តាមសេចក្រីព្រាងចុងក្រោយ នៃអនុក្រិត្យ ស្តីពីការរៀបចំ និងការប្រព្រឹត្តិទៅ នៃអគ្គលេខាធិការដ្ឋាន នៃ​គណកម្មាធិការជាតិ រៀបចំការបោះឆ្នោត ត្រង់មាត្រា៦ ស្តីពីរចនាសម្ព័ន្ធ អគ្គលេខាធិការនៃ គ.ជ .ប ឃ្លាលើ​ត្រង់ត្រេ (-) ទីមួយ បានសរសេរថា៖ «លេខាធិការរដ្ឋាន នៃអគ្គលេខាធិការ នៃ គ.ជ.ប» ដែលមានន័យ​ស្មើ​នឹងពាក្យថា «ខុទ្ធកាល័យ នៃអគ្គលេខាធិការ នៃ គ.ជ.ប។ នេះបើតាមការបង្ហើបឲ្យដឹង ពីមន្រ្តីម្នាក់ ដែលស្និត​នឹងសមាជិក នៃ គ.ជ.ប ប្រាប់ទស្សនាវដ្តិមនោរម្យ.អាំងហ្វូ។

តាមការលើកឡើងរបស់មន្រ្តីនោះ បានឲ្យដឹងថា សមាជិកភាគច្រើនរបស់ គ.ជ.ប មិនឯកភាពឲ្យ​អគ្គលេខា​ធិការ នៃ គ.ជ.ប មាន«ខុទ្ធការល័យ»ដូចមុនចែង ក្នុងសេចក្តីព្រាងអនុក្រិត្យទេ។  មន្រ្តីដែលថ្លែងក្នុងលក្ខខណ្ឌ មិនបញ្ចេញឈ្មោះ បានថ្លែងបន្តទៀតថា សេចក្តីព្រាងមុន គេបានប្រើប្រាស់ពាក្យថា «ខុទ្ធកាល័យ» តែសេចក្តី​ព្រាងចុងក្រោយនេះ ជំនួសមកពាក្យ «លេខាធិការដ្ឋាន»វិញ។ លោកបន្តថា យ់ាងណាក៏ដោយ ពាក្យទាំងពីរ មានន័យតែមួយដូចគ្នា គឺអគ្គលេខាធិការនៃគ.ជ.ប មាន«ខុទ្ធការល័យ» ដែលមានតម្លៃ ស្មើនឹងស្ថាប័ន គ.ជ.ប ទាំងមូលទៅហើយ។

មន្ត្រីរូបនោះ បានថ្លែងថា៖ «គ.ជ.ប មានខុទ្ធកាល័យហើយ។ ចុះអគ្គលេខាធិការនៃ គ.ជ.ប ហេតុអ្វីត្រូវមាន​ខុទ្ធកាល័យទៀត? ចឹងមិនមានន័យថា មានថានៈស្មើ គ.ជ.ប ទៅហើយទេ?»

ទាក់ទងនឹងចំណោទសួរខាងលើនេះ លោក ហង្ស ពុទ្ធា អ្នកនាំពាក្យ គ.ជ.ប បានបញ្ជាក់ប្រាប់ទស្សនាវដ្តី​មនោរម្យ.អាំងហ្វូថា តាមសំណើរ ចំពោះកិច្ចអគ្គលេខាធិការដ្ឋាន មិនមានខុទ្ធកាល័យទេ ព្រោះខុទ្ធការល័យ​នេះ មាននៅ គ.ជ.ប ហើយ។ លោកបានបញ្ជាក់ថា៖ «ពីមុនមានខុទ្ធកាល័យពីរ មួយរបស់ គ.ជ.ប និងមួយ​ទៀតរបស់អគ្គ។ ឥឡួវកំពុងពិនិត្យ ពិចារណាថា មិនត្រូវឲ្យមានខុទ្ធកាល័យពីរទេ។ អាចទៅជាក្រុមជំនួយការ ឬអគ្គលេខាធិការ នៃអគ្គលេខាធិការដ្ឋាន ប្រហែលជាអាចមាន។ (...) ក្នុងសេចក្តីព្រាង ទម្រង់នៅដដែល គ្រាន់​តែប្តូឈ្មោះ មិនឲ្យមានដូចគ្នាប៉ុណ្ណោះ។»

