សមាជិកស្ថាបនិក នៃគណបក្សប្រជាធិបតេយ្យមូលដ្ឋាន លោក សាម ស៊ុនឌឿន បានថ្លែងអះអាងថា គណបក្ស​ថ្មី ទើបនឹងបង្កើតរបស់លោក មាននយោបាយគោលបីយ៉ាង ដែលសំខាន់ និងខុសប្លែក ពីគណបក្សដទៃ។ នោះ គឺគណបក្សដទៃ ដឹកនាំពីលើមកក្រោម ដែលយកមេជាធំ ឯអ្នកក្រោម រង់ចាំតែស្តាប់បញ្ជា មួយមុខប៉ុណ្ណោះ។ លោកបន្តថា ឯគណបក្សប្រជាធិបតេយ្យ​មូលដ្ឋាន​របស់លោក ធ្វើការពីក្រោមទៅលើ ពលរដ្ឋ និងសមាជិក​ជា​ធំ។ សមាជិក ជាអ្នកសម្រេចចិត្ត ក្នុងការជ្រើសរើសថ្នាក់ដឹកនាំរបស់ខ្លួន។

គោលនយោបាយរបស់គណបក្សថ្មីនេះ បានបង្កឲ្យមានចំណាប់អារម្មណ៍មិនតិចទេ ពីពលរដ្ឋថ្នាក់មូលដ្ឋាន។ មានវត្តមាន ចូលរូមក្នុងសមាជដំបូង របស់«គណបក្សប្រជាធិបតេយ្យមូលដ្ឋាន» លោក មាស សាមឿន មកពី​ខេត្តកំពង់ស្ពឹ បានថ្លែងប្រាប់ទស្សនាវដ្តីមនោរម្យ.អាំងហ្វូថា គណបក្សមួយនេះ មានលក្ខណៈប្លែក ពីគណបក្ស​ផ្សេងទៀត ហើយលោកបានជ្រើសរើស សមាជិកមួយចំនួនធំហើយ មកទល់ពេលនេះ។ លោក បាន​ពន្យល់​ថា គណបក្សមួយនេះ បានទុកប្រជាពលរដ្ឋជាធំ ពលរដ្ឋគ្រប់រូប អាចដាក់ពាក្យចូលរួម ជាសមាជិកនៃ​គណបក្ស​នេះបាន។ លោកថា៖ «គណបក្សនេះ មានគោលបំណងក្នុងការដឹកនាំប្រជាពលរដ្ឋ មានប្រជាធិបតេយ្យ មាន​សេរីភាពបេញលេញ។ តែវាអាស្រ័យ លើប្រជាពលរដ្ឋផ្ទាល់តែម្តង មិនសំខាន់ លើគណបក្សនោះឡើយ។»

មកពីខេត្តកំពង់ស្ពឺដែរ លោក ខឹម សុខ សមាជិកមួយរូបទៀត បានបង្ហាញទស្សនៈថា គណបក្សនេះ មាន​ការ​យកចិត្តទុកដាក់ ប្រជាពលរដ្ឋជាធំ។ ក្នុងវ័យជាង៦០ឆ្នាំ លោក ខឹម សុខ បានបង្ហាញពីការសម្រេចចិត្ត ចូលរួម​ជាមួយគណបក្សមួយនេះថា ព្រោះតែកម្ពុជាសព្វថ្ងៃ ស្ថិតក្រោមការដឹកនាំរបស់គណបក្សមួយ ដែលកំពុង​បង្ហាញ ពីការមិនយកចិត្តទុកដាក់ លើរាស្រ្ត។ លោកបានត្អូញត្អែរ ពីការរស់នៅរបស់លោក នាពេលឥឡូវនេះ ថាពិតជាមានភាពពិបាកណាស់ ដោយត្រូវនៅ ក្រោមការជិះជាន់ គាមសង្កត់ និងគ្មានការគិតគូរ ឬរកដំណោះ​ស្រាយនោះឡើយ។ លោក សុខ បានថ្លែងឲ្យដឹងទៀតថា៖ «ពិបាករស់នៅណាស់ មានការគាបសង្កត់ច្រើន អ្នកមានគាបសង្កត់អ្នកក្រីក្រ ពលរដ្ឋក្រីក្រ ទីក្សត់ ទុរគត ប្រជាពលរដ្ឋរកអ្វីមិនបាន (រកស៊ីចិញ្ចឹមជីវិត) ទារ​សំណងនានា ពីពលរដ្ឋក្នុងការដាំអ្វីបន្តិចបន្ទួច។ (...) សំឡុត គម្រាមកំហែង ប្លន់ទ្រពសម្បត្តិមិនថាយប់ ឬ​ថ្ងៃ។»

គណបក្សប្រជាធិបតេយ្យមូលដ្ឋាននេះ ក៏ដើម្បីអនាគតប្រជាពលរដ្ឋទូទៅ របស់កម្ពុជា។ នេះ គឺជាជំនឿជឿជាក់ របស់អ្នកស្រី សុខ ផល្លា សមាជិកមកពីខេត្ត កំពង់ស្ពឺ មួយរូបទៀត។ អ្នកស្រីបានរៀបរាប់ថា ព្រោះគណបក្ស​នេះ មានការគិតគូរ និងយកចិត្តទុកដាក់ លើជីវភាព និងការរស់នៅ របស់ពលរដ្ឋជាធំ។ គោលនយោបាយ​របស់​គណបក្សនេះ មានលក្ខណៈល្អ ច្រើនជាងគណបក្សដទៃៗទៀត ដែលបានញ៉ាំងចិត្ត ឲ្យអ្នកស្រីចូលរួម។ គណបក្ស​ប្រជាធិបតេយ្យមូលដ្ឋាន នឹងជម្រុញឲ្យជីវភាពប្រជាពលរដ្ឋ ពីភាពអាប់អោន ឈានមកភាពរីក​ចម្រើន ដើម្បីខ្លួនឯង សម្រាប់កូនចៅជំនាក់ក្រោយ។ អ្នកស្រីបានថ្លែងថា៖ «នៅមូលដ្ឋានខ្ញុំ មានអ្នកគាំទ្រ​ច្រើន។ សូមពលរដ្ឋទាំងអស់ ចូលរួមដើម្បីបំបាត់ភាពអត់ឃ្លាន (...) ដើម្បីភាពសុខសាន្ត សម្រាប់កូនចៅ​យើង ជំនាន់ក្រោយទាំងអស់គ្នា។»

ពលរដ្ឋមានសេរីភាព ក្នុងការសម្រេច ដោយពុំចាំបាច់ មានការចង្អុល ពីប្រធានគណបក្ស...

លោក ហេង ស្រ៊ាង ជាសមាជិកក្រុមតស៊ូមតិ ខ្មែរដើម្បីខ្មែរ មកពីសកលវិទ្យាល័យភូមិន្ទភ្នំពេញ បានលើក​ឡើង​ថា គ្រប់សមាជិកទាំងអស់ នៃគណបក្សនេះ ត្រូវបានជ្រើសរើស និងបោះឆ្នោតដោយផ្ទាល់ ពីអ្នកគាំទ្រ​របស់​ខ្លួន ក្នុងការដឹកនាំប្រទេស ឬនាំពាក្យសំដីពលរដ្ឋ ដើម្បីធ្វើការដោះស្រាយមួយ ដែលប្រកបដោយប្រសិទ្ធិភាព។ សេរីភាពដោយផ្ទាល់នេះ បាននឹងកំពុងទាក់ទាញ ចំណាប់អារម្មណ៍ ពីពលរដ្ឋមួយភាគធំ ក្នុងកិច្ចដំណើរការ​គណបក្ស​នេះ នាថ្ងៃខាងមុខ។

រីឯ កញ្ញា មូល សុខណាត សមាជិកមកពីខេត្តកំពង់ស្ពឺដដែល បានលើកឡើងថា គណបក្សមួយនេះមានភាព​ប្រសើរ និងពេញលក្ខណៈល្អ លើការយកចិត្តទុកដាក់ ជាមួយពលរដ្ឋ តាមមូលដ្ឋានពិតប្រាកដ។ កញ្ញាបន្ថែម​ថា សម្រាប់បញ្ហាជីវភាពប្រចាំថ្ងៃ របស់ពលរដ្ឋវិញ គណបក្សតាមគោលការណ៍ និងភាពជាក់ស្តែងមួយចំនួន ឃើញ​ថាពលរដ្ឋតាមមូលដ្ឋាន មានការយល់ដឹងច្រើន ពីការរស់នៅ និងកិច្ចអភិវឌ្ឍន៍ ភូមិឃុំរបស់ខ្លួន។ កញ្ញា សុខណាត បានថ្លែងឡើងថា៖ «គណបក្សផ្សេងៗខ្ញុំមិនដឹងទេ តែគណបក្សនេះ មានគោលនយោបាយ ក្នុង​ការ​គិត​គូរ លើពលរដ្ឋជាធំ»។

សូមរំលឹកដែរថា លោក យ៉េង វីរៈ អតីត​ប្រធាន​មជ្ឈ​មណ្ឌល​​អប់រំ​ច្បាប់ ​សម្រាប់​សហគមន៍ ត្រូវបាន​សមាជជា​លើក​​ដំបូង​របស់ របស់គណបក្សថ្មីនេះ ​​បោះ​​​​​​ឆ្នោត ផ្ដល់សេចក្ដីទុកចិត្ត ឲ្យធ្វើជា​ប្រធាន​បណ្ដោះ​​​អាសន្ន របស់​គណបក្ស កាលពីថ្ងៃ​ទី​២ ខែ​សីហានេះ។ សមាជន​ក្នុង​រាជធានី​ភ្នំពេញ ដែលមានសមាជិកចូលរួម ប្រមាណ​ជាង១០០នាក់ ក៏បានជ្រើសតាំង អតីតមេដឹកនាំអង្គការសង្គមស៊ីវិល ចំនួនបីនាក់ទៀត ​លោក សាម ស៊ុនឌឿន លោក សាម អ៊ីន និងលោក ប៉ោ សេដ្ឋា ឲ្យធ្វើជាអនុប្រធាន អគ្គលេខាធិការ និងជាអគ្គហិរញ្ញិក របស់គណបក្ស​ដែរ៕