ត្រឹមតែ ប្រវែងផ្លូវជាតិ ៤៦ គីឡូម៉ែត្រប៉ុណ្ណោះ តែមានទីតាំងកុងត្រួល ដល់ទៅ៣កន្លែងទៅហើយ។ ទាំងនេះ​ធ្វើឲ្យ​អ្នករកទទួលទាន​ដឹកទំនិញ និងជាពិសេសពលរដ្ឋ ដែលរស់នៅ តាមបណ្ដាយផ្លូវជាតិលេខ៥ សម្ដែងការ​ធុញ​ទ្រាន់ ក្ដៅក្រហាយ និងបារម្ភពីការទារប្រាក់ ក្រោមមូលហេតុផ្សេងៗ មិនចេះចប់។

ឆ្លើយតបនឹងការរអ៊ូរទាំ របស់អ្នករស់នៅតាមផ្លូវ ដែលមានការឃាត់ស្ទាក់ យ៉ាងរដឹកខាងលើ លោក ហ៊ុយ សុជាតិ ប្រធានគយចល័ត និងរដ្ឋាករក្រុងប៉ោយប៉ែត បានបដិសេធន៍ថា ការងារហ្នឹងនៅខាងលើ ជាអ្នកដឹងឮ ខណៈខាងសាខាលោក នៅតែខាងក្នុង មិនបានដឹងឮទេ។ ប្រធានគយក្រុងប៉ោយប៉ែត បានថ្លែងប្រាប់អ្នក​សារព័ត៌មាន ដោយសម្តីបែបនេះថា៖ «លោកឯងមកសួរខ្ញុំអី! ខ្ញុំនៅតែខាងក្នុង ខ្ញុំម៉ិចដឹង ទៅសួរអ្នកនៅ​សាខា​ចល័ត​ទៅ»។

ការត្រួតពិនិត្យទារប្រាក់ នៅតាមដងផ្លូវនេះ បានជំរុញឲ្យមានការបើកគេច ពីសំណាក់រថយន្ដដឹកទំនិញ​មួយ​ចំនួន រហូតធ្វើឲ្យគ្រោះថ្នាក់ចរាចរណ៍ បានកើតមានឡើង ដល់ថ្នាក់ស្លាប់មនុស្ស និងរបួសជាច្រើននាក់ កាល​ពី​ពេលកន្លងមកនេះ។

» សូមអានអត្ថបទដែលទាក់ទងឡើងវិញ ដោយចុចនៅលើទីនេះ។

លោក ហ៊ុយ សុជាតិ បានបញ្ជាក់ទៀតថា រឿងមានកុងត្រួលចល័តច្រើននេះ លោកមិនបានបញ្ជាទេ ហើយ​តួនាទី​របស់លោក គឺគ្រាន់តែជាអ្នកធ្វើការ នៅការិយាល័យ និងមាននាទីត្រួតពិនិត្យ មើលគយតាមច្រកល្បៀង តែបន្តិចបន្តួចប៉ុណ្ណោះ។

បន្ទាប់ពីការបដិសេធន៍ របស់ប្រធានគយចល័ត នៅក្រុងប៉ោយប៉ែត ទៅលើបញ្ហាព្រួយបារម្ភ របស់ប្រជាពលរដ្ឋ នៅខេត្តបន្ទាយមានជ័យរួច ទស្សនាវដ្តីមនោរម្យ.អាំងហ្វូបានព្យាយាម ទាក់ទងទៅសុំការបំភ្លឺ រាល់បញ្ហា​ខាងលើ ពីអភិបាលខេត្ត បន្ទាយមានជ័យ លោក គោ ស៊ុំសារឿន ទៀត តែលោកបានតប តាមទូរស័ព្ទមកវិញ នៅថ្ងៃទី១១ សីហា ឆ្នាំ២០១៥ នេះថា លោកកំពុងរវល់ប្រជុំ មិនអាចឆ្លើយឆ្លងបានទេ៕