សុខ ប៊ុន ល្បីខាងចាប់រំលោភ និងវាយតប់?
- ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) - ភ្នំពេញ ថ្ងៃទី១៤ កក្កដា ២០១៥
- កែប្រែចុងក្រោយ: July 14, 2015
- ប្រធានបទ: យុត្តិធម៌
- អត្ថបទ: មានបញ្ហា?
- មតិ-យោបល់
-
ខណៈប្រភពពីមន្ត្រីសមត្ថកិច្ច នៅក្រសួងមហាផ្ទៃ បានប្រាប់ សារព័ត៌មានក្នុងស្រុកមួយ ថា លោកឧកញ៉ា សុខ ប៊ុន ត្រូវបាននារីជនជាតិជប៉ុនម្នាក់ ដែលជាមិត្តភ័ក្រ របស់អតីតពិធីការិនីទូរទស្សន៍ នាង ឯក សុជាតា ហៅកញ្ញា សាសា ប្ដឹងពីបទរំលោភសេពសន្ថវៈនោះ មានសាក្សីស្ត្រីម្នាក់ផ្សេងទៀត បានថ្លែងប្រាប់ទស្សនាវដ្ដីមនោរម្យ.អាំងហ្វូថា លោកឧកញ៉ា សុខ ប៊ុន ជាមនុស្សចូលចិត្តវាយតប់ ធ្វើបាបស្ត្រីម្នាក់។
តាមប្រភពព័ត៌មាន ពីស្រ្តីម្នាក់ ដែលអះអាង ថាខ្លួនធ្លាប់រងគ្រោះ ដោយការវាយដំដូចកញ្ញា សាសា ដែរនេះ បានថ្លែងប្រាប់ទស្សនាវដ្ដីថា ក្រៅពីខ្លួន នៅមានស្រ្តីមួយចំនួនទៀត តែងរងគ្រោះដោយអំពើហិង្សា ពីលោកឧកញ៉ា សុខ ប៊ុន នៅពេលដែលបុរសរូបនេះ ទៅស៊ីផឹកនៅហាងម្តងៗ។ ថ្លែងក្នុងលក្ខខណ្ឌមិនបញ្ចេញឈ្មោះ ស្រ្តីរូបនេះបានបញ្ជាក់ថា ព្រោះតែខ្លាច«អំណាច» ទើបកន្លងមក មិនដែលមានការប្តឹងផ្តល់អ្វីឡើយ ហើយសុខចិត្តទ្រាំឈឺតាមកម្ម។ នាងបានបន្តថា៖ «បើមិនបានវាយស្រ្តីម្តង ប្រហែលជាលោក សុខ ប៊ុន នេះទទួលទានបាយមិនឆ្ងាញ់ទេ មើលទៅ»។
រីឯសារព័ត៌មាន«កម្ពុជាថ្មី» ដែលមានឈ្មោះបោះសម្លេង តាំងពីយូរមកហើយនោះ បានរាយការណ៍ នៅក្នុងអត្ថបទរបស់ខ្លួនថា មន្ត្រីបម្រើការងារ នៅនាយកដ្ឋាននគរបាលព្រហ្មទណ្ឌ ក្រសួងមហាផ្ទៃបានទម្លាយឲ្យដឹងនៅម៉ោង១០និង៣០នាទី ព្រឹកថ្ងៃទី១៤នេះថា លោកឧកញ៉ា សុខ ប៊ុននាយកក្រុមហ៊ុន សុខ ប៊ុន ហ្គ្រូប (SBG) និងប្រធានសមាគមវាយតម្លៃ អចលនវត្ថុនៅកម្ពុជា នៅជាប់បណ្តឹងមួយផ្សេងទៀត ពីស្ត្រីជនជាតិជប៉ុន ជាថៅកែហាង ដែលជាមិត្តភ័ក្ដិកញ្ញា សាសា ពីបទរំលោភសេពសន្ថវៈ។
ប្រភពដដែលនោះ បានឲ្យដឹងថា ស្ត្រីជនជាតិជប៉ុន ដែលប្តឹងឧកញ៉ាសុខ ប៊ុន ពីបទរំលោភសេពសន្ថវៈ ធ្លាប់ត្រូវបានលោកឧកញ៉ារូបនោះ ចាប់យកទៅរំលោភ ធ្វើបាបម្តងរួចមកហើយ។ មន្ត្រីនាយកដ្ឋាននគរបាលព្រហ្មទណ្ឌ បានឲ្យដឹងទៀតថា ពាក្យបណ្ដឹងរបស់ស្ត្រីជនជាតិជប៉ុននោះ ត្រូវបានសមត្ថកិច្ច សហការជាមួយមេធាវីការពារក្តី កំពុងដំណើរការទៅមុខ ហើយសំណុំរឿងនោះ បានរៀបចំបញ្ជូន ទៅកាន់សាលាដំបូង រាជធានីភ្នំពេញរួចហើយ។
ទស្សនាវដ្តីមនោរម្យ.អាំងហ្វូមិនអាចសុំការបកស្រាយ ពីលោក យិន សុភ មេធាវីការពារក្ដី របស់ភាគីលោកឧកញ៉ា សុខ ប៊ុន បានទេ ដោយទូរស័ព្ទរបស់លោក គ្មានអ្នកទទួល។
ដោយឡែក រហូតមកដល់វេលានេះ ស្ត្រីជនជាតិជប៉ុន ដែលនៅក្នុងហេតុការណ៍នេះ មិនត្រូវបានគេបង្ហើបថា មានឈ្មោះអ្វី និងនៅទីណាឡើយ។ កញ្ញា សាសា ធ្លាប់ថ្លែងប្រាប់សារព័ត៌មាន ខេមប៊ូឌៀដេល្លី ថា មិត្តភ័ក្រជប៉ុនរបស់នាង បានលាក់ខ្លួន ឬបានវិលត្រឡប់ ទៅប្រទេសជប៉ុនវិញហើយ ដោយខ្លាចពីសុវត្ថិភាពផ្ទាល់ខ្លួន ក្នុងនាមជាសាក្សីមួយរូបនោះ។
នៅបន្ទាប់ពីហេតុការណ៍ វាយតប់ បោចសក់ បានផ្ទុះឡើងដំបូង កញ្ញា សាសា បានអះអាងដែរថា លោកឧកញ៉ាសុខ ប៊ុន បាននាំស្ត្រីជាតិជប៉ុន ជាមិត្តភ័ក្ដិរបស់ខ្លួនម្នាក់នេះ ទៅធ្វើបាបម្តងរួចមកហើយ ទើបនៅយប់ថ្ងៃកើតហេតុ ឧកញ៉ារូបនេះ បានព្យាយាមមកអូសនាងទៅទៀត។ ប៉ុន្តែហេតុការណ៍ បានផ្ទុះទៅជារឿង ដោយសារស្ត្រីជប៉ុន ដែលទំនងជាស្រវឹងខ្លាំងនោះ បានដឹងខ្លួន ហើយបានប្រកែក មិនព្រមទៅជាមួយឧកញ៉ា សុខ ប៊ុន ដែលធ្វើឲ្យកញ្ញា សាសា មិនដាច់ចិត្ត ចូលធ្វើអន្តរាគមន៍ រហូតផ្ទុះទៅជាអំពើហិង្សា អូសកញ្ញា សាសា ធ្លាក់ពីលើសាឡុង វាយតប់បោចសក់ ទាត់ធាក់ដូចសត្វធាតុ។
លោក ផែង វណ្ណៈ ដែលជាមន្ត្រីមួយរូប ពីក្រសួងមហាផ្ទៃដែរ ក៏បានសរសេរនៅលើគណនេយ្យហ្វេសប៊ុក របស់លោកដែរថា បើសិនជាលោកឧកញ៉ា សុខ ប៊ុន ពិតជាបាន ប្រព្រឹត្ត ដូចការរៀបរាប់នៅក្នុងបណ្ដឹង របស់នារីជប៉ុនជាដើមបណ្ដឹងមែននោះ លោក សុខ ប៊ុន អាចប្រឈមមុខនឹងមាត្រា ២៣៩ និង មាត្រា ២៤០ នៃក្រមព្រហ្មទណ្ឌ ដែលជាបទឧក្រិដ្ឋធ្ងន់ធ្ងរ ហើយនេះ គេនៅមិនទាន់រាប់បញ្ចូល ជាមួយពាក្យបណ្ដឹង របស់កញ្ញា សាសា ដែលជាបទល្មើសមជ្ឈឹម មានស្ថានទម្ងន់ទោសនោះផង។
តារាហ្វេសប៊ុកដ៏ល្បី លោក ផែង វណ្ណៈ បានស្រង់សម្ដីមន្ត្រី ដែលកាន់សំណុំរឿង មកសរសេរបន្តថា៖ «បើលោកឧកញ៉ា មិនចូលខ្លួន ហើយនៅបន្តរត់គេចនោះ សមត្ថកិច្ចនគរបាលកម្ពុជា នឹងសហការ ជាមួយនគរបាលអន្តរជាតិ ដើម្បីតាមចាប់ខ្លួន យកមកផ្ដន្ទាទោស»៕