ហ៊ុន សែន បង្រៀន​ទ្រង់ រណឫទ្ធិ ឲ្យ​ចេះ​ធ្វើ​នយោបាយ​ខ្លួន​ឯង

បន្ទូលរបស់ព្រះអង្គម្ចាស់ នរោត្តម រណឫទ្ធិ ដែលបាន លើកឡើងថា ព្រះមហាក្សត្រកម្ពុជា មានគម្រោងកោះ ហៅ​មេ​ដឹកនាំ​គណបក្ស៣ធំៗ នៅកម្ពុជា ឲ្យចូលគាល់ពិភាក្សា បញ្ហាព្រំដែននោះ ត្រូវបានលោក ហ៊ុន សែន នាយក​រដ្ឋមន្រ្តី​កម្ពុជា នៅថ្ងៃទី២៧ ខែកក្កដា ឆ្នាំ២០១៥នេះ ប្រតិកម្មខ្លាំងៗ ដោយបានប្រាប់ ព្រះអង្គម្ចាស់ រណឬទ្ធិ ឲ្យ​ចេះ​ធ្វើ​នយោបាយ​ផ្ទាល់​ព្រះអង្គ។
Loading...
  • ដោយ: ដារា រិទ្ធ អត្ថបទ៖ ដារា រិទ្ធ ([email protected]) - ភ្នំពេញថ្ងៃទី២៦ កក្កដា ២០១៥
  • កែប្រែចុងក្រោយ: July 28, 2015
  • ប្រធានបទ: នយោបាយ
  • អត្ថបទ: មានបញ្ហា?
  • មតិ-យោបល់

«ពីមុនតាមស៊ីកេរ្តិ៍ព្រះបិតា ឥឡូវមកតាមស៊ីកេរ្តិ៍ ព្រះរាជអានុជទៀត។ សុំប៉ុណ្នឹងបានទេ ឲ្យចេះឈរលើ ជំហរ​ខ្លួនឯងបានទេ។ ព្រះអង្គគួរតែចេះធ្វើនយោបាយ ដោយខ្លួនព្រះអង្គផ្ទាល់ កុំចាំតែព្រះបិតា និងព្រះរាជអនុជ ​អញ្ចឹង។» នេះការថ្លែងព្រមាន របស់លោក ហ៊ុន សែន នាយករដ្ឋមន្ត្រីកម្ពុជា ដើម្បីជា«ការស្រោចទឹក​មួយ​គ្រែ» ឲ្យទៅអតីតគូសត្រូវនយោបាយ ព្រះអង្គម្ចាស់ នរោត្ដម រណឫទ្ធិ។

ប្រតិកម្មខ្លាំងៗ​របស់​លោកនាយករដ្ឋមន្រ្តី បានធ្វើឡើងជាការតបតរ ទៅនឹងបន្ទូលរបស់ព្រះអង្គម្ចាស់ នរោត្ដម រណឫទ្ធិ ដែល​កាលពីព្រឹក​ថ្ងៃ​សៅរ៍ ទី២៥ ខែកក្កដា នៅមជ្ឈមណ្ឌលកោះពេជ្រ បានអះអាងថា ព្រះអង្គម្ចាស់​បានឭថា ព្រះ​មហាក្សត្រកម្ពុជា ទ្រង់គ្រោងនឹង​កោះ​ហៅ​មេដឹកនាំ នៃគណបក្សទាំងបី ឲ្យចូលពិភាក្សាគ្នា ពី​បញ្ហា​ព្រំដែន​កម្ពុជា​។ ក្នុងជំនួបជា​មួយក្រុមយុវជន នាពេលនោះ ព្រះអង្គម្ចាស់ រណឫទ្ធិ ដែលជាប្រធាន​គណបក្ស​​ហ្វុនស៊ីនប៉ិច ថែមទាំងបាន លើកមកបញ្ជាក់ទៀតថា ព្រះមហាក្សត្រកម្ពុជា មានព្រះរាជតួនាទី ក្នុង​ការ​​​ថែ​​រក្សា​​បូរណភាពទឹកដី។

ដំណឹងដែលផ្សាយព្រោងព្រាង តាមសារព័ត៌មាននានា និងជាពិសេសតាមរយៈ ទស្សនាវដ្ដីមនោរម្យ.អាំងហ្វូ លេខចេញផ្សាយ ក្នុងល្ងាចថ្ងៃសៅរ៍នោះ បានបង្កឲ្យមានការភ្ញាក់ផ្អើលជាទូទៅ ហើយក៏មិនអាចជៀសផុត ពី​ត្រជៀករបស់លោកនាយករដ្ឋមន្ត្រីដែរ។ ដោយហេតុនេះហើយ ទើបលោក ហ៊ុន សែន បានផ្ញើសារសួរ​ព្រះ​អង្គ​ម្ចាស់ រណឬទ្ធិ ពីបញ្ហាទាំងនេះ កាលពីយប់ថ្ងៃអាទិត្យ។ នេះបើតាមការអះអាង របស់លោក ហ៊ុន សែន ដែល​បានថ្លែង ក្នុងពិធីបុណ្យចម្រើនព្រះជន្ម ប្រគេនព្រះសង្ឃ នន្ទ ង៉ែត សម្តេចព្រះសង្ឃនាយក នៃប្រទេសកម្ពុជា នៅ​ព្រឹកថ្ងៃច័ន្ទ ទី២៧ ខែកក្កដានេះ។

«ធ្វើនយោបាយ... រហូតគ្មានមួយកៅអី»

