ពលរដ្ឋមួយចំនួន បានអះអាងថា កងទ័ពកម្ពុជា ត្រូវមានតួនាទី ក្នុងការការពារទឹកដី ការពារជាតិ និងប្រជាជន ហើយមិនត្រូវងាក មកគិតគូរ រឿងការពារគណបក្សរបស់ខ្លួន គណបក្សកាន់អំណាច ឬរដ្ឋាភិបាលឡើយ។

លោក អ៊ុំ យ៉ែម មន្រ្តីរាជការចូលនិវត្តន៍ បានថ្លែងប្រាប់ទស្សនាវដ្តីមនោរម្យ.អាំងហ្វូថា លោកមានការអស់​សង្ឃឹម​យ៉ាងខ្លាំង ដែលបានលឺផ្ទាល់ត្រចៀក នូវការលើកឡើងរបស់ថ្នាក់ដឹកនាំ និងមន្រ្តីធំៗ របស់កងទ័ព​កម្ពុជា ដែលបានធ្វើការប្តេជ្ញាចិត្ត ការពាររដ្ឋាភិបាល ដែលខ្លួនតែងនិយាយ មិនដាច់ពីមាត់ថា «ជា​រដ្ឋាភិបាល​ស្រប​ច្បាប់» ហើយយថែមទាំង បានប្រកាសជំហរបន្ថែមថា កងកម្លាំងទាហានទាំងអស់ ជារបស់គណបក្ស​ប្រជាជន​កម្ពុជា​នោះ។

លោក យ៉ែម បានថ្លែងថា៖ «មិនត្រូវទាល់តែសោះ ដែលលថ្នាក់ដឹកនាំទាហានទាំងនោះ អះអាងថាខ្លួនស្ម័គ្រ លុះ​ក្ស័យ ការពាររដ្ឋាភិបាលស្របច្បាប់កម្ពុជា។ វាមិនសមហេតុផលទេ ទាហានគេបង្កើតឡើង ដើម្បីការពារ​ជាតិ បូរណៈភាពទឹកដី មិនមែនសម្រាប់ ការពាររដ្ឋាភិបាលស្របច្បាប់ ឬមិនស្របច្បាប់នោះទេ។ (...) រដ្ឋាភិបាល គេមានក្រុមសមត្ថកិច្ច កងរាជអាវុធហត្ថ និងក្រុមអង្គរក្សក្នុងកិច្ចការពារហើយ មិនចាំបាច់​ក្រុម​ទាហាន​ទាំង​នោះ មកប្រកាសការពារនោះទេ។ (...) ឬមួយក្រុមមេទាហានទាំងនោះ ប្រកាសការពារថ្នាក់ដឹកនាំ គណបក្ស​ប្រជាជន ព្រោះតែខ្លាចបាត់បង់ដំណែងទៅវិញទេ?»

ប្រតិកម្មនេះ ត្រូវបានធ្វើឡើង បន្ទាប់ពីមានទូរទស្សន៍កម្ពុជាមួយចំនួន បានចាក់ផ្សាយ នូវការលើកឡើងរបស់​លោក ទៀ បាញ់ រដ្ឋមន្ត្រីក្រសួងការពារជាតិ ដែលបានលើកឡើងថា កងកម្លាំងប្រដាប់អាវុធគ្រប់ប្រភេទ ត្រូវ​ធានា និងការពាររាជរដ្ឋាភិបាលមួយស្របច្បាប់។ ថ្លែងក្នុងពិធីបិទវគ្គ បណ្តុះបណ្តាលនាយទាហាន បច្ចេកទេស នៃកងយោធពលខេមរភូមិន្ទ កាលពីថ្ងៃទី២៨ ខែកក្កដា ឆ្នាំ២០១៥ នៅស្រុកសំរោងទង ខេត្តកំពង់ស្ពឺ លោក ទៀ បាញ់ បានអះអាងថា៖ «ប្រឆាំងនឹងការធ្វើបដិវត្តពណ៌ ដែលមានគោលគំនិត ចង់ផ្តួលរំលំរដ្ឋាភិបាល ស្រប​ច្បាប់​បច្ចុប្បន្ន»។

ដោយឡែក លោក ព្រហ្ម សារ៉ាត់ អតីតទាហានរំដោះ ៧មករា ដែលបានចូលនិវត្តិទៅហើយនោះ បានប្រតិកម្ម​នឹងការលើកឡើងខាងលើនេះដែរ ពិសេសប្រតិកម្ មនឹងការលើកឡើង របស់អគ្គមេបញ្ជាការរង កង​យោធ​ពល​ខេមរភូមិន្ទ លោក ជា តារា ដែលបានប្រកាស ជាសាធារណៈថា៖ «កងទ័ព ជារបស់គណបក្ស​ប្រជាជន​កម្ពុជា»។

មេ​ទាហាន​ផ្កាយ​មាស​៤ លោក ជា តារា និង​ជា​តំណាង ​គណៈ​មេ​បញ្ជាការ​ឯកភាព​ សមរភូមិ​ប្រាសាទ​​ព្រះ​វិហារ ផ្កាយ​មាស​៤ បានថ្លែងនៅថ្ងៃទី២៩ ខែកក្កដានេះថា កងទ័ពជាមនុស្ស របស់គណបក្សប្រជាជនកម្ពុជា ព្រោះ​តែ​លោកនាយករដ្ឋមន្រ្តី ហ៊ុន សែន ប្រធានគណបក្សនេះ ជាអ្នកចិញ្ចឹម និងបីបាច់ថែរក្សារាងមក។

