បើគ្រាន់តែចូល ទៅ«ទទួលទានស៊ីផឹក» បែរជាមនុស្សពេញទាំងហាង បានរងការភ័យភិត តក់ស្លុត ដោយ​សារមានជនប៉ុន្មាននាក់ បានលរលេងអាវុធផ្ដេសផ្ដាស រហូតបានផ្ទះបាញ់ចេញមួយគ្រាប់ បណ្ដាលឲ្យ​មនុស្ស​ម្នាក់របួស។

ករណីផ្ទុះអាវុធខាងលើ បានកើតឡើង កាលពីវេលាម៉ោង ៨ និង៤០នាទីយប់ថ្ងៃទី ០២ ខែកក្កដា ឆ្នាំ២០១៥ នៅទីតាំងភោជនីយដ្ឋាន «ស្រីណា» ផ្ទះលេខ១០២ តាមបណ្តោយផ្លូវ ៥៩២ ក្នុងសង្កាត់បឹងកក់ទី២ ខណ្ឌ​ទួលគោក រាជធានីភ្នំពេញ។

បុរសរងគ្រោះ ដោយសារគ្រាប់កាំភ្លើង លោក រស់ សារ៉ុម អាយុ ៣២ឆ្នាំ បានប្រាប់ឲ្យដឹងថា មុនពេលកើត​ហេតុ មានតុស៊ីផឹកមួយ នៅជិតតុរបស់លោក មានគ្នាបីនាក់ ត្រូវគេស្គាល់ថា ជាមន្ត្រីកងរាជអវុធហត្ថ លើផ្ទៃ​ប្រទេស មានការទាស់សម្តីគ្នានៅតុ បន្ទាប់មកបានដកកាំភ្លើងចេញ ប្រទាញប្រទង់គ្នា។ ភ្លាមៗនោះ មានបានផ្ទុះ​ចេញ​មួយ​គ្រាប់ បង្ករឲ្យមានការភ្ញាក់ផ្អើល ដល់ភ្ញៀវរត់ប្រសាច។

ជនរងគ្រោះបន្តទៀតថា លោកត្រូវរបួសខ្នងមួយកន្លែង ដោយសារការផ្ទុះអាវុធនេះ។ រីឯបុរសទាំងបីនាក់ ជា​ជន​សង្ស័យ ដែលបានប្រើអាវុធ ក្នុងភោជនីយដ្ឋាន បង្កឲ្យលោកមានរបួសនោះ បានឡើងឡាន ម៉ាកលុចស៊ីស ៣៥០ ពណ៍ស គេចខ្លូនបាត់ ខណៈដែលភ្ញៀវ នៅក្នុងភោជនីយដ្