ម្ចាស់ស្នេហ៍ថ្មីរបស់អ្នកនាង ចន ច័ន្ទលក្ខិណា តារាសម្ដែងល្បីនោះ នរណាៗក៏គេបានស្គាល់ដែរថា ជាលោក ហេង ណារ័ត្ន បុរសពោះម៉ាយមួយរូប ដែលសម្បូរទៅភោគទ្រព្យ យ៉ាងហូរហៀ។ ចង់មិនចង់ នរណាៗ​ក៏គេ​អាចមើលដឹងថា ម្ចាស់ចិត្តថ្មីរបស់អ្នកនាង ចន ច័ន្ទលក្ខិណា ប្រាកដជាមានភាពល្អូកល្អឺន នឹងគ្នាណាស់ ព្រោះ​បើគេឃើញតារាសម្ដែង បង្ហាញរូបថតជាញឹកញយ នៅតាមបណ្ដាញសង្គម រវាងនាងនិងលោក ណារ័ត្ន នោះ ចំណែកបុរសពោះម៉ាយបណ្ដូលចិត្តវិញ ក៏បានប្រកាសប្រាប់គេឯងដែរថា លោកកំពុងរៀបចំ បង្កើតអង្គការ​មួយ ឲ្យតារាល្បីជាអ្នកគ្រប់គ្រង។

ថ្លែងក្នុងបទសម្ភាស៍ ជាមួយ«វិទ្យុសម្លេងប្រជាធិបតេយ្យ (VOD)» កាលពីចុងសប្ដាហ៍នេះ លោក ហេង ណារ័ត្ន ហៅ ហេង ឡុង បានបញ្ជាក់ថា អង្គការមួយនេះ ជាជំហ៊ានថ្មីរបស់អ្នកនាង ចន ច័ន្ទលក្ខិណា ហើយជំហ៊ានថ្មី​នេះ លោកកំពុងធ្វើឯកសាររត់ការមួយចំនួន ដើម្បីបង្កើតអង្គការមួយ ដែលមានឈ្មោះថា «Our Community ឬសហគមន៍យើង» សម្រាប់នាងជាអ្នកគ្រប់គ្រង។ ជាមួយនឹងក្ដីសង្ឃឹមថា តារាសម្ដែងល្បីឈ្មោះ នឹងអាចធ្វើ​បាន ក្នុងនាមជាអ្នកគ្រប់គ្រងនោះ លោក ណារ័ត្ន បានបញ្ជាក់បន្ថែមថា កាងារនេះ ជាការងារមនុស្សធម៌​សុទ្ធ​សាធ ដោយតម្រូវឲ្យអ្នកនាង ចន ច័ន្ទលក្ខិណា និងអ្នកសិល្បៈផ្សេងទៀត ធ្វើការប្រមូលមូលនិធិ តាមរយៈ​ការ​សម្តែង ច្រៀង រាំ ទាំងក្នុងស្រុក និងក្រៅស្រុក ដើម្បីធ្វើការផ្គត់ផ្គង់ ទៅឲ្យក្មេងកំព្រានៅកម្ពុជា។

បុរសវ័យកណ្តាល ដែលមានការងារ ជាអ្នកជំនួញរូបនេះ បានបន្តថា លោកនឹងរៀបអាហ៍ពិពាហ៍ ជាមួយ​អ្នក​នាង ចន ច័ន្ទលក្ខិណា ដោយពេញមុខ នៅពេលដែលគម្រោង ដែលលោកកំពុងតែអនុវត្តន៍នេះ បានសម្រេច ហើយអនាគតភរិយារបស់លោក នឹងក្លាយជាអ្នកគ្រប់គ្រង អង្គការមួយនេះ ប្រចាំប្រទេសកម្ពុជា។ ម្យ៉ាងទៀត លោកប្រគល់សិទ្ធឲ្យនាង ជាអ្នកគ្រប់គ្រង និងជ្រើសរើសតារាផ្សេងទៀត ធ្វើការជាមួយនាង តាមរយៈការ​សម្តែង ដើម្បីប្រមូលមូលនិធិ ជួយក្មេងកំព្រា។

គួររំលឹកដែរថា អ្នកនាងចន ច័ន្ទលក្ខិណា ដែលជាអតីតភរិយា តារាសម្តែងលោក យុត្ថារ៉ា ឆានី រូបនេះ ធ្លាប់​ទទួលរង ការរិះគន់យ៉ាងច្រើន ពីអ្នកគាំទ្រ កាលពីពេលកន្លងទៅ ក្នុងជីវិតអាពាហ៍ពិពាហ៍របស់នាង។ តែ​ករណីនោះ ទំនងជាបានផុតរលត់អស់ទៅហើយ ព្រោះពេលនេះ នាងកំពុងស្តារជីវិតថ្មី ជាមួយដៃគូរថ្មីលោក ហេង ណារ័ត្ន ដែលអះអាងថា នឹងជួយជ្រោមជ្រែងនាង រហូតដំណើរការអង្គការមួយនេះរឹងមាំ។ តាមរយៈ​បទ​សម្ភាស៍ ជាមួយវិទ្យុដដែលនោះ លោក ណារ័ត្ន បានលើកឡើងថា៖ «ខ្ញុំនឹងឲ្យអាមុំ ( ចន ច័ន្ទលក្ខិណា) រៀប​ចំ​ចាត់ចែងកិច្ចការខ្លួនឯង តែខ្ញុំ និងមិត្តភក្តិអត់ព្រលែងចោលទេ គឺចាំជួយ រហូតទាល់តែគាត់រឹងដៃ​រឹងជើង!»៕