គេមិនដឹងថា លោកឧកញ៉ា ម៉ុង ឫទ្ធី សមាជិកព្រឹទ្ធសភា មកពីគណបក្សប្រជាជនកម្ពុជា ចង់សំដៅលើ​នរណា​ឡើយ។ ប៉ុន្តែការលើកឡើង នៅលើទំព័រហ្វេសប៊ុករបស់លោក ម៉ុង ឫទ្ធី នោះ ត្រូវបានមនុស្សភាគច្រើន ចាប់​អារម្មណ៍ និងគិតមមៃថា ជាការសំដៅទៅលើប្រធានក្រុមស្រាវជ្រាវ នៃរាជបណ្ឌិត្យសភាកម្ពុជា លោក សុខ ទូច ដែលកំពុងធ្វើការវិន្និច្ឆ័យ ទៅលើភាពស្រពិចស្រពិល នៃករណីផែនទីរវាងប្រទេសកម្ពុជា និងប្រទេសជិតខាង ដ៏ចម្រូងចម្រាស។ សម្រាប់លោក សុខ ទូច ខ្លួនឯង លោកបានយកខ្លួនមកដាក់ ហើយបានធ្វើការវាយប្រហារ ត្រឡប់ទៅ​លោក ម៉ុង ឫទ្ធី វិញ យ៉ាងចាស់ដៃ។

កាលពីរសៀលថ្ងៃទី១៤ ខែសីហា នៅលើទំព័រហ្វេសប៊ុក «ឯកឧត្ដមបណ្ឌិត ម៉ុង ឫទ្ធី H.E Oknha Mong Reththy» ដែលគេស្គាល់ថា ជារបស់លោកឧកញ៉ា ម៉ុង ឫទ្ធី នោះ បានបង្ហោះនូវរូបភាព នៃការ​ចូលរួម​ពិនិត្យ​ផែនទី របស់លោក ជាមួយនឹងក្រុមអ្នកស្រាវជ្រាវ នៃរាជបណ្ឌិតសភា ប្រមាណជា៦-៧សន្លឹក។ អមនឹង​រូប​ភាពនោះ លោក ម៉ុង ឫទ្ធី បានសរសេរថា៖ «ខ្ញុំទើបតែដឹងថា សម័យទំនើបនេះ សូម្បីតែលោកគ្រូក្រៀវជ្រូក ក៏ចេះដឹងរឿងផែនទីនឹងគេដែរ។ ធ្វើមុខ ដូចចេះមែនទែន នឹកស្មានថាគេមិនដឹងអ៊ីចឹង។»

លោក ម៉ុង ឫទ្ធី បានសរសេរធ្ងន់ៗ ទៅឲ្យ«លោកគ្រូក្រៀវជ្រូក»នោះ ទៀតថា៖ «គួរតែឈប់ទៅ ខ្មាសគេ ទុក​ឲ្យអ្នកចេះពិតប្រាកដ គេធ្វើទៅ។ បើស្រឡាញ់ជាតិ និងប្រជាជនពិតមែន សូមធ្វើអ្វីៗ ទៅតាមជំនាញ​របស់​ខ្លួន​ទៅ។»

តែអ្វីដែលគេកាន់តែជឿជាក់ថា ការលើកឡើងរបស់លោក ម៉ុង ឫទ្ធី បានបាញ់សំដៅលោក សុខ ទូច គឺនៅ​ក្នុងផ្នែកបញ្ចេញយោបល់ ខាងក្រោមរូបភាពទាំង៦-៧សន្លឹកនោះ លោក ម៉ុង ឫទ្ធី បានសរសេរពន្យល់ថា នៅពេលកំពុងផ្ទៀងផ្ទាត់ផែនទី បន្ទាប់ពីមានអ្នក ចូលទៅបកស្រាយរឿងផែនទីនេះរួច បែរជា​«លោកគ្រូ​ក្រៀវ​ជ្រូក»ឯណេះវិញ ​បានបាត់មាត់ស្ងាត់ឈឹង អត់មានពាក្យអីនិយាយបន្ត។ ហើយម្យ៉ាងទៀត រាល់ការអះអាង របស់ប្រិយមិត្តច្រើនរយនាក់ ដែលបានចាត់ទុក​ការលើក​ឡើង​នេះ ជាការសំដៅទៅលើលោក សុខ ទូច នោះ មិនត្រូវបានសមាជិកព្រឹទ្ធសភា លោក ម៉ុង ឫទ្ធី ធ្វើការបដិសេធ ឬ​បកស្រាយមកវិញឡើយ។

នៅចំពោះហេតុការណ៍ ដ៏រំជើបរំជួល ហើយត្រូវបានអ្នកប្រើប្រាស់បណ្ដាញសង្គម ចែករំលែកយ៉ាងសន្ធឹក​សន្ធាប់នោះ លោក សុខ ទូច ដែលទំនងជាឆួលចុងច្រមុះ បានសរសេរ នៅលើគណនីហ្វេសប៊ុក​ផ្ទាល់របស់​លោក តបមកលោក ម៉ុង ឫទ្ធី វិញ។ ប្រធានអ្នកស្រាវជ្រាវ បានកែពាក្យ​«លោកគ្រូក្រៀវជ្រូក»​របស់លោក ម៉ុង ឫទ្ធី មកជាពាក្យ«បណ្ឌិតក្រៀវជ្រូក»​វិញ​ម្ដង។ លោក សុខ ទូច បានសរសេរថា៖ «សូមជម្រាបឯកឧត្តម ម៉ុង ឫទ្ធី ខ្ញុំមិនមែនបណ្ឌិតក្រៀវជ្រូកទេ។ ខ្ញុំបាន​ទៅ​រៀន នៅប្រទេសរ៉ូស្សីុ ពីឆ្នាំ១៩៨៩ ដល់ឆ្នាំ១៩៩៩ មាន​សញ្ញាប័ត្រ​​ត្រឹមត្រូវ។ តែបេីឯកឧត្តម ជាបណ្ឌិត​ក្រៀវ​ជ្រូក សូមកុំមកប្រដូចគេ ព្រេាះនេាះជារឿងរបស់​ឯកឧត្តម​ទេ។»។

មកដល់ម៉ោងនេះ ការឆ្លើយតបរបស់លោក សុខ ទូច ទទួលបានការចែករំលែក ច្រើនជាង១០០០ដង​ហើយ។ យ៉ាងហោចណាស់ ក៏ការលើកឡើង ពី«បណ្ឌិតក្រៀវជ្រូក»របស់លោក សុខ ទូច នេះ ក្លាយជាប្រតិកម្មមួយ ដែលទទួលបានផ្លែផ្កា យ៉ាងត្រចះ​ត្រចង់។ ព្រោះលោក ម៉ុង ឫទ្ធី បានលប់ការបង្ហោះលើកមុនចោល មុននឹង​សរសេរ​តប​មក​វិញ​ថា៖ «សុំកុំនិយាយ​បំផ្លើស! ការពិតខ្ញុំមិនមែនថាឲ្យបណ្ឌិត សុខ ទូច ទេ។ គាត់ គឺជាអ្នក​រៀន​សូត្រ ចេះ​ដឹង​ពិត​ប្រាកដ។»៕