ក្នុងជំនួបនៃថ្នាក់ដឹកនាំកំពូលនេះ ខាងគណបក្សប្រជាជនកម្ពុជា មានលោក ស ខេង, លោក កើត រិទ្ធិ និងលោក សក់ សេដ្ឋា។ ឯខាងគណបក្សសង្គ្រោះជាតិ មានលោក កឹម សុខា, លោក អេង ឆៃអៀង, និងលោក ប៉ុល ហំម។

ជំនួបដោយបិទទ្វា នៃតំណាងគណបក្សទាំងប្រាំមួយរូប បានជួបជជែកគ្នា ដោយគ្មានវត្តមានអ្នក​សារព័ត៌មាន​ឡើយ។ ជំនួបនេះ បានចាប់ផ្តើម នៅម៉ោងជាងប្រាំរសៀល នាថ្ងៃទី១០ ខែសីហា ឆ្នាំ២០១៥ នាវិមានរដ្ឋសភា។

ជាមួយនឹងជំនួបនេះ បើតាមការអះអាង របស់លោក កឹម សុខា នាពេលថ្មីៗនេះ បានលើកឡើងថា ការជជែក​នេះ នឹងលើកយកបញ្ហាសកម្មជន គណបក្សសង្គ្រោះជាតិ ដែលត្រូវបានតុលាការចោទវប្រកាន់ និងកំពុង​បន្ត​ចាប់​ខ្លួន ជាបន្តបន្ទាប់ មកដាក់ជជែកគ្នាដែរ។

មកទល់ម៉ោងនេះ លទ្ធផលនៃការជជែកគ្នា យ៉ាងណានោះ នៅមិនទាន់បង្ហាញជាផ្លូវការ ដោយតំណាង​គណបក្ស​ទាំងពីរ នៅឡើយ។ តែកាលពីព្រឹកថ្ងៃទី១០ ខែសីហា ឆ្នាំ២០១៥នេះ នៅស្នាក់ការ​គណបក្សសង្គ្រោះ​ជាតិ ចាក់អង្រែលើ លោក ឡុង រី បានលើកឡើងថា កឹម សុខា នឹងជួបជាមួយ លោក ស ខេង ដើម្បីជជែកគ្នា ពីបញ្ហាយកបញ្ហាព្រំដែនកម្ពុជា-វៀតណាម។

ត្រង់ចំណុច នៃការជជែកគ្នាលំអិត​យ៉ាងណានោះ មិនត្រូវបានលោក ឡុង រី លើកមកបង្ហាញទេ។ លោក​គ្រាន់​តែ​​បញ្ជាក់ថា៖ «យើងចង់ចូលរួមចំណែក ក្នុងការចូលរួមដោះស្រាយ បញ្ហាប្រទេសជាតិ។ រសៀលនេះ គណបក្ស​ទាំងពីរ បានជួបគ្នាដោយត្រង់ មើលគ្នាដោយត្រង់។ (...) ជាតំណាង ឲ្យប្រជាពលរដ្ឋខ្មែរ យើង​ចង់​បានដំណោះស្រាយ ដោយសន្តិវិធី បំពេញចិត្តម្ចាស់ឆ្នោត ដែលចង់បានព័ត៌មាន ជាមោទនភាព ដែល​យើងបាន​ឆ្លើយឆ្លងគ្នា។»៕