ករណីឃាតកម្មមួយនេះ កើតឡើង​នៅកែងផ្លូវ២០១១ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ បង្ក​ឡើងពីជនមិនស្គាល់មុខ ជាជនដៃដល់ម្នាក់ បានប្រើពូថៅកាប់ ទៅលើជនរងគ្រោះ ចំក្បាល​បណ្តាលឲ្យ​ស្លាប់​ភ្លាមៗ នៅកន្លែងកើតហេតុ។ មន្រ្តីសមត្ថកិច្ច សង្កាត់ភ្នំពេញថ្មី បានឲ្យដឹងថា ជនសង្ស័យមានគ្នាពីរនាក់ ទំនង​ជាស្គាល់ ឬតាមដានជនរងគ្រោះ រហូតដល់ម៉ោងប្រមាណ ១៩ និង ៤០នាទី យប់ថ្ងៃទី១២ ខែសីហា ទើប​បាន​ធ្វើ​សកម្មភាព។

តាមការសម្ភាស ជាមួយមេប៉ុស្តិ៍សង្កាត់ភ្នំពេញថ្មី លោក កែវ សទ្ធោតន៍ ប្រាប់ទស្សនាវដ្តីមនោរម្យ.អាំងហ្វូថា ខាងសមត្ថកិច្ចសង្កាត់ និងខណ្ឌ នៅមិនទាន់ស្គាល់ពី​អត្តសញ្ញាណ របស់ជនរងគ្រោះនៅឡើយ។ សាកសព​ដែលស្លាប់ ភេទប្រុស អាយុប្រមាណជាង៣០ឆ្នាំ ស្លាប់ក្នុងសម្លៀកបំពាក់ខោពណ៍ ស អាវពណ៍ផ្ទៃមេឃ និង​ពាក់​ស្បែកជើងប៉ាតា​ ពណ៍លាយខៀវ។ លោកមេប៉ុស្ដិ៍ បានថ្លែងឡើងថា៖ «សាកសពនៅមិនទាន់ ទទួលបាន​អត្តសញ្ញាណ​ទេ»។

ប្រភពពីកន្លែងកើតហេតុ បានបញ្ជាក់ថា ជនរងគ្រោះត្រូវគេសម្លាប់ ត្រូវរបួសធ្ងន់នៅត្រង់ក្បាល រហូតស្លាប់​ភ្លាមៗ នៅកន្លែងកើតហេតុ។ ប្រភពនោះ បានបន្តទៀតថា សមត្ថកិច្ចបានរកឃើញពូថៅ ដែលជនសង្ស័យធ្វើ​សកម្មភាព។ រហូតមកទល់ពេលនេះ មេប៉ុស្តិ៍សង្កាត់ភ្នំពេញថ្មីបានបញ្ជាក់ថា សាកសពនៅតម្កល់ទុក ជា​បណ្តោះ​អាសន្នក្នុងវត្តទឹកថ្លា ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ មិនទាន់មាន​សាច់ញាតិ​ក្រុម​គ្រួសារ ទៅទទួលធ្វើបុណ្យនៅឡើយ៕