អ្នកនាំពាក្យ គ.ជ.ប រូបនេះ បានអះអាងទៀតថា សមាជិកទាំង៩ របស់ គ.ជ.ប បាននឹងកំពុងពិចារណា លើ​សំណើររបស់ក្រសួងពាក់ព័ន្ធ មួយចំនួន ដែលស្នើមកផងដែរ។ លោកបានលើកជាឧទាហរណ៍ ដូចករណី រដ្ឋមន្រ្តីក្រសួងមុខងារ សាធារណៈស្នើរមក ដោយសុំមិនឲ្យ ក្នុងសេចក្តីព្រាងអនុក្រិត្យខាងលើនេះ មាន​«ខុទ្ធកាល័យ» ពីរជាន់គ្នាក្នុងអនុក្រិត្យតែមួយ។ លោក ហង្ស ពុទ្ធា បានបន្តថា មកទល់ពេលនេះ ត្រង់ពាក្យថា ខុទ្ធកាល័យអគ្គលេខាធិការ នៃគ.ជ.ប អាចផ្លាស់ប្តូរមកជា លេខាធិការដ្ឋាន នៃអគ្គលេខាធិការដ្ឋាន នៃ គ.ជ.ប ប៉ុន្តែរឿងនេះ កំពុងស្ថិតក្នុងការពិភាក្សា នៅឡើយ។

លោក ហង្ស ពុទ្ធា នៅតែទទួលស្គាល់ថា ពាក្យ «លេខាធិការដ្ឋាន នៃអគ្គលេខាធិការដ្ឋាន នៃ គ.ជ.ប» មាន​ន័យថា ជាខុទ្ធកាល័យតែម្តង គ្រាន់តែប្តូរ ឬប្រើពាក្យនេះជំនួសវិញ កុំឲ្យមានពាក្យជាន់គ្នាប៉ុណ្ណោះ។

សូមរំលឹកថា កាលពីថ្ងៃទី១ ខែកក្កដាកន្លងមកនេះ សមាជិកទាំង៩ របស់គ.ជ.ប បានជួបពិភាក្សាគ្នាលើ សេចក្ដីព្រាងអនុក្រិត្យ ស្តីពី ការរៀបចំនិងការប្រព្រឹត្តិទៅនៃអគ្គលេខាធិការដ្ឋាន នៃគណកម្មាធិការជាតិ រៀប​ចំការបោះឆ្នោត។ តាមលោក ហង្ស ពុទ្ធា បញ្ជាក់ថា សេចក្តីព្រាងអនុក្រិត្យ នឹងបន្តពិភាក្សាគ្នា ក្រោយថ្ងៃទី១០ ខែកក្កដាជាបន្ត។ ក្រៅពីគម្រោងផ្លាស់ប្តូរឈ្មោះ «ខុទ្ធកាល័យ នៃ អគ្គលេខាធិការ» និងផ្លាស់ប្តូរទៅចែង ក្នុង​បទបញ្ជាផ្ទៃក្នុងវិញនោះ សមាជិក គ.ជ.ប ទាំង៩ ក៏មានគម្រោង បង្កើតឲ្យមាន នូវនាយកដ្ឋានមួយ​បន្ថែមទៀត ទៅលើនាយកដ្ឋានទាំងប្រាំពីរ ដែលមានស្រាប់។ តែលោក ហង្ស ពុទ្ធា មិនទាន់បញ្ជាក់ថា នាយកដ្ឋាន​ថ្មី​នោះ ឈ្មោះអ្វីឡើយ ព្រោះកំពុងស្ថិតក្នុងគម្រោងនៅឡើយ។

សូមបញ្ជាក់ថា សេចក្រីព្រាងអនុក្រិត្យ ស្តីពី ការរៀបចំ និងការប្រព្រឹត្តិទៅ នៃអគ្គលេខាធិការដ្ឋាន នៃគណ​កម្មាធិការជាតិរៀបចំការបោះឆ្នោត ចុងក្រោយបង្អស់ គិតត្រឹមថ្ងៃទី១ ខែកក្កដា ឆ្នាំ២០១៥ មាន៦ជំពូក និង​២៧ មាត្រា។