នាយក​រដ្ឋមន្រ្តី ព្រមាន​បក្ស​ប្រឆាំង​រឿង​មិន​បង្ហាញ​ផែនទី

ប្រមុខរដ្ឋាភិបាលកម្ពុជា ប្រកាសធ្វើសង្គ្រាម ផ្លូវ«ច្បាប់» ជាមួយគណបក្សសង្គ្រោះជាតិ ក្នុងករណី​គណបក្ស​មួយ​នេះ នៅ​តែ​មិន​បង្ហាញ​ផែនទី ដែលខ្លួនអះអាងថា បានទិញពីបារាំងមកនោះ ដើម្បីមកផ្ទៀងផ្ទាត់ ជាមួយ​នឹង​ផែនទី ដែល​រដ្ឋាភិបាល​មាន។ នេះជាការថ្លែង របស់លោកនាយករដ្ឋមន្រ្តីហ៊ុន សែន កាលពិថ្ងៃទី០៣ ខែសីហា ឆ្នាំ​២០១៥​នេះ។
Loading...
  • ដោយ: អ៊ុម វ៉ារី អត្ថបទ ៖ អ៊ុម វ៉ារី ([email protected]) - យកការណ៍៖ស្រ៊ុន ទិត្យ -ភ្នំពេញថ្ងៃទី៣ សីហា ២០១៥
  • កែប្រែចុងក្រោយ: August 03, 2015
  • ប្រធានបទ: ព្រំដែន
  • អត្ថបទ: មានបញ្ហា?
  • មតិ-យោបល់

នាយករដ្ឋមន្ត្រីកម្ពុជា លោក ហ៊ុន សែន បានប្រកាស នៅព្រឹកថ្ងៃទី៣ ខែសីហានេះ ព្រមានគណបក្សសង្គ្រោះ​ជាតិថា បើគណបក្សមួយនេះ នៅតែរឹងរូស មិនព្រមបង្ហាញផែនទី ដែលខ្លួនមាននោះទេ លោកនឹងប្រើប្រាស់ នូវវិធានការច្បាប់ បង្ខំឲ្យមានការបង្ហាញ ជាផ្លូវការ នាពេលខាងមុខនេះ។ ក្នុងពិធីសម្ពោធស្ពាន មិត្តភាព​កម្ពុជា​-ចិន នៅក្រុងតាខ្មៅ ខេត្តកណ្តាល (ស្ពានព្រែកសំរោងតាខ្មៅ ឆ្លងកាត់ទន្លេបាសាក់) លោកនាយករដ្ឋមន្រ្តី បាន​អះអាងថា លោកនឹងមិនខ្លាច ក្នុងការចំណាយឡើយ ដើម្បីទទួលបានផែនទី មកបញ្ជាក់ឲ្យបានច្បាស់លាស់។

កាលពីពេលថ្មីៗនេះ លោក ហ៊ុន សែន បានផ្ញើរលិខិត ជាផ្លូវរដ្ឋទៅកាន់ អគ្គលេខាធិការ អង្គការសហប្រជាជាតិ និងថ្នាក់ដឹកនាំកំពូល នៃប្រទេសមហាអំណាចចំនួនបី ដើម្បីស្នើសុំផែនទី របស់ប្រទេសកម្ពុជា ដែលបាន​តំកល់​ទុក តាំងពីទសវត្សន៍ឆ្នាំ៦០ ដើម្បីយកមកផ្ទៀងផ្ទាត់ ជាមួយនឹងផែនទី ដែលមានក្នុងដៃរដ្ឋាភិបាល និងផែនទី ដែលគណបក្សប្រឆាំង បានអះអាងថា បានថតពីប្រទេសបារាំងមកនោះ ពីបញ្ហានៃការកំណត់បង្គោលព្រំដែន ជាមួយប្រទេសជិតខាង នាពេលបច្ចុប្បន្ន។

ក្នុងពិធីសម្ពោធស្អាន មិត្តភាពកម្ពុជា-ចិន តាខ្មៅ លោកនាយករដ្ឋមន្រ្តីបានប្រកាសជំហរ ឲ្យអ្នកដែលមាន​ផែនទីទាំងនោះ ដាក់ចូលមក ដើម្បីធ្វើការផ្ទៀងផ្ទាត់ជាមួយគ្នា។ ហើយបើចង់ប្តឹង ទៅកាន់តុលាការអន្តរជាតិ ក្រុងឡាអេនោះ ត្រូវធ្វើសារណាការពារ និងត្រូវបង្ហាញ ពីចំណុចឈ្នះនៅត្រង់ណាផង ដើម្បីជៀសវាងការ​ចាញ់​ក្តី។ លោក ហ៊ុន សែន បានបញ្ជាក់ថា៖ «ឥឡូវអ្នកដែលមានផែនទីត្រឹមត្រូវ សូមដាក់មក។ សូមបញ្ជូន​មក បើ​មិន​បញ្ជូនឲ្យរាជរដ្ឋាភិបាល ត្រូវបញ្ជូនទៅ រាជបណ្ឌិតសភា បណ្ឌិត សុខ ទូច កំពុងដឹកនាំធ្វើការស្រាវជ្រាវ គេ​កំពុង​ត្រូវការ នូវឯកសារដើម្បីយកផ្ទៀងផ្ទាត់។ រាជរដ្ឋាភិបាលបានបញ្ជូន ឲ្យអស់ហើយ ទៅរាជបណ្ឌិតសភា។ ក្នុង​ឋានៈ ជាអ្នកវិទ្យាសាស្ត្រស្រាវជ្រាវ ដោយឯករាជ្យ ខុសថាខុស ត្រូវថាត្រូវ។ (...) បើប្តឹងទៅដើម្បីចាញ់ តើ​ចាំ​បាច់​ប្តឹងធ្វើអី?»

ទស្សនាវដ្តីមនោរម្យ.អាំងហ្វូមិនអាចសុំការបញ្ជាក់ ពីមន្រ្តីនាំពាក្យគណបក្សសង្គ្រោះជាតិបានទេ ក្នុងថ្ងៃនេះ។ តែ​កន្លងមក លោក អ៊ុំ សំអាន តំណាងរាស្ត្រ មកពីគណបក្សសង្គ្រោះជាតិ ធ្លាប់បានប្រាប់មកទស្សនាវដ្តីថា លោក​បានស្នើទៅរដ្ឋាភិបាលកម្ពុជា ដើម្បីដាក់ពាក្យបណ្តឹង ពីបញ្ហាព្រំដែននៃប្រទេសកម្ពុជា-វៀតណាមនេះ ទៅកាន់តុលាការយុត្តិធម៌អន្តរជាតិនោះដែរ។ តែការស្នើសុំ នាពេលនោះ បានបរាជ័យ ដោយលោកនាយក​រដ្ឋ​មន្រ្តី ថ្លែងបញ្ជាក់វិញ ឲ្យលោក អ៊ុំ សំអាន ត្រូវទៅរៀនច្បាប់បន្ថែមទៀត៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...