ហេតុការណ៍បាក់រន្ទា សម្រាប់ទ្រសង់អាគារ ធ្លាក់មកលើកម្មករនេះ បានកើតឡើង កាលពីវេលាម៉ោង ប្រមាណ​ជា៩ ព្រឹក ថ្ងៃទី ១៥ ខែកក្កដា ឆ្នាំ២០១៥ នៅក្នុងការដ្ឋាន សាងសង់មួយកន្លែង ស្ថិតក្នុងភូមិត្រពាំងថ្លឹង សង្កាត់​ចោមចៅ ខណ្ឌពោធ៍សែនជ័យ រាជធានីភ្នំពេញ។ បើតាមការបញ្ជាក់ភ្លាមៗ ពីកន្លែងកើតហេតុ របស់លោក យឹម សារ៉ាន់ អធិការនគរបាលខណ្ឌ ពោធ៍សែនជ័យ បានឲ្យដឹងថា មិនទាន់រកដឹង ពីចំនួនអ្នកស្លាប់និងរបួសទេ ព្រោះ​សង្កត់ច្រើនជាន់តគ្នា។

រយៈពេលប្រមាណជា៣០ នាទីក្រោយ ទើបគេឃើញមានអ្នករងគ្រោះ ត្រូវបានឡាន របស់កងវរៈសេនា​តូច​លេខ៧១១ ម៧០ ដឹកបញ្ជូនទៅមន្ទីពេទ្យរូស្ស៊ី ចំនួនពីរនាក់ (អ្នករងរបួសធ្ងន់)។ រីឯអ្នករងគ្រោះថ្នាក់ដល់​ជីវិត ត្រូវបានគេស្គាល់ថា ឈ្មោះ វ៉ា សុខ ភេទប្រុស អាយុ ៥២ឆ្នាំ មានស្រុកកំណើត នៅឃុំកំពង់ភ្នំ ស្រុក​លើក​ដែក ខេត្តកណ្តាល។

ភ្លាមៗ គេនៅមិនទាន់ដឹង ពីមូលហេតុ ដែលធ្វើឲ្យរន្ទាទាំងនេះ បានបាក់ធ្លាក់នោះទេ ខណៈការស៊ើបអង្កេត កំពុងបន្តធ្វើនៅឡើយ។

បច្ចុប្បន្ន ការដ្ឋានសាងសង់នោះ ត្រូវបានអាជ្ញាធរ ធ្វើការផ្អាក ជាបណ្តោះអាសន្ន ដើម្បីដោះស្រាយបញ្ហា របស់​កម្មករសំណង់ខាងលើ។ រីឯសពរបស់ជនរងគ្រោះ ត្រូវបានប្រគល់ជូន ទៅគ្រួសារ ដើម្បីយកទៅធ្វើបុណ្យ បន្ទាប់​ពីធ្វើកោសលវិច័យរួច៕