ទង្វើហិង្សាវាយតប់ ទាត់ធាក់ បោចសក់ ដែលត្រូវបានវីដេអូចំនួនពីរ អះអាងថា ជាការប្រព្រឹត្តិ របស់លោក​ឧកញ៉ា សុខ ប៊ុន ធ្វើទៅលើអតីតពិធីការិនីទូរទស្សន៍ កញ្ញា សាសា នោះ អាចនឹងត្រូវផ្ដន្ទាទោស ដោយក្រម​ព្រហ្មទណ្ឌនៃព្រះរាជាណាចក្រកម្ពុជា ដោយតម្រូវឲ្យជនល្មើស ត្រូវជាប់ពន្ធនាគារ ពី២ទៅ៥ឆ្នាំ ជាមួយនឹង​សំណងជំងឺចិត្ត ផ្សេងទៀត។

លោក​មេធាវី សុក សំអឿន អតីតនាយកប្រតិបត្តិ ក្រុម​អ្នក​ច្បាប់​ដើម្បី​សិទ្ធិ​កម្ពុជា បានពន្យល់ករណីនេះ ប្រាប់​ទស្សនាវដ្ដីមនោរម្យ.អាំងហ្វូថា ការវាយតប់ឃើញនៅក្នុងវីដេអូនោះ ជាបទបង្ករបួសស្នាម ដោយចេតនា ដែល​មានស្ថានទម្ងន់ទោស បង្កឡើងជាក្រុម (ជនបង្កមានគ្នាពីរនាក់) ហើយនេះជាបទមជ្ឈឹម (មិនមែនជា​បទ​ឧក្រិដ្ឋ)។ ប៉ុន្តែជនបង្កម្នាក់ ពីក្នុងចំណោមទាំងពីរនាក់ អាចនឹងទទួលការផ្ដន្ទាទោស ដោយច្បាប់របស់កម្ពុជា ពី២ ទៅដល់៥ឆ្នាំ។ ក្នុងករណី ដែលមានការប្រើប្រាស់អាវុធ ជាជំនួយផងនោះ ការផ្ដន្ទាទោស ក៏ត្រូវមើល​ទៅ​តាមនេះថែមទៀត ប៉ុន្តែលោក សំអឿន បានអះអាងថា វាអាស្រ័យទៅលើតុលាការ ដែលជាអ្នកស្វែងរក​ភស្ដុតាង និងសាក្សី ដើម្បីផ្ដល់យុត្តិធម៌ឲ្យជនរងគ្រោះ។

បើមានការសម្របសម្រួល...

ចំពោះសំនួរដែលសួរថា ប្រសិនជាក្នុងករណី មានការសម្របសម្រួលណាមួយ រវាងភាគីទាំងសងខាង នៅ​ខាង​ក្រៅប្រព័ន្ធតុលាការ តើសំនុំរឿងនេះ នឹងត្រូវបិទបញ្ចប់ឬយ៉ាងណា? លោកមេធាវី បានថ្លែងឲ្យដឹងថា អាច​បញ្ចប់​បាន ត្រឹមតែផ្នែករដ្ឋប្បវេណីប៉ុណ្ណោះ ប៉ុន្តែខាងផ្នែកព្រហ្មទណ្ឌវិញ អាជ្ញាធរមានសមត្ថកិច្ច របស់កម្ពុជា ត្រូវ​តែ​បន្តនិតិវិធី រហូតចប់ចុងចប់ដើម។ លោកបានពន្យល់ថា បទល្មើសនេះ ជាបទល្មើសដែលមិនចាំបាច់ មាន​ពាក្យបណ្ដឹង ហើយថែមទាំងសាធារណជន បានដឹងឮគ្រប់គ្នានោះទៀត។ ដូច្នេះបើទោះជាជនរងគ្រោះ មិន​ដាក់ពាក្យបណ្ដឹងក៏ដោយ ក៏អាជ្ញាធរនគរបាល ចាំបាច់​ត្រូវ​បញ្ជូនរឿងនេះ ឡើងទៅតុលាការ ហើយ​តុលាការ ត្រូវតែបើកសវនាការកាត់ទោស ដើម្បីរកយុត្តិធម៌ឲ្យជនរងគ្រោះ។ នីតិវិធីខាងលើនេះ មានរួម​បញ្ចូល ទាំងការស្វែងរកភស្តុតាង និងតាមចាប់ជនល្មើស បើទោះជាជនល្មើសនោះ បានភៀសខ្លួន ទៅបរទេស​ក៏​ដោយ។

លោក សុក សំអឿន បានថ្លែងឲ្យដឹងថា៖ «មានបទល្មើសខ្លះ អូខេ (OK) ដូចជាបទបរិហាកេរ្ដ៍អី បើសាមីខ្លួន​គេ​ដកពាក្យបណ្ដឹងអី (វា)អាចចប់។ (...) តែនេះ ជារឿង (បង្ករបួសស្នាម ដោយចេតនា) ដូចជាអត់ត្រូវ (បញ្ចប់) ទេ។ យ៉ាងច្រើនណាស់ បើសិនជា គេរកទៅឃើញថា គាត់ (ជនល្មើស) អត់ប្រើអាវុធ អត់មានគ្នា គាត់ធ្វើតែ​ម្នាក់ឯង អញ្ចឹងវាអាចត្រឹមបទ ប្រើហិង្សាដោយចេតនា ដែលគ្មានស្ថានទម្ងន់ទោស។ វាអាច (ជាប់ពន្ធនាគារ) ពី១ឆ្នាំទៅបីឆ្នាំ ហើយអាណ្នឹងតុលាការអាចមានឆន្ទានុសិទ្ធិ ដោយមិនបាច់ដាក់គុកបាន អាចឲ្យនៅព្យួរអី​បាន។»

គប់ទូរស័ព្ទ?

ចំពោះសំនួរទាក់ទង នឹងការគប់ទូរស័ព្ទ របស់ជនរងគ្រោះ ទៅលើជនបង្ក ថាតើជនបង្កអាចប្ដឹងជនរងគ្រោះ​វិញ ពីការបង្ករបួសស្នាម លើខ្លួនបានឬទេ? អ្នកច្បាប់ដ៏ល្បីឈ្មោះរូបនេះ បានអះអាងថា បើនាងនោះគប់ទៅ ត្រូវ​ចំ​មនុស្ស មានរបួសមែន នោះជនបង្ក ពិតជាអាចប្ដឹង ជនរងគ្រោះបាន ពីបទបង្កហិង្សា ដោយចេតនា។ ប៉ុន្តែ​ត្រូវ​មើល​បន្តទៅទៀត ថាហេតុអ្វីបានជនរងគ្រោះ បានគប់ទូរស័ព្ទនោះទៅ ហើយគប់ទៅត្រូវលើអ្វីខ្លះ? លោក​បាន​ពន្យល់ឲ្យដឹងទៀតថា៖ «បើសិនជាអត់របួស ហើយគាត់គ្រាន់តែគប់ចោល ខឹងអីអញ្ចឹងទៅ ឧទាហរណ៍​អី​អញ្ចឹង អាណ្នឹងវាដូចជា យើងខឹងគ្នា យើងគប់ចានចោល (...) ដូច្នេះវាអត់មែនជា អំពើហិង្សាដោយ​ចេតនា​ទេ»។

សូមបញ្ជាក់ដែរថា អំពើហិង្សា ប្រព្រឹត្តិការវាយតប់ ទាត់ធាក់ បោចសក់នេះ កំពុងស្ថិតក្នុងចំណាត់ការ របស់​តុលាការ សាលា​ដំបូង​រាជធានីភ្នំពេញ។ កាលពីល្ងាចម្សិលម្ង៉ៃ តុលាការបានចេញដីការ ឲ្យនាំខ្លួន លោក​ឧកញ៉ា សុខ ប៊ុន ដែល​ជាប់​សង្ស័យ ជាអ្នកដៃដល់ ជាមួយនឹងអង្គរក្សខ្លួននោះ ដើម្បីចូលខ្លួនមកឆ្លើយបំភ្លឺ។ តែបើតាមប្រភព មិន​ផ្លូវការ​មួយ បានឲ្យទស្សនាវដ្ដីមនោរម្យ.អាំងហ្វូ ដឹងថា លោកឧកញ៉ា សុខ ប៊ុន បាន​ធ្វើ​ដំណើរ ទៅកាន់​ប្រទេស​សិង្ហបូរី​បាត់​ហើយ៕