សាសា ថាជនដែលវាយនាង បានទូរស័ព្ទមកសុំទោស
- ដោយ: ដារី អត្ថបទ ៖ ដាវី ([email protected]) - ភ្នំពេញ ថ្ងៃទី ០៩ កក្កដា ២០១៥
- កែប្រែចុងក្រោយ: July 09, 2015
- ប្រធានបទ: យុត្តិធម៌
- អត្ថបទ: មានបញ្ហា?
- មតិ-យោបល់
-
តើនៅព្រះរាជាណាចក្រកម្ពុជា គេពិតជាអាចវាយតប់នរណាម្នាក់ បានស្រេចនឹងចិត្តឬ ប្រសិនជាម្នាក់នោះ មិនមានឈ្មោះបោះសម្លេង? ដើម្បីដឹងពីចម្លើយនេះ កញ្ញា សាសា ដែលមានឈ្មោះ ឯក សុជាតា និងជាជនរងគ្រោះ ក្នុងអំពើវាយតប់ដ៏ហិង្សាឃោឃៅ ពីសំណាក់ជនម្នាក់ កាលពីយប់ថ្ងៃទី២ ខែកក្កដានោះ បានបង្ហើបថា ជនដ៏ព្រៃផ្សៃនោះ បានទូរស័ព្ទមកនាង ដើម្បីធ្វើការសុំទោស ដោយអះអាងថា ខ្លួនមិនបានស្គាល់កញ្ញា ជានរណា។
នៅលើគណនេយ្យហ្វេសប៊ុក របស់កញ្ញា សាសា អតីតតារាទូរទស្សន៍ ស៊ីធីអិន រូបនេះ បានសរសេរតប ទៅនឹងការសួរសុខទុក្ខ របស់ញាតិមិត្ត ដែលទំនងជា«ជីដូន»ម្នាក់ របស់កញ្ញាថា៖ «ពេលគាត់តេមកចៅ កាលពីម្សិលមិញ គាត់ថា គាត់សុំទោស គាត់ស្រវឹងខ្លាំង ហេីយគាត់អត់ស្គាល់ចៅ ថាជានរណា?»
អតីតតារាទូរទស្សន៍ មិនបានបញ្ជាក់ថា «គាត់»នោះ ជានរណាទេ។ ប៉ុន្តែបើតាមដីការឲ្យនាំខ្លួន របស់សាលាដំបូងរាជធានីភ្នំពេញ និងតាមរយៈវីដេអូចំនួនពីរ ដែលថតដោយកាម៉េរ៉ាសុវត្ថិភាព នៅក្នុងក្លឹបឡាហ្គេនបា ស្ថិតនៅសង្កាត់ទន្លេសាបាក់ ខណ្ឌចំការមននោះ បានធ្វើឲ្យគេយល់ថា «គាត់»នោះ ជាលោកឧកញ៉ា សុខ ប៊ុន។ នៅក្នុងការជជែកតាមទូរស័ព្ទ ជាមួយជននោះ កញ្ញាបានសួរត្រឡប់ ទៅវិញថា៖ «អត់ស្គាល់វៃជិតងាប់ ចុះបេីស្គាល់ សំលាប់ចោលមែន?»
ពាក្យសំដីរបស់កញ្ញា សាសា មិនគ្រាន់តែជាការសួរឆ្លើយ តបទៅនឹងជនម្នាក់ ដែលបានប្រើកម្លាំងខ្លួន ជាមនុស្សប្រុស មកធ្វើការវាយតប់ ទាត់ធាក់ បោចសក់ ទៅស្ត្រីទន់ខ្សោយម្នាក់ ដូចជាកញ្ញានោះទេ ប៉ុន្តែវាការសួរត្រឡប់ទៅវិញ ក្នុងនាមជាជនរងគ្រោះម្នាក់។ កញ្ញា បានសរសេរទៀតថា៖ «ចៅឈឺចិត្តខ្លាំងណាស់ រាល់ពេលដែលចៅមេីលវីដេអូរម្តងៗ ចៅពិតជាពិបាកដកដង្ហេីម ទ្រាំមេីលនូវសកម្មភាព គេវាយដំចៅដូចជាសត្វ!»
សម្រាប់ភាគីលោកឧកញ៉ា សុខ ប៊ុន វិញ បានទទួលស្គាល់ថា ប្រធានប្រធានក្រុមហ៊ុន តេហូ ឌឺវើឡូពើមិន (TEHO Development) និងជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជារូបនេះ រួមនឹងអង្គរក្សរបស់លោកផង ពិតជា«បានជ្រុលដៃជ្រុលជើង» វាយតប់ទៅលើកញ្ញា សាសា មែន។ ប៉ុន្តែបានព្យាយាមពន្យល់ថា បើមិនមានភ្លើង ក៏មិនមានផ្សែងនោះដែរ។ ស្រង់សំដីដោយសារព័ត៌មានក្នុងស្រុកមួយ មេធាវីម្នាក់របស់លោក សុខ ប៊ុន បានអះអាងថា ហេតុការណ៍នេះ បានកើតឡើង ដោយសារកញ្ញា សាសា បានប្រើសម្តីប្រមាថ និងបានគប់ទូរស័ព្ទ ទៅលើឧកញ៉ា សុខ ប៊ុន ជាមុន។
នៅក្នុងវីដេអូទីពីរខាងក្រោម ក៏គេបានឃើញដែរថា អតីតពិធីការិនីទូរទស្សន៍ បានគប់ទូរស័ព្ទ សំដៅមនុស្សម្នាក់ ក្នុងចំណោមមនុស្សទាំងពីរនាក់ ដែលកំពុងប្រឈមមុខ តតាំងជាមួយនាង។ ប៉ុន្តែការគប់នោះ មិនប្រាកដថា បានត្រូវនរណាម្នាក់ទេ។ ដោយឡែក កញ្ញា សាសា បានថ្លែងកាលពីម្សិលម៉ិញ ប្រាប់អ្នកសារព័ត៌មានថា ប្រតិកម្មរបស់កញ្ញា គ្រាន់តែជាការតបតរ ទៅនឹងការគម្រាម ដោយពាក្យសម្ដី «កុំចេះ! ចង់ងាប់ហេះ?» និងដោយអាវុធខ្លី របស់អង្គរក្សលោកឧកញ៉ា សុខ ប៊ុន ប៉ុណ្ណោះ។
ដើម្បីបញ្ជាក់ពីរឿងនេះ ថាយ៉ាងណានោះ មានតែសាក្សី ដែលនៅក្នុងហេតុការណ៍ប៉ុណ្ណោះ ដែលអាចនិយាយថា យ៉ាងដូចម្ដេច ហើយត្រូវរងចាំមើល ថាតើតុលាការ និងសម្រេចសេចក្ដីបែបណា។ យ៉ាងណា បើទោះជាវាយតប់ទាត់ធាក់បោចសក់ បានកើតឡើង ពីមូលហេតុអ្វីក៏ដោយ ក៏គេមិនគួរចាត់ទុកថា នេះជាជាវិធានការដើម្បីជម្រះបញ្ជីគ្នា ដែលជាទង្វើល្មើសច្បាប់ ដ៏ធ្ងន់ធ្ងរនោះដែរ។ ម្យ៉ាងទៀត ទង្វើរបៀបនេះ នឹងផ្ដល់ជារូបភាពដ៏អាក្រក់ សម្រាប់ព្រះរាជាណាចក្រកម្ពុជា ទាក់ទងនឹងការគោរពច្បាប់ ជាពិសេសសម្រាប់កុមារ ដែលបានមើលឃើញ ហើយអាចនឹងយកទៅអនុវត្តន៍តាម៕
» សូមទស្សនាវីដេអូមួយ ក្នុងចំណោមវីដេអូពីរ ដែលថតដោយក៉ាម៉េរ៉ាសុវត្ថិភាព៖