ស្ត្រីជាមន្ត្រី របស់អង្គការសហប្រជាជាតិមួយរូប បានទទួលនូវបញ្ជីតារាងតម្លៃ នៃទាសីកាមគុណ ដែលរៀបចំ​ធ្វើឡើង ដោយក្រុមស្ម័គ្រប្រយុទ្ធ នៃរដ្ឋអ៊ីស្លាម។

ក្រុមសមាជិករដ្ឋអ៊ីស្លាម ហៅកាត់តាមភាសាអង់គ្លេស ISIS និងតាមភាសាបារាំង EI បានលក់កុមារី ដែលមាន​អាយុរវាងពី១ ទៅដល់៩ឆ្នាំ ក្នុងតម្លៃ១៦៥ដុល្លារ។ កុមារី ដែលមានវ័យការចូលដល់ជំទង់ នឹងមានតម្លៃ​១២៤​ដុល្លារ ហើយតម្លៃនឹងកាន់តែថោកទៀត បើវ័យចម្រើនការរបស់ពួកនាង ឡើងដល់ជាង២០ឆ្នាំ។  អ្នកស្រី ហ្សៃណាប បេនហ្គៀរ៉ា (Bangura) មន្ត្រីរបស់អង្គការសហប្រជាជាតិ ប្រចាំនៅប្រទេសអៀរ៉ាក់ ទាក់ទងនឹង​អំពើ​ហិង្សា ខាងផ្លូវភេទ ដែលបានចូលទៅដល់កន្លែង ដែលមានការប្រយុទ្ធគ្នា បានទទួលនូវបញ្ជីតារាងមួយ ដែល​បង្ហាញពីតារាងតម្លៃ នៃទាសីកាមគុណ។

អ្នកស្រី បេនហ្គៀរ៉ា បានពន្យល់ថា ក្មេងស្រីទាំងនោះ ត្រូវបានជួញដូរ ជាថ្នូរនឹងប្រេងឥន្ទនៈជាធុងៗ។ ក្មេងស្រី​ម្នាក់អាចត្រូវបានលក់ និងទិញ ដោយ៥ឬ៦បុរសផ្សេងៗគ្នា។ ពេលខ្លះក្រុមយុទ្ធជន ស្ម័គ្រប្រយុទ្ធតាំងនោះ បាន​លក់ក្មេងស្រីទាំងនោះ ជាថ្នូរទៅនឹងប្រាក់រំលោះខ្លួន ជាច្រើនពាន់ម៉ឺនដុល្លារ។ បើតាមមន្ត្រី អ.ស.ប ដដែល បាន​និយាយថា ការលក់ដូរក្មេងទាសីទាំងនោះ ត្រូវបានរៀបចំធ្វើ ទៅតាមថានត្តរស័ក្ដិ របស់អ្នកទិញ។

មេដឹកនាំជាន់ខ្ពស់ មានអាទិភាព ក្នុងការជ្រើសរើសទាសីរបស់ខ្លួនមុនគេ។ បន្ទាប់មក ដល់វេនមេដឹកនាំ​ប្រចាំ​តំបន់ ដែលពួកគេនៅតែមានសិទ្ធិ ជាអាទិភាព ក្នុងការដេញថ្លៃដដែល។ អ្នកដែលមានអាទិភាព​ក្រោយ​គេ​បំផុត គឺយុទ្ធជន ដែលនឹងទទួលបាន នូវទាសីសេសសល់ ពីការជ្រើសរើស របស់មេៗរបស់ខ្លួន។

អ្នកស្រី ហ្សៃណាប បេនហ្គៀរ៉ា បាននិយាយឲ្យដឹងទៀតថា៖ «ពួកគេមានសៀវភៅ សម្រាប់និយាយប្រាប់ ពី​វិធីសាស្ត្រ សម្រាប់ប្រើប្រាស់ទាសី​កាមគុណ​ទាំងនេះ។ ពួកគេមានភ្នាក់ងារ "មេអណ្ដើក" មួយ ក្នុងការ​រៀបចំ​ចាត់​ចែង ដើម្បីរកគូស្រក និងលក់មនុស្សស្រី។ អ្វីៗទាំងអស់ សុទ្ធតែមានចុះបញ្ជីការ មានអត្តលេខ​ទាំង​អស់។»៕