តែ​មួយ​ព្រឹក រដ្ឋសភា​អនុម័ត​ច្បាប់ NGO ដោយ​គ្មាន​សម្លេង​ជំទាស់

តាមការគ្រោងទុក បើទោះជាមានការតវ៉ាប្រឆាំង ពីសមាគម អង្គការក្រៅរដ្ឋាភិបាល និងពីតំណាងរាស្រ្ត មក​ពី​គណបក្ស​ប្រឆាំង​ក៏​ដោយ ក៏សេចក្តីព្រាងច្បាប់ ស្រីពីសមាគម និងអង្គការក្រៅរដ្ឋាភិបាល ត្រូវបានអនុម័ត ដោយ​រដ្ឋសភា​ក្រោម​សម្លេង មក​ពី​គណបក្ស​កាន់អំណាចតែមួយ កាលពីព្រឹកថ្ងៃទី១៣ ខែកក្កដានេះ។
Loading...
  • ដោយ: អ៊ុម វ៉ារី អត្ថបទ ៖ អ៊ុម វ៉ារី ([email protected]) - យកការណ៍៖ស្រ៊ុន ទិត្យ -ភ្នំពេញថ្ងៃទី១៣ កក្កដា ២០១៥
  • កែប្រែចុងក្រោយ: July 13, 2015
  • ប្រធានបទ: ច្បាប់ NGO
  • អត្ថបទ: មានបញ្ហា?
  • មតិ-យោបល់

រដ្ឋសភា នៃប្រទេសកម្ពុជា ​បានប្រើពេលតែមួយព្រឹកប៉ុណ្ណោះ ដើម្បីសម្រេចអនុម័ត​ លើ​សេចក្តីព្រាងច្បាប់ ដ៏ ចម្រូង​ចម្រាស ស្ដីពីសមាគម និងអង្គការក្រៅរដ្ឋាភិបាល នៅក្នុងសម័យ​កិច្ច​ប្រជុំ​ ដែល​មាន​របៀប​វារៈ​ចំនួន​ពីរ (ទី​​មួយ​​ការបោះឆ្នោត​ ជ្រើ​សតាំង​តំណាងរាស្រ្ត​​ លោក កែ​វ ពិសិដ្ឋ ជាសមាជិក​គណៈកម្មការ​នីតិកម្ម និង​យុត្តិធម៌​ និង​ទី​ពីរ​ការពិភាក្សា និង​អនុម័ត ​​លើ​សេចក្តីព្រាង​ច្បាប់ ​សមាគម និង​អង្គការ​មិនមែន​រដ្ឋាភិបាល) ដោយ​មាន​ការ​ចូលរួម តែពីតំណាងរាស្រ្ត​គណបក្សប្រជាជនកម្ពុជា​ ចំនួន​​៦៨រូបប៉ុណ្ណោះ​។

រដ្ឋមន្រ្តីក្រសួងសាមី ដែលបានចេញ សេចក្តីព្រាងច្បាប់នេះ បានឡើងការពារ ចំពោះមុខសភាពេញអង្គ នា​ព្រឹក​ថ្ងៃទី១៣ ខែកក្កដា ឆ្នាំ២០១៥នេះថា ដើម្បីកម្ពុជា មានលិទ្ធិប្រជាធិបតេយ្យពិតប្រាកដនោះ ចាំបាច់ត្រូវ​តែ​មាន​ច្បាប់នេះ ជាដាច់ខាត។

