ក្រុមសមាជិកព្រឹទ្ធសភាទាំង៩រូប មកពីគណបក្សសមរង្ស៊ី បានចេញសេចក្ដីថ្លែងការណ៍មួយ នៅប៉ុន្មាន​ម៉ោង​ក្រោយ​ការចាប់ខ្លួនលោក ហុង សុខហួរ សមាជិកព្រឹទ្ធសភា មកពីគណបក្សសមរង្ស៊ី និងជាអ្នក​ជំនាញខាង​ព្រំដែន របស់គណបក្សសង្គ្រោះជាតិ ដោយបានហៅការចាប់ខ្លួននេះ ថាជាការមិនបានអនុវត្តន៍ ទៅតាម​នីតិវិធី​នៃច្បាប់ ពីសំណាក់កងកម្លាំងអាជ្ញាធរ។

សេចក្ដីថ្លែងការណ៍ ចុះថ្ងៃទី១៥ ខែសីហានេះ បានសរសេរថា សមត្ថកិច្ចរបស់រដ្ឋាភិបាល បានចាប់ខ្លួន​សមាជិក​ព្រឹទ្ធសភាគណបក្ស សម រង្ស៊ី ហុង សុខហួរ ទាំងមិនទាន់បានដកអភ័យឯកសិទ្ធិ ពីរូបលោកនៅឡើយ។ សេចក្ដី​ថ្លែងការណ៍ បានស្រង់សម្ដីអ្នកនាំពាក្យព្រឹទ្ធសភា មកសរសេរពន្យល់ទៀតថា ព្រឹទ្ធសភា ក៏នៅមិនទាន់ទទួល​បានលិខិតណាមួយ ស្នើសុំព្រឹទ្ធសភា បើកកិច្ចប្រជុំដើម្បីដកអភ័យឯកសិទ្ធិ របស់លោក ហុង សុខហួរ នៅ​ឡើយ។

«តាមស្មារតីរដ្ឋធម្មនុញ្ញ និងបទបញ្ជាផ្ទៃក្នុង របស់ព្រឹទ្ធសភា សមត្ថកិច្ចត្រូវធ្វើរបាយការណ៍ ជូនព្រឹទ្ធសភា ឬ​គណកម្មធិកាអចិន្ត្រៃយ៍ព្រឹទ្ធសភា ជាបន្ទាន់ដើម្បីសម្រេច»។ នេះជាអ្វី ដែលគេបានអាន នៅលើសេចក្ដីថ្លែង​ការណ៍នោះ នៅក្នុងវាក្យខណ្ឌជាបន្តបន្ទាប់។

លោកនាយករដ្ឋមន្ត្រី ហ៊ុន សែន បានប្រកាសកាលពីថ្ងៃទី១៣ ខែសីហា បញ្ជាឲ្យកងកម្លាំងសមត្ថកិច្ច តាម​ស្វែង​រកចាប់ខ្លួន លោក ហុង សុខហួរ ឲ្យយកមកផ្តន្ទាទោស ដោយចោទសមាជិកព្រឹទ្ធសភា មកពី​គណបក្ស​ប្រឆាំង​រូបនេះ ពីបទ«ក្បត់ជាតិ»​ បន្ទាប់ពីលោក សុខហួរ បានធ្វើអត្ថាធិប្បាយ ពីសន្ធិសញ្ញា កម្ពុជា-វៀតណាម នាឆ្នាំ​១៩៧៩ ទាក់ទងនឹងឃ្លាមួយ ដែលលោក ហ៊ុន សែន បានចាត់ទុកថា ជាការក្លែងបន្លំមួយ មានចេតនា​បង្ក​ចល្លាចល។ ការធ្វើអត្ថាធិប្បាយ ថតជាវីដេអូ ដែលត្រូវបានបង្ហោះ នៅលើទំព័រហ្វេសប៊ុករបស់លោក សម រង្ស៊ី ប្រធានគណបក្សសង្គ្រោះជាតិនោះ ត្រូវបានលោកនាយករដ្ឋមន្ត្រីអះអាងថា ជាការប្រព្រឹទ្ធបទល្មើស​ជាក់ស្ដែង ហើយដែលអនុញ្ញាតឲ្យអាជ្ញាធរ​ ធ្វើការចាប់ខ្លួន​សមាជិកព្រឹទ្ធសភារូបនេះ ដោយមិនចាំបាច់​ មានការដកអភ័យ​ឯកសិទ្ធិ​ជាមុន។

កាលពីយប់ថ្ងៃទី១៤ ខែសីហា ឆ្នាំ២០១៥នេះ ទំព័រហ្វេសប៊ុករបស់លោក សម រង្ស៊ី បានបង្ហោះកូនលិខិតមួយ របស់លោក ហុង សុខហួរ អះអាងពីការចូលខ្លួន មកបំភ្លឺនៅមុខសមត្ថកិច្ច នៅថ្ងៃទី១៧ ខាងមុខ។ ប៉ុន្តែ​សម្រាប់​ក្រុមសមាជិកព្រឹទ្ធសភា មកពីគណបក្សសម រង្ស៊ី វិញ បានចាត់ទុកការចាប់ខ្លួន នៅព្រឹកថ្ងៃទី១៥ ខែសីហា នៅ​មុនកាលបរិច្ឆេទ ដែលសាមីខ្លួនកំណត់ចូលបំភ្លឺនេះ ថាជាការអនុវត្តនីតិវិធី របស់អាជ្ញាធរគ្រប់គ្រង​ដោយ​រដ្ឋាភិបាល ដែលមិនអនុលោមតាមគតិច្បាប់។

នៅមិនទាន់អាចស្វែងរកប្រតិកម្ម ពីអ្នកនាំពាក្យនគរបាលជាតិ លោក គៀត ចន្ទថារិទ្ធ បាននៅឡើយ នា​ពេល​នេះ ជុំវិញ​ការចោទប្រកាន់ខាងលើ៕