ថ្លែងនាសិក្ខាសាលាមួយ ស្ដីពី សម្ព័ន្ធមេត្រីភាព រវាងអង្គភាពកងទ័ព កងនគរបាលជាតិ ជាមួយស្ថាប័ន​អង្គភាព​ស៊ីវិល នៅក្នុងវិមានសន្តិភាព នៅចំពោះមន្ត្រី​យោធា មន្ត្រី​រដ្ឋាភិបាល និង​ឯកជនច្រើននាក់ លោក ជា តារា បាន​ថ្លែងឡើងថា៖ «កងទ័ពនៅមានភារកិច្ចមួយទៀត សម្តេចតេជោ ទើបមានប្រសាសន៍ហើយ។ ប្រសាសន៍នេះ ចងចាំតាំងពីយូរហើយ ថ្ងៃទី២៣ (ចង់និយាយពីសំដីលោក ហ៊ុន សែន ថ្ងៃទី២៣ ខែកក្កដា)។ កងទ័ព បើ​និយាយ​ឲ្យចំ កងទ័ពម្នាក់ជារបស់ប្រជាជន របស់គណបក្សប្រជាជន ពីព្រោះសម្តេចតេជោ ជាអ្នកចិញ្ចឹម​បីបាច់​ថែ​រក្សា ដឹក​នាំ​បញ្ជាកងទ័ព។ កងទ័ព គឺជាកងទព័របស់គណបក្សប្រជាជន និយាយឲ្យស្មោះត្រង់ហ្មង។»

ការប្រកាសខាងលើនេះ ត្រូវបានលោក សារ៉ាត់ ដែលបច្ចុប្បន្ន ក៏ជាមន្រ្តីម្នាក់ ក្នុងគណបក្សប្រជាជន​កម្ពុជា​ដែរ​នោះ ចាត់ទុកថា ជាការប្រកាស ដោយគ្មានការទទួលខុសត្រូវ និងមិនយល់ពីច្បាប់ របស់ទាហាន។ លោក​បាន​ពន្យល់ ប្រាប់ទស្សនាវដ្តីមនោរម្យ.អាំងហ្វូ ថា កងទព័ ជាទាហានរបស់ជាតិ ជារបស់ពលរដ្ឋ និងគ្មាននិន្នាការ​នយោបាយទេ។ លោកបានថ្លែង ដោយហួសចិត្ត នឹងការថ្លែង របស់លោក ជា តារា  និងបានហៅការថ្លែងនេះ ទំនងជាលោក (ជា តារា) មិនបានអានច្បាប់ និងលក្ខន្តិកៈ របស់កងយោធពលខេមរភូមិន្ទទេ។ លោកថា ការ​លើក​ឡើងនេះ កំពុងតែដឹកនាំទាហាន ឲ្យមានការរើសអើង បក្សពួកនិយមហើយ។

អតីតមន្ត្រីយោធា បានបញ្ជាក់ថា៖ «កងកម្លាំងទាហានទាំងអស់ ជារបស់ជាតិ មិនមែនជារបស់បុគ្គល របស់បក្ស ឬរបស់ក្រុមណាមួយឡើយ។ (...) កងកម្លាំងទាហានរបស់ជាតិ មានភារកិច្ច និងតួនាទីការពារជាតិ ទឹកដី និង​បូរណៈភាពរបស់កម្ពុជាទាំងមូល។ មិនមែនសម្រាប់ការពារអំណាចខ្លួន ការពារបក្សនយោបាយ ការពារបុគ្គល និងបក្សពួករបស់ខ្លួន ដើម្បីតែអំណាចនោះឡើយ។»

សូមរំលឹកថា ការលើកឡើងបែបនេះ របស់មេដឹកនាំកងទ័ពខាងលើ គឺត្រូវបានធ្វើឡើង ក្រោយការប្រកាស របស់​នាយករដ្ឋមន្រ្តីកម្ពុជា លោក ហ៊ុន សែន ដែលបានអះអាងថា លោកប្រឆាំងដាច់ខាត់ នូវ«បដិវត្តន៍» ដែល​មានគោលបំណង បំបាត់រាជបល័ង្គ និងផ្តួលរំលំរដ្ឋាភិបាលស្របច្បាប់ បច្ចុប្បន្ន។ ការថ្លែងនេះ ត្រូវបានធ្វើ​ឡើង​កាលពីថ្ងៃទី ២៣ ខែកក្កដា ក្នុងពិធីជួបសំណេះសំណាល ជាមួយកងកម្លាំងប្រដាប់អាវុធ និងមន្ត្រីរាជការ មកពី​អង្គភាពនានា ទូទាំងប្រទេស។

នៅក្នុងមហាសន្និបាតវិសមញ្ញ របស់គណបក្សប្រជាជនកម្ពុជា កាលពីថ្ងៃ១ ខែកុម្ភៈ ឆ្នាំ២០១៥ មន្ត្រីយោធា រាជ​អាវុធហត្ថ និងនគរបាលជាច្រើននាក់ ត្រូវបានដាក់បញ្ចូល ឲ្យក្លាយជាសមាជិក ​គណៈកម្មការ​កណ្ដាល ​របស់​គណបក្ស​កាន់​អំណាចនេះ។ ការដាក់បញ្ចូលមន្ត្រីទាំងនោះ ទៅធ្វើជាសមាជិកគណបក្ស ត្រូវបាន​អ្នកនាំពាក្ស​គណបក្សប្រជាជនកម្ពុជា និយាយនៅពេលនោះថា មិនបានប៉ះពាល់ ដល់ឯករាជ្យភាព នៃកងកម្លាំងប្រដាប់​អាវុធ ដែលត្រូវបានបម្រើជាតិ ការពារប្រទេស និងប្រជាជននោះឡើយ៕