ចម្លើយដែលបាន ពីព្រះអង្គម្ចាស់ រណឫទ្ធិ មកវិញ គឺព្រះអង្គម្ចាស់​បានឮព័ត៌មានទាំងនេះ ពីមនុស្សម្នាក់ ដែល​លោក ហ៊ុន សែន ចាត់ទុក ថាជាមនុស្ស«គ្មាន»ប្រយោជន៍។ លោក ហ៊ុន សែន អតីត​នាយក​រដ្ឋមន្ត្រី​ទីពីរ បាន​ប្រតិកម្មខ្លាំងៗ ដាក់អតីតដៃគូខ្លួន ដែលជាអតីតនាយករដ្ឋមន្ត្រីទីមួយ នៅ​ក្នុងរដ្ឋាភិបាល​អាណត្តិ​ដំបូងថា ប្រសិន​ជានៅតែបន្ត សកម្មភាពបែបនេះទៀត ព្រះអង្គម្ចាស់ រណឫទ្ធិ នឹង​គ្មាន​កៅអីអង្គុយ នៅ​ក្នុង​រដ្ឋសភា​ឡើយ។ លោក​នាយករដ្ឋមន្ត្រី បានយកដំបៅចាស់ ដ៏ចុកចាប់ របស់ព្រះអង្គម្ចាស់ រណឫទ្ធិ មក​រំលឹក​ថា ធ្វើ​នយោបាយ​តាំង​ពីមានអសនៈ ក្នុងរដ្ឋសភា រហូតដល់អត់មានអសនៈហើយ នៅ​តែបន្ត​សកម្មភាព​បែបនេះ នា​ពេល​បច្ចុប្បន្ន​ទៀត។

«រាជានិយមអីតែឯង...»

លោក ហ៊ុន សែន ថ្លែងឡើងថា៖ «ព្រះអង្គត្រូវចាំថា រាជានិយមនេះ ជារបស់ជាតិ មិនមែនជារបស់ ព្រះអង្គតែ​ម្នាក់ឯងនោះទេ»។

ចំពោះបន្ទូល របស់ព្រះអង្គម្ចាស់ រណឫទ្ធិ ខាងលើ ក៏ត្រូវបានព្របរមរាជវាំង ចេញលិខិតប្រកាស​ព័ត៌មាន​មួយ បដិសេធការលើកឡើងនេះ ថាជាការមិនពិតដែរ។ សេចក្តីប្រកាសព័ត៌មាន ដែលបានចេញផ្សាយ ក្នុងថ្ងៃទី២៧ ខែ​កក្កដា នេះបានសរសេរទៀតថា៖ «បើមានកិច្ចពិភាក្សា ពី​បញ្ហាសំខាន់ៗ ទាក់ទងនឹងប្រទេសជាតិនោះ ព្រះ​ករុណា ព្រះមហាក្សត្រ (...) ព្រះអង្គ​នឹង​ពិគ្រោះយោបល់ជាមួយ សម្តេចអគ្គមហាសេនាបតីតេជោ ហ៊ុន សែន នាយក​រដ្ឋមន្រ្តី នៃព្រះ​រាជា​ណាចក្រ​កម្ពុជា ក្នុងនាមថ្នាក់ដឹកនាំកំពូល នៃអង្គនិតិប្រតិបត្តិ ហើយព្រះអង្គ ក៏មិន​មាន​ទម្លាប់​ពិគ្រោះ​យោបល់ ជាមួយ​គណបក្សនយោបាយឡើយ។»

ព្រះរាជាពិភាក្សារឿងអី «ថ្វាយជូន»ភ្លាម!

សេចក្ដីនៅក្នុងលិខិត របស់ព្រះរាជវាំងខាងលើ មិនខុសគ្នាពីការលើកឡើង របស់លោក ហ៊ុន សែន ក្នុងថ្ងៃតែ​មួយនោះទេ។ នាយករដ្ឋមន្ត្រីបីទសវត្សន៍ របស់កម្ពុជា បានអះអាងថា លោកបានដង្ហែ តាមព្រះមហាក្សត្រ រយៈ​ពេល១១ឆ្នាំហើយ ព្រះមហាក្សត្រមិនប៉ះពាល់ ជាមួយគណបក្សនយោបាយទេ។ លោក ហ៊ុន សែន បាន​និយាយ​ទៀតថា ហើយបើមានបញ្ហអ្វី ព្រះរាជានឹងពិភាក្សា ជាមួយនាយករដ្ឋមន្រ្តីតែម្តង ហើយនាយករដ្ឋមន្រ្តី «ថ្វាយជូន»ព្រះអង្គភ្លាម។

បុរសខ្លាំងកម្ពុជា បានប្រកាសទៀតថា៖ «នេះខ្ញុំអង្វរក មិនថារាស្រ្ត មិនថារាជវង្សទេ សូមមេត្តាកុំយក​ព្រះ​មហាក្សត្រ យកមកធ្វើជាល្បែង លេងសើច តាមរយៈព័ត៌មាន មិនគ្រប់ជ្រុងជ្រោយ កុំយកបញ្ហានេះ មកធ្វើជា​ល្បែងលេង សើចនៅក្នុង បញ្ហាជាតិរបស់យើង ដែលជាការទាញព្រះមហាក្សត្រ ឲ្យអាប់ឱនព្រះរាជកិត្តិយស តាមរយៈមហិច្ចតានយោបាយរបស់ខ្លួន។»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...