល់​ការអនុញ្ញាត ត្រូវ​ផ្តន្ទាទោស ​ដាក់​ពន្ធនាគារ​ពី​៥​ឆ្នាំ ទៅ​១០​ឆ្នាំ​។ រីឯមាត្រា ៦៣០. បទ​ប្រើប្រាស់​ឯកសារ​សាធារណៈ​ក្លែង នៃក្រមព្រហ្មទណ្ឌ​ដដែល បាន​ចែងថា ការប្រើប្រាស់​ឯកសារ​ក្លែង ​ដែលមាន​ក្នុង​មាត្រា​៦២៩ (​បទ​ក្លែងបន្លំ​ឯកសារ​សាធារណៈ​) នៃ​​ក្រម​នេះ ត្រូវ​ផ្តន្ទាទោស​ដាក់ពន្ធនាគារ​ពី ២​ឆ្នាំ ទៅ​៥​ឆ្នាំ និង​ពិន័យ​ជា​ប្រាក់​ពី​៤​លាន​រៀល ទៅ​១០​លាន​រៀល៕​