លោក សុខ ប៊ុន កំពុងស្ថិតក្រោមការសាកសួរ របស់ចៅក្រមសើមសួរ លោក លាង សំណាត់ លើករណីការ​ប្រើ​ហឹង្សាជាក្រុម ទៅលើអតីត ពិធីការិនីទូរទស្សន៍ នាង ឯក សុជាតា ហៅកញ្ញា សាសា។ នេះបើតាមការអះអាង របស់ភ្នាក់ងារឆ្លើយឆ្លងព័ត៌មាន នៃទស្សនាវដ្តីមនោរម្យ.អាំងហ្វូ ដែលបានប្រចាំការ នៅសាលាដំបូង​រាជធានី​ភ្នំពេញ នៅព្រឹកថ្ងៃទី១៨ ខែកក្កដា ឆ្នាំ២០១៥។

ការនាំខ្លួនលោក សុខ ប៊ុន មកកាន់តុលាការនេះ បានធ្វើឡើង បន្ទាប់ពីលោកនាយករដ្ឋមន្រ្តី ហ៊ុន សែន កាល​ពីថ្ងៃទី១៦ ខែកក្កដា បានប្រកាស ឲ្យបុរសអ្នកមានប្រាក់រូបនេះ ចូលខ្លួនមកកាន់តុលាការ និងបញ្ជាឲ្យមាន​ការ​នាំខ្លួនជាបន្ទាន់ ដោយមិនអាចរង់ចាំបានឡើយ។

លោកនាយករដ្ឋមន្រ្តីកម្ពុជា បានថ្លែងនៅពេលនោះថា៖ «ទោះក្មួយស្រី សាសា មិនប្តឹង ក៏ផ្នែករដ្ឋ ផ្នែកតុលាការ ត្រូវតែធ្វើសកម្មភាពដែរ។ (…) បើទោះជាក្មួយស្រី សាសា ធ្វើការសម្រុះសម្រួលជាមួយលោក សុខ ប៊ុន ក៏ផ្លូវ​តុលាការ មិនអនុញ្ញាត ឲ្យសំណុំរឿងនេះរួចដែរ។ ព្រោះវាជាសំណុំរឿងព្រហ្មទណ្ឌ។ (…) រឿងព្រហ្មទណ្ឌ​ហើយ ទោះបីជាសម្រួលគ្នា ក្រៅតុលាការ ប៉ុន្តែឲ្យរលត់បណ្តឹងអាជ្ញា គឺអត់ទៅរួចទេ»។

រដ្ឋមន្រ្តីក្រសួងមហាផ្ទៃ លោក ស ខេង កាលពីថ្ងៃទី១៤ ខែកក្កដា ឆ្នាំ២០១៥ ក៏បានថ្លែងបញ្ជា ឲ្យសមត្ថកិច្ច​ជំនាញ និងពាក់ព័ន្ធគ្រប់ជាន់ថ្នាក់ ត្រូវតាមស្វែងរកចាប់ខ្លួន លោក សុខ ប៊ុន មកចាត់ការតាមផ្លូវច្បាប់ ទោះបី​ជារត់គេច ឬលាក់ខ្លួននៅក្រហែងណា ក៏ដោយ។

ដោយឡែក កញ្ញា សាសា ដែលជាដើមបណ្ដឹង ត្រូវបានតុលាការសាកសួរ កាលពីថ្ងៃទី១៧ ខែកក្កដា មួយថ្ងៃ​មុនការនាំខ្លួន លោក សុខ ប៊ុន មកកាន់តុលាការ នាព្រឹកនេះ។ មកទល់ម៉ោង ជិត១១ព្រឹកថ្ងៃទី១៨ ខែកក្កដា ឆ្នាំ២០១៥នេះ លោក សុខ ប៊ុន កំពុងស្ថិតនៅក្តោមការសាកសួរ របស់លោកចៅក្រមស៊ើបសួរនៅឡើយ។

ទស្សនាវដ្តីមនោរម្យ.អាំងហ្វូមិនអាចសុំប្រតិកម្មពីលោក ពុធ ធាវី មេធាវិការពារកញ្ញា សាសា បានទេនា​ព្រឹក​នេះ ដោយលោកពុំទទួលទូរស័ព្ទ៕