«គម្រោង នៃការសាងសង់ផ្សារដើមគរ ជាកិច្ចអភិវឌ្ឍន៍នេះ ទៅជាអគារខ្ពស់មានច្រើនជាន់» នេះជា​ការថ្លែង​បញ្ជាក់ របស់អភិបាលរាជធានីភ្នំពេញ លោក ប៉ា សុជាតិវង្ស ធ្វើទៅកាន់ក្រុមអាជីវករ ក្នុងដំណើរចុះ​ទៅកាន់​ផ្សារដើមគរ ក៏ដូចជាផ្សារនាគមាស កាលពីព្រឹកថ្ងៃទី៣១ ខែកក្កដា ឆ្នាំ២០១៥នេះ។

ក្នុងដំណើរចុះផ្ទាល់ ទៅធ្វើការស្ទង់មតិនេះ លោកអភិបាលរាជធានី ចង់ប្រាប់ក្រុមអាជីវករទាំងអស់ថា ការ​អភិវឌ្ឍន៍​ផ្សារ នឹងអាចបញ្ជៀសការកកស្ទះចរាចរណ៍ បញ្ជៀសការលក់ដូរអនាធិបតេយ្យ បញ្ជៀសការខ្វះ​អនាម័យ បរិដ្ឋាន និងបញ្ជៀសការលក់ដូរ របស់អាជីវករក្រីក្រ ដែលគ្មានកន្លែងលក់ដូរ ពិតប្រាកដជាដើម។

ប៉ុន្តែលោក សុជាតិវង្ស នៅមិនទាន់កំណត់ ពីពេលវេលាណាមួយ​ជាក់លាក់ ពាក់ព័ន្ធនឹងគម្រោងសាង់សង់​ផ្សារនោះឡើយ។ តែលោកគ្រាប់តែបញ្ជាក់ ទៅកាន់ក្រុមអាជីវករ ពិសេសក្រុមអាជីវករ ដែលលក់ដូរខាង​ក្រៅ​ផ្សារថា ពួកគាត់អាចបន្តការលក់ដូរនេះ នៅកន្លែងដើម រហូតដល់ចប់កុងត្រា ក្នុងឆ្នាំ២០២១។

លោកអភិបាលរាជធានី បានថ្លែងឲ្យដឹងថា៖ «ការកសាងផ្សារដើមគថ្មី មិនមែនជាការទិញដូរ លក់តូបនោះទេ។ (...) អាជីវករលក់ដូរធម្មតា។ ឬក្រោយសាងសង់រួច អោយអាជីវករចូលលក់ដូរធម្មតា។ (...) សាលារាជធានី​ភ្នំពេញ នឹងចាត់អ្នកគ្រប់គ្រងផ្សារដើមគ ធ្វើការសម្តែងមតិ តាមរយៈការវេទិកាសាធារណៈ ជាមួយអាជីវករ។ បើអាជីវករភាគច្រើន មិនទទួលយកការអភិវឌ្ឍន៍​ផ្សារថ្មីទេ សាលារាជធានីភ្នំពេញ នឹងបង្វិលលុយនេះ ទៅ​អភិវឌ្ឍន៍​​ផ្សារដទៃទៀត ព្រោះនៅរាជធានីភ្នំពេញ មានផ្សារជាង២០ឯណោះ ដែលត្រូវធ្វើការអភិវឌ្ឍន៍​នោះ។»

លោក ម៉េង តិច អាយុ៦២ ឆ្នាំ ជាអាជីវករ ផ្សារដើមគរ បានថ្លែងប្រាប់ទស្សនាវដ្តីមនោរម្យ.អាំងហ្វូ ថា លោក​មិនជំទាស់ នឹងការអភិវឌ្ឍន៍ផ្សារនោះទេ តែសុំរក្សាទុក រហូតកុងត្រារបស់លោក ត្រូវបានបញ្ចប់ ជាមួយ​ផ្សារ​នេះ ក្នុងឆ្នាំ២០២១សិន។ លោកបានបន្តថា បច្ចុប្បន្ន លោកគាំទ្រឲ្យសាលា រាជធានីភ្នំពេញ ធ្វើការសម្រួល ដល់​ចរាចរណ៍ជុំវិញផ្សារ ឲ្យមានភាពទូលាយ ជាបណ្តោះអាសន្នសិន។

ថ្លែងដូចគ្នានេះដែរ អ្នកស្រី ចាន់ ធូ អាយុ៣៥ ឆ្នាំ បានអះអាងដែរថា អ្នកស្រីបានមកលក់ដូរ នៅផ្សារដើមគនេះ​យូរហើយ។ ក្នុងគម្រោងសាងសង់ផ្សារនេះ គ្រប់អាជីវករទាំងអស់ នៅមិនមានអ្នកណាម្នាក់ មានជំនឿ ទៅលើ​ការអះអាង របស់អភិបាលរាជធានី ដែលលបានលើកឡើងខាងលើនេះទេ។ បញ្ហានេះ ក្រុមអាជីវករនៅតែ​មាន​ការព្រួយបារម្ភ និងភ័យខ្លាច ពីហេតុការណ៍អ្វីមួយមិនល្អ ដែលអាចនឹងកើតមានឡើង។

អ្នកស្រី ចាន់ ធូរ ថាអាជីវករមិនស្ងប់ចិត្ត និងសុខចិត្ត ចំពោះសំដីរបស់អភិបាលក្រុងរូបនេះ ដែលបាននិយាយ​ថា៖ «បើមានអគ្គីសភ័យកើតឡើង តើរត់តាមច្រកណា»។ អ្នកស្រីបានបញ្ជាក់ទៀតថា សម្រាប់អ្នកស្រីផ្ទាល់ នៅ​មិនទាន់អាចអះអាងថា បដិសេធ ឬទទួលឡើយ អ្នកស្រីរង់ចាំមើល ការបកស្រាយបន្ថែម របស់សាលារាជធានី នាពេលក្រោយទៀត។ តែបើតាមការស្ទង់មតិ របស់អ្នកស្រី ទៅលើអាជីវករផ្សារដើមគ ៩៩.៩៩ភាគរយ មិន​ចង់​ឲ្យមានការសាងសង់ផ្សារនេះឡើយ។ អ្នកស្រីបញ្ជាក់ថា៖ «សូមឲ្យបញ្ចប់អាណត្តិសិន (២០២១)។ ហើយ​ក្រោយ​អាណត្តិ ស្ថិតក្នុងការពិចារណាទៀត។»៕