លោក ស ខេង រដ្ឋមន្រ្តីក្រសួងមហាផ្ទៃ បានលើកឡើងក្នុងសភាថា ការពិត គោលបំណងចំបងនៃច្បាប់នេះ មិន​មែនជាការគាបសង្កត់ ឬបិទសិទ្ធិ ឬសេរីភាពនៃអង្គការ សមាគម ឬសង្គមស៊ីវិលនោះឡើយ។ លោកបន្តថា អ្វី​ដែលចាំបាច់នោះ គឺការត្រួតពិនិត្យ លើហិរញ្ញវត្ថុ នៃអង្គការទាំងនោះ ដើម្បីឲ្យពួកគាត់ប្រើប្រាស់ ស្របតាម​ច្បាប់ ត្រូវទិសដៅ និងបានផលប្រយោជន៍ពិតប្រាកដ មកលើពលរដ្ឋ និងកម្ពុជា។ លោកបញ្ជាក់ទៀតថា៖ «ច្បាប់​នោះ ធ្វើឡើងដោយគោរព តាមមាត្រា៤២ នៃរដ្ឋធម្មនុញ្ញ»។

រដ្ឋមន្ត្រីក្រួសួងមហាផ្ទៃ ដែលជាប្រធានតំណាងរាស្រ្ត មតិភាគច្រើន មកពីគណបក្សកាន់អំណាចផងនោះ បាន​អានមាត្រា៤២ នៃរដ្ឋធម្មនុញ្ញ មកបញ្ជាក់ថា៖ «ប្រជាពលរដ្ឋខ្មែរ មានសិទ្ធិបង្កើតសមាគម និងគណបក្ស​នយោបាយ។ សិទ្ធិនេះត្រូវកំណត់ក្នុងច្បាប់។ ប្រជាពលរដ្ឋខ្មែរទាំងឡាយ អាចចូលរួមក្នុងអង្គការមហាជន ជួយ​គ្នាទៅវិញទៅមក ការពារសមិទ្ធិផលជាតិ និង សណ្ដាប់ធ្នាប់សង្គម។»

ស្របពេលដែលក្រុមតំណាងរាស្ត្រ មកពីគណបក្សកាន់អំណាច កំពុងជជែកនៅក្នុងរដ្ឋសភានោះ តំណាង​រាស្រ្ត​បក្សសង្គ្រោះជាតិ ដែលជាក្រុមសម្លេងភាគតិចក្នុងសភា ហើយបានធ្វើពហិការមិនចូលរួម ក្នុងការ​អនុម័ត​ច្បាប់នោះ បានចូលរួមជាមួយពលរដ្ឋ និងអង្គការសង្គមស៊ីវិល ដើម្បីធ្វើការតវ៉ាប្រឆាំង ទៅនឹងការអនុម័ត​សេចក្ដី​ព្រាងច្បាប់នេះ នៅខាងក្រៅរដ្ឋសភា។

ពលរដ្ឋ និងអង្គការសង្គមស៊ីវិលទាំងនោះ ធ្លាប់បានព្រមាមរួចហើយថា បើគណបក្សណាមួយ ដែលបោះឆ្នោត គាំទ្រសេចក្តីព្រាងច្បាប់នេះ ក្នុងនាមពួកគេ ជាសម្លេងម្ចាស់ឆ្នោតម្នាក់ដែរនោះ នឹងមិនបោះឆ្នោត ឬគាំទ្រ​បក្ស​នោះទៀតឡើយ។ ពួកគេយល់ឃើញថា សេចក្តីព្រាងច្បាប់នេះ មានលក្ខណៈរឹតត្បិត សិទ្ធិសេរីភាព របស់​ពួក​គេ។

សម្រាប់អ្នកនាំពាក្យ និងជារដ្ឋលេខាធិការ ទីស្តីការគណៈរដ្ឋមន្ត្រី លោក ផៃ ស៊ីផាន បានចាត់ទុកថា ការ​ធ្វើ​ពហិការ មិនចូលរដ្ឋសភា នៃតំណាងរាស្រ្តមកពីគណបក្សប្រឆាំងខាងលើនេះ បាននឹងកំពុងធ្វើ ឲ្យ​គណបក្ស​មួយនេះ ប្រឈមនឹងការអន្តរាយ ព្រោះតែតំណាងរាស្រ្តនៃគណបក្សខ្លួន៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...