ក្នុងឆ្នាំ២០១២កន្លងមកនេះ ការប្រើប្រព័ន្ធយុត្តិធម៌ និងច្បាប់ទម្លាប់ ដើម្បីដោះស្រាយជម្លោះ មានការកើនឡើង គួរអោយ​មានមោទនភាព ប្រៀបនឹងអំពើរហឹង្សា ដែលធ្លាប់មានកន្លងមក។ តែទន្ទឹមនឹងនេះ ប្រព័ន្ធតុលាការ ក៏ត្រូវបានគេមើល​ឃើញថា បានក្លាយជាមធ្យោបាយយ៉ាងស្រួចស្រាវមួយ របស់ពួកអ្នកមានអំណាច និងអ្នកមានប្រាក់ ក្នុងការបង្ក្រាបទៅ​លើ​អ្នកទន់ខ្សោយផងដែរ។

រូបភាពកាត់ត បង្ហាញពីបណ្ដាជនមួយចំនួន ដែលកំពុងលង់ខ្លួន នៅក្នុងប្រព័ន្ធតុលាការកម្ពុជា។

សង្គមស៊ីវិល អង្គការជាតិ និងអន្តជាតិជាច្រើន បានលើកឡើងថា ក្នុង«បរិបទកម្ពុជា»សព្វថ្ងៃ អ្នកមានអំណាច អ្នកមាន​ទំនាក់ទំនងល្អ ជាមួយអ្នកមានអំណាច និងអ្នកមានប្រាក់ នឹងទទួលបាននូវ «ភាពលម្អៀង»ពីប្រព័ន្ធតុលាការ បើទោះ​ជា​អ្នកនោះបានរំលោភសិទិ្ធអ្នកដទៃ យ៉ាងខ្លាំងក្លាបែបណាក៏ដោយ។ អ្នកបញ្ចេញសម្លេង ដើម្បីការពារសិទ្ធិ​ស្របច្បាប់​របស់​ខ្លួន ដើម្បីឧត្តមគតិ និងបុព្វហេតុរួម ប្រឆាំងនឹងការគាបសង្កត់ បំផ្លិចបំផ្លាញ ឬអំពើរអយុត្តិធម៌ទាំងឡាយនោះ បែរជា​ត្រូវ​រងត្រឡប់មកវិញ នូវការគាបសង្កត់ជារឿយៗ ឬបំបិទសម្លេងចោលតែម្ដង ពីសំណាក់ប្រព័ន្ធតុលាការនេះ។

និយាយជារួម អ្នកវិភាគបានកត់សម្គាល់ថា ប្រព័ន្ធយុត្តិធម៌របស់កម្ពុជា ក្នុងឆ្នាំ២០១២នេះ បានបោះជំហានថយក្រោយ គួរឲ្យព្រួយបារម្ភ ដោយសារតែអ្នកវិភាគទាំងនោះ បានមើលឃើញ ពីការកាត់សេចក្ដី មានភាពមិនស្មើគ្នា រវាងជន​រង​គ្រោះ និងជនល្មើស ឬរវាងអ្នកធ្វើការដើម្បីបុព្វហេតុរួម និងអ្នកធ្វើការដើម្បីផលប្រយោជន៍បុគ្គល។ល។ តុលាការកម្ពុជា តែង​កាត់សេចក្ដីដោយប្រើស្ថានទម្ងន់ទោស តែទៅលើជនទន់ខ្សោយ គ្មានអំណាច គ្មានបក្សពួក ឬក្រុមអ្នក​នយោបាយ​ដែល​គ្មានអំណាច។ តែផ្ទុយទៅវិញ តុលាការ​មានវិធីសព្វគ្រប់បែបយ៉ាង ទោះមានចែងក្នុងច្បាប់ក្ដី ឬមិនមានក្ដី ដើម្បី​បន្ធូរបន្ថយ​ទោស ដល់ឧក្រិដ្ឋជនដែលជាក្រុមមន្ត្រី ឬសាច់ញាតិរបស់បុគ្គលមានអំណាចណាមួយ។

ខាងក្រោមនេះ ជាការរំលឹកឡើងវិញ ទៅលើករណីមួយចំនួន ដែលបង្ហាញពី«យុគខ្មៅ» ក្នុងឆ្នាំ២០១២ នៃប្រព័ន្ធ​តុលាការ​កម្ពុជា៖

១. ការសម្លាប់ក្រៅច្បាប់ និងសំនុំរឿងឃាតកម្ម

- ថ្ងៃទី២៦ ខែមេសា លោក ឈុត វុទ្ធី សកម្មជននាំមុខ ក្នុងការការពារព្រៃឈើខ្មែរ ត្រូវបានបាញ់សម្លាប់ នៅខណៈ​លោកចុះស៊ើបអង្កេត ពីការកាប់បំផ្លាញធនធានធម្មជាតិ ក្នុងខេត្តកោះកុង។ ឃាតករ ដែលបានសម្លាប់លោក ត្រូវបាន​បាញ់សម្លាប់«ដោយរាកៃ»បន្ទាប់មក ដោយជនម្នាក់ទៀតឈ្មោះរ៉ាន់ បូរ័ត្ន។ តុលាការខេត្តកោះកុង បានសម្រេច«ព្យួរ»​ទោសរបស់ជនសង្ស័យ រ៉ាន់ បូរ័ត្ន ដែលនៅសល់១៨ខែ និង«ដោះលែង»អោយមានសេរីភាព បន្ទាប់ពីបាន​ឃុំឃាំង​ជននេះ អស់រយះពេល៦ខែកន្លងមក។ ដោយឡែកចំពោះឃាតកម្ម លើរូបលោកឈុត វុទ្ធី តុលាការបានបិតសំនុំរឿង ដោយហេតុ​«ផុតបណ្តឹងអាជ្ញា» និងពុំមានការពន្យល់បំភ្លឺអ្វីបន្ថែមឡើយ។

ដូច្នេះគេមិនអាចដឹងបាន ពីការពិត ដែលជាមូលហេតុឈានទៅដល់ ការបាញ់សម្លាប់សកម្មជនបរិស្ថានរូបនេះទេ។ រីឯ​សង្គមស៊ីវិល ដែលបានធ្វើការនៅលើសំនុំរឿង បានបរិហាពីការសម្រេចសាលក្រមនេះ ថាមាន«ឆន្ទះកាត់ក្ដីលម្អៀង» ដោយលើកបញ្ជាក់​ថា «ដោយសារតែ ជនរងគ្រោះ បានដឹងពីបទល្មើសព្រៃឈើ ដែលប្រព្រឹត្តដោយឈ្មួញមានលុយ និង​គាំទ្រដោយអ្នកមាន​អំណាច»។

- ថ្ងៃទី១៧ ខែឧសភា ក្នុងភូមិប្រមា នៅឃុំកំពង់ដំរី ស្រុកឆ្លូង ខេត្តក្រចេះ ក្នុងករណីក្មេងស្រីឈ្មោះ ហេង ចន្ថា អាយុ ១៤ឆ្នាំ ដែលបានស្លាប់ដោយគ្រាប់កាំភ្លើងខ្ទាតត្រូវ របស់មន្ត្រីអនុវត្តច្បាប់។ តែគេពុំដែលឃើញមានការទទួល​ខុសត្រូវ របស់មន្ត្រីប្រព្រឹត្តិកំហុសណាម្នាក់ ត្រូវបាននាំយកទៅកាត់ទោស នៅចំពោះមុខច្បាប់ឡើយ។ រីឯព្រះរាជអាជ្ញា​ទៀត​សោធ ក៏ពុំបានអនុវត្តតាមតួនាទីរបស់ខ្លួន ជាដើមបណ្តឹងអាជ្ញា ក្នុងការស្វែងរកយុត្តិធម៌ ជូនជនរងគ្រោះ ដែលច្បាប់បាន​ផ្តល់ឲ្យ​នោះផងទេ។

- ថ្ងៃទី២៧ ខែធ្នូ ឆ្នាំ២០១២ ជនសង្ស័យ ប៊ន សំណាង និងសុខ សំអឿន ត្រូវសាលាឧទ្ធណ៍បានប្រកាសសាលដីការ ដាក់ទោសម្នាក់២០ឆ្នាំជាថ្មីទៀត បន្ទាប់ពីបានបានបើកធ្វើសវនាការឡើងវិញ កាលពីថ្ងៃទី៧ ខែវិច្ឆិកាកន្លងមក ក្នុងសំណុំ​រឿងបាញ់សម្លាប់ លោក ជា វិជ្ជា។ ដើមបណ្ដឹង និងសកម្មជនសិទ្ធិមនុស្ស បានរកឃើញថា ជនសង្ស័យទាំងពីរ ជាជន​សង្ស័យសិប្បនិមិត្ត ដែលអាជ្ញាធរចាប់អោយមកទទួលកំហុស ដោយសារតែ«រកជនដៃដល់ពិតប្រាកដ»មិនឃើញ ឬមិន​ចង់រក។ ពួកគេថែមទាំងបរហារ ពីចៅក្រម ដែលប្រើឆន្ទានុសិទ្ទិរបស់ខ្លួន ដោយមិនមានការស៊ើបអង្កេតបន្ថែម ធ្វើអោយ​សំនុំរឿង នៅតែគ្មានអ្វីប្លែកពីមុន និងមានចំណុចចន្លោះប្រហោងដដែល។

- ករណីឃាតកម្មលើអ្នកកាសែត«វីរជនខ្មែរ»ម្នាក់ឈ្មោះ ហង្ស សេរីឧត្តម នៅខេត្តរតនៈគីរី កាលពីនៅថ្ងៃទី១១ ខែកញ្ញា ដែលរហូតមកដល់ពេលនេះ តុលាការនៅមិនទាន់បាន រកយុត្តិធម៌អោយជនរងគ្រោះ បាន​នៅឡើយ។ មានមតិ​ជាច្រើន ដែលបានផ្ដោតការសង្ស័យទៅលើ មន្ត្រីកងរាជអាវុធហត្ថខេត្ត ដែលរកស៊ី​ឈើ​ខុសច្បាប់ ហើយថាមានជម្លោះ​ជាមួយជនរងគ្រោះ។

២. ប្រើប្រាស់ប្រព័ន្ធតុលាការ ដើម្បីគំរាមកំហែងអ្នកសារព័ត៌មាន សកម្មជនសិទ្ធិមនុស្ស

- ថ្ងៃទី០១ ខែតុលា ជម្លោះដីធ្លីនៅក្នុងភូមិប្រមា នៅឃុំកំពង់ដំរី ស្រុកឆ្លូង ខេត្តក្រចេះ បានធ្វើឲ្យនាយកវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ លោកម៉ម សូណង់ដូ ត្រូវតុលាការកាត់ទោសដាក់ពន្ធនាគារ ២០ឆ្នាំ និងពិន័យ​ជាប្រាក់ ១០លានរៀល ក្រោមបទចោទមួយចំនួន ទាក់ទងនឹងការបង្កើតតំបន់អបគមន៍ ខណៈពេលកើតហេតុ សាមីខ្លួន​កំពុងស្ថិតនៅឯបរទេស។ សហគមន៍ជាតិ និងអន្តរជាតិ ក្នុងនោះមានទាំងប្រធានាធិបតីអាមេរិកផង បានថ្កោលទោស ការផ្ដន្ទាទោសនេះ ថាជារឿងនយោបាយ និងបំបិទសិទ្ធិនៃការនិយាយស្ដីនៅក្នុងប្រទេសកម្ពុជា។

- ថ្ងៃ២៤ ខែសីហា ក្នុងជម្លោះដីធ្លីនៅភូមិប្រមានេះដដែល  លោកចាន់ សុវ៉េត មន្ត្រីស៊ើបអង្កេត នៃអង្គការ​អាដហុក ត្រូវបានកោះអោយចូលខ្លួនមកតុលាការ ដើម្បីសួរចម្លើយពីបទទាក់ទង នឹងការផ្តល់ជំនួយអោយដល់ «ចារី» ប្រព្រឹត្តនៅ​រាជធានីភ្នំពេញ កាលពីខែឧសភាកន្លងមកនេះ។ លោក ចាន់ សុវ៉េត ត្រូវបានសង្ស័យ និងចោទប្រកាន់ កាល​ពីថ្ងៃទី៧ ខែសីហា ថាមានជាប់ទាក់ទង នឹងការផ្តល់លុយ៣០ម៉ឺនរៀល និងការស្នាក់នៅ២យប់​ ដល់ក្រុមអ្នកតវ៉ាដីធ្លី នៅភូមិប្រមា ដែលនាយករដ្ឋមន្ត្រីលោកហ៊ុន សែន ចោទក្រុមនេះ ថាមានបំណងបង្កើតតំបន់អបគមន៍។ ការកោះហៅនេះ មិនមាន​ការឃុំខ្លួនទេ ក៏ប៉ុន្តែបានដាក់លោកចាន់ សុវ៉េត ឲ្យស្ថិតនៅក្រោមការត្រួតពិនិត្យរបស់តុលាការ ។

- ថ្ងៃទី២៧ ខែកញ្ញា លោក រ៉ុង ឈុន ប្រធានសហភាពសហជីពកម្ពុជា និងជាប្រធានគ្រូបង្រៀនឯករាជ្យ ត្រូវបាន​កោះហៅ ឲ្យចូលទៅកាន់អយ្យការអមសាលាដំបូងខេត្តកណ្តាល វេលាម៉ោង៩ព្រឹក ដើម្បីសាកសួរពីដំណើររឿង ដែល​អគ្គនាយកនៃសហគ្រាស តៃយ៉ាង លោក ជាក់ លី (Jack Liu) បានប្តឹងលោក ពីបទ«ញុះញុង»ឲ្យកម្មករធ្វើកូដកម្ម និង​«បទបរិហាកេរ្តិ៍»ជាសាធារណៈ។

- ថ្ងៃទី១០ ខែតុលា តុលាការខេត្តរតនគីរី បានកោះហៅទៅសាកសួរ លោក ប៉ែន ប៊ុណ្ណា លោក ឆាយ ធី ជាមន្ត្រី​សម្របសម្រួល និងជាមន្ត្រីស៊ើបអង្កេត របស់អង្គការអាដហុក ប្រចាំខេត្តរតនគីរី រួមនិងលោក រដ្ឋា វិសាល ជាអ្នកយក​ព័ត៌មានឲ្យវិទ្យុអាស៊ីសេរីផង។ ការកោះហៅនេះ ត្រូវបានធ្វើឡើងនៅក្រោយពេល ដែលមន្ត្រីសិទ្ធិមនុស្ស​ទាំងនេះ បាន​ជួយក្រុមជនជាតិដើមភាគតិចទំពូន ក្នុងស្រុកលំផាត់ ដើម្បីតវ៉ារឿងទំនាស់ដីធ្លីមួយកន្លែង ដែលមាន​ការ​ចោទប្រកាន់ថា ក្រុមហ៊ុនឌីអឹមគ្រុប បានរំលោភយក ក្នុងប៉ុន្មានឆ្នាំថ្មីៗនេះ។

- ថ្ងៃទី៨ ខែតុលា ក្នុងខេត្តរតនគិរីដដែល ស្ថាប័នអយ្យការតុលាការខេត្តរតនគីរី បានកោះលោក អ៊ូ វីរៈ ប្រធាន​មជ្ឈមណ្ឌលសិទ្ធិមនុស្សកម្ពុជា ឲ្យចូលទៅបំភ្លឺ នៅក្នុងដំណើររឿង«ញុះញង់» ឲ្យប្រព្រឹត្តបទឧក្រិដ្ឋបានសម្រេច​ ប៉ុន្តែ​មិនមានការឃាត់ខ្លួនឡើយ។

- ​ថ្ងៃ​ទី​២៤ ខែ​ធ្នូ លោក ប៊ុត រស្មីគង្គា អ្នកយកព័ត៌មានឲ្យកាសែតភ្នំពេញប៉ុស្តិ៍ ក៏ត្រូវបានតុលាការយោធាកោះហៅ ដើម្បីសាកសួរ ពាក់ព័ន្ឋនឹងការចុះផ្សាយអត្តបទរបស់លោក រាយការណ៍ពីមន្ត្រីយោធាជាន់ខ្ពស់ម្នាក់ ដែលបានរង​ការ​ចោទប្រកាន់ ពីសំណាក់មន្ត្រីយោធាមួយចំនួនថា បានយកដីទៅលក់ឲ្យក្រុមហ៊ុនបរទេស។ ការហៅទៅសាកសួរនេះ ទោះជាធ្វើនៅក្នុង«នាមជាសាក្សី» ប៉ុន្តែបានប៉ះពាល់ ទៅលើច្បាប់ចែងពីរបបសារពត៌មាន ដែលអ្នកកាសែតមិន​ត្រូវ​បាន​នរណាម្នាក់គម្រាម ដើម្បីបង្ហាញពីម្ចាស់ប្រភពនោះទេ។

៣. ការដោះលែងជនល្មើស ក្នុងករណីជាក់ស្ដែង

- ថ្ងៃទី១៨ ខែធ្នួ តុលាការខេត្តសា្វយរៀង បានសម្រេចទម្លាក់ ការចោទប្រកាន់លោក ឈូក បណ្ឌិត អតីតអភិបាល​ក្រុងបាវិត។ តុលាការនេះ ធ្លាប់បានរកឃើញថា លោកឈូក បណ្ឌិត បានបាញ់«ដោយអចេតនា» ឲ្យរបួសកម្មការិនី​បីនាក់ នៅតំបន់សេដ្ឋកិច្ចពិសេសក្រុងបាវិត កាលពីថ្ងៃទី២០ ខែកុម្ភៈ ខណៈពេលកូដកម្មទាមទារ លក្ខខ័ណ្ឌការងារ​មួយចំនួន ពី​សំណាក់កម្មករ។ តែផ្ទុយទៅវិញ ការទម្លាក់ចោលការចោទប្រកាន់នេះ ដោយតុលាការសម្អាងថា «គ្មាន​ភស្ដុតាង គ្រប់គ្រាន់​ដើម្បីចោទប្រកាន់»។

- ថ្ងៃទី១០ ខែកក្កដា តុលាការខេត្តកោះកុង បានដោះលែងលោក ប៊ុន សុខា ជំនួយការផ្ទាល់របស់នាយករដ្ឋមន្ត្រី និងកូនចៅពីរនាក់ទៀត ក្រោយពីអ្នកទាំងបីបានជាប់ពន្ធនាគារត្រឹមតែជាងពីរខែប៉ុណ្ណោះ។ លោក ប៊ុន សុខា អតីត​នាយរងសេនាធិការ នៃអង្គភាពអង្គរក្សនាយករដ្ឋមន្ត្រី ត្រូវបានប្រព័ន្ធវីដេអូសុវត្ថិភាព ថតជាប់ពីការវាយដំ លើបុរស​បួន​នាក់នៅសណ្ឋាគារកោះកុង កាលពីខែមេសា។ បើពិនិត្យទៅលើខ្សែរវីដែអូនេះ អ្នក«ប្រដាល់ក្រៅវេទិការ»ទាំងបី ត្រូវ​មាន​ទោសព្រហ្មទណ្ឌ និងត្រូវផ្ដន្ទាទោសជាប់ពន្ធនាគារបីឆ្នាំ។

៤. សិទ្ធិដីធ្លី និងការបណ្តេញចេញដោយហិង្សា

- ថ្ងៃ​ទី​២៤ ខែឧសភា អ្នក​តវ៉ាដីធ្លី នៅតំបន់បឹងកក់ចំនួន១៣​នាក់ ត្រូវបានតុលាការកាត់ទោស ឲ្យ​ជាប់​ពន្ធនាគារ​ម្នាក់ៗ​ពី​១​ឆ្នាំ ទៅ​២​ឆ្នាំ​កន្លះ ក្រោម​បទ​កាន់កាប់​ដី​ខុស​ច្បាប់ និង​ប្រឆាំង​អាជ្ញាធរ​សាធារណៈ។

អាជ្ញាធរបានចាប់ខ្លួន អ្នកទាំង១៣នាក់នេះ នៅថ្ងៃ២២ខែឧសភា ក្នុងខណៈអ្នកទាំងនេះព្យាយាមសង់ផ្ទះ ដែលក្រុមហ៊ុន​អភិវឌ្ឍន៍វាយកម្ទេចចោល នៅលើដីខ្លួនឯងឡើងវិញ។ កន្លងទៅតែពីរថ្ងៃប៉ុណ្ណោះ អ្នកទាំង១៣នាក់ បានទទួល​ការ​កាត់​ទោស យ៉ាង​តក់​ក្រហល់មួយ ពីសាលាដំបូងរាជធានីភ្នំពេញ បើសូម្បីឱកាសដើម្បីរកមេធាវីការពារក្ដី អោយខ្លួនគេ​ក៏គ្មាន​ផង។ នៅ​ថ្ងៃ​ដដែល​នោះ កម្លាំង​សមត្ថកិច្ច​ក៏​បាន​ចាប់​អ្នក​បឹង​កក់  ២​នាក់​ទៀត បញ្ជូន​ទៅ​ពន្ធនាគារ​ព្រៃ​ស​ដែរ ខណៈ​ដែល​ពួក​គេ​កំពុង​តវ៉ា​នៅ​ខាង​មុខ​តុលាការ គាំទ្រដល់អ្នកទាំង១៣នាក់។ ក៏ប៉ុន្តែ​អ្នក​ទាំង ២​នាក់​នេះ ត្រូវ​បាន​ដោះ​លែង​ឲ្យ​នៅ​ក្រៅឃុំ​បណ្ដោះ​អាសន្ន​វិញ កាល​ពី​ថ្ងៃ​ទី​១៥ ខែមិថុនា។ បន្ទាប់មកទៀត នៅថ្ងៃទី២៧ ខែមិថុនា សាលាឧទ្ទរណ៍បាន​សម្រេច​បន្ថយទោស មកត្រឹមទោសដែលអ្នកភូមិទាំង១៣នាក់ ជាប់រួចហើយក្នុងពន្ធនាគារកន្លងមកប៉ុណ្ណោះ បានន័យថា​«សម្រេចដោះលែង» អ្នកទាំងនេះ នៅក្រោយប្រកាសសាលក្រមរួច។

- ថ្ងៃទី២៧ ខែធ្នូ តុលាការសាលាដំបូងរាជធានីភ្នំពេញ បានប្រកាសសាលក្រម ផ្តន្ទាទោសអ្នកស្រី យ៉ោម បុប្ផា សកម្មជនលេចធ្លោ ក្នុងជម្លោះតវ៉ាដីធ្លីនៅតំបន់បឹងកក់ ឲ្យជាប់ពន្ធនាគារ៣ឆ្នាំ ពីបទ«ប្រើអំពើហឹង្សាដោយចេតនា»។ អ្នកស្រី ត្រូវបានចាប់ឃាត់ខ្លួន កាលពីថ្ងៃទី៤ ខែកញ្ញា កន្លងមក ខណៈដែលអាជ្ញាធរបានរកឃើញថា ក្រុមគ្រួសារ​របស់​អ្នកស្រីមានទំនាស់ វាយទៅលើបុរស ជាអ្នករត់ម៉ូតូឌុបពីរនាក់ ដែលនៅជាប់ភូមិផងរបងជាមួយ។

- ថ្ងៃទី២៧ ខែធ្នូ នេះដដែល សកម្មជនម្នាក់ទៀត ក្នុងជម្លោះតវ៉ាដីធ្លីនៅតំបន់បូរីកីឡា អ្នកស្រី ទឹម សាក់មុនី ក៏ត្រូវ​តុលាការផ្ដន្ទាទោស ដាក់ពន្ធនាគារចំនួនប្រាំមួយខែដែរ ក្រោមបទញុះញង់ឲ្យមានបទឧក្រិដ្ឋ ប្ដឹងដោយក្រុមហ៊ុន​ផានអ៊ីម៉ិច។ ការផ្តន្ទាទោសនេះ ត្រូវបានតុលាការ គិតចាប់តាំងពីថ្ងៃចាប់ខ្លួនមក និង«ព្យួរ»ទោសដែលនៅសល់ ពោល គឺអ្នកស្រីត្រូវបាន «ដោះលែង» អោយមានសេរីភាព បន្ទាប់ពីសាលក្រមនេះទៅ។

ទោះបីមានការបន្ធូបន្ថយទោសបែបនេះខ្លះក៏ដោយ ក៏ក្រុមអ្នកឃ្លាំមើលសិទ្ធមនុស្ស នៅតែសម្ដែងការសោកស្តាយ ដោយ​ការចាប់ខ្លួនដាក់ទោសទាំងនេះ បានធ្វើឡើង នៅក្រោមហេតុផល ពីជម្លោះតវ៉ាដីធ្លី ដែលកើតឡើងយ៉ាងរ៉ាំរ៉ៃ ក្នុងប្រទេស​កម្ពុជា ហើយបានគម្រាមទៅសកម្មជនផ្សេង លែងហ៊ានធ្វើការតវ៉ា ការពារសិទ្ធខ្លួនឯងតទៅទៀត។

ជារួមមក ក្នុងឆ្នាំ២០១២នេះ ប្រព័ន្ធតុលាការរបស់កម្ពុជា បានធ្វើអោយអ្នកវិភាគមើលឃើញកាន់តែច្បាស់ឡើងៗ ថា​មិន​មានលក្ខណៈគ្រប់គ្រាន់ នឹងអាចរកយុត្តិធម៌ជូនពលរដ្ឋទន់ខ្សោយ ជាពិសេសអ្នកដែលគ្មានអំណាច នោះបានឡើយ។

អ្វីដែលបានរៀបរាប់មកខ្លះៗ ខាងលើ ធ្វើអោយមានការវាយតម្លៃថា សង្គមកម្ពុជាសព្វថ្ងៃ កំពុងឈានទៅរកការបែងចែក ជាពីរ​ក្រុម៖ ក្រុមទីមួយ«ពលរដ្ឋសាមញ្ញ» ជាក្រុមមនុស្សដែលនៅ«ក្រោមច្បាប់» និងក្រុមមួយទៀត«ពលរដ្ឋវិសាមញ្ញ» ដែល​ជាក្រុមមនុស្សនៅពី«លើច្បាប់»។ តែអ្នកវិភាគ នៅតែមានការសង្ស័យយ៉ាងខ្លាំងមួយដែរ ទៅលើ«ភាព​គ្មាន​លំនឹង​»​របស់ចៅក្រម ដោយហេតុថា ច្បាប់ស្ដីពីការរៀបចំ និងការប្រព្រឹត្ត ទៅនៃប្រព័ន្ធតុលាការ ច្បាប់ស្ដីពី​លក្ខន្តិកៈចៅក្រម និង​ព្រះរាជអាជ្ញា និងច្បាប់ស្ដីពីវិសោធនកម្មច្បាប់ ឧត្ដមក្រុមប្រឹក្សានៃអង្គចៅក្រម មិនទាន់មានរូបរាង​នៅឡើយ៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី៣០ ខែធ្នូ ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