នេះឬ ជាការប្រកួតប្រចាំសតវត្សន៍? កីឡាករប្រដាល់អាមេរិក ផ្លយ ម៉ាយវេដ័រ ទើបនឹងត្រូវបាន ដកតំណែង​ចេញ ជាម្ចាស់ខ្សែក្រវ៉ាត់ WBO សម្រាប់ទំងន់មធ្យប់ (តិចជាង៦៦,៧គីឡូក្រាម) ដែលខ្លួនទទួលបាន បន្ទាប់ពី​បាន​ប្រកួត ជាមួយកីឡាករហ្វីលីពីន ម៉ានី ផាគីអៅ កាលពីដើមឧសភា។ ការសម្រេចចិត្តនេះ បានធ្វើ​ឡើង​បន្ទាប់​ពី​កីឡាករអាមេរិក មិនបានបង់ប្រាក់ ទៅឲ្យគណៈកម្មការប្រដាល់ពិភពលោក (World Boxing Organization) មួយនេះ។ នេះបើតាមការប្រកាស របស់គណៈកម្មការពិភពលោក កាលពីយប់ថ្ងៃចន្ទ។

សេចក្ដីប្រកាសព័ត៌មានមួយ របស់គណៈកម្មការនេះ បានសរសេរឲ្យដឹងថា៖ «WBO មិនមានជម្រើសអ្វីផ្សេង ក្រៅតែពីឈប់ទទួលស្គាល់ ផ្លយ ម៉ាយវេដ័រ ជាម្ចាស់ជើងឯងពិភពលោក របស់ WBO សម្រាប់ទំងន់មធ្យម និងទុកតំណែងនេះ ឲ្យនៅទំនេរ»។

កីឡាករអាមេរិក ដែលបានប្រកួតឈ្នះ កីឡាករហ្វីលីពីនដោយពិន្ទុ នៅក្នុងការប្រកួតប្រចាំសតវត្ស ដ៏គួរឲ្យ​ខក​ចិត្ត នៅក្រុងឡាសវ៉េហ្គាស នោះ បានទទួលប្រាក់ ដាក់ហោប៉ៅខ្លួនទាំងអស់ ប្រមាណជា២០០លានដុល្លា។ នេះបើតាមការប៉ាន់ប្រមាណ ធ្វើឡើងដោយស្ថាប័ន មួយចំនួន។ នៅក្នុងលក្ខត្តិកៈរបស់ «WBO» បានកំណត់​ឲ្យកីឡាករ​ដែលទទួលបានតំណែងជាម្ចាស់ខ្សែក្រវ៉ាត់ ត្រូវបង់ប្រាក់ទៅឲ្យខ្លួន ៣% នៃប្រាក់ដែល​កីឡាករ​ទទួល​បាន។ លក្ខត្តិកៈនោះដដែល ក៏បានចែងដែរថា ម្ចាស់ខ្សែក្រវ៉ាត់ នៅក្នុងក្របខ័ណ្ឌទំងន់មួយ មិន​អាច​មាន​ខ្សែក្រវ៉ាត់ នៅក្នុងក្របខណ្ឌ ទំងន់មួយទៀតនោះឡើយ ផ្ទុយពីករណីរបស់ ផ្លយ ម៉ាយវេដ័រ ដែលមានខ្សែ​ក្រវ៉ាត់​ជាច្រើន ក្នុងនោះដូចជា «WBA» និង«WBC»ជាដើម។

គណៈកម្មការ «WBO» បានពន្យល់ទៀតថា៖ «លោក ម៉ាយវេដ័រ មិនបានបង់ប្រាក់ ២០០ ០០០ដុល្លា ដែល​តម្រូវឲ្យលោកបង់ ដើម្បីបានចូលរួមប្រកួត ដណ្ដើមតំណែងជើងឯកពិភពលោក របស់ WBO។ (...) ហើយ​មិនត្រឹមតែប៉ុណ្ណឹង លោក ម៉ាយវេដ័រ មិនបានបញ្ឈប់តំណែងខ្លួនឯង ចេញពីម្ចាស់ខ្សែក្រវ៉ាត់ពីរផ្សេង នោះ​ទៀត។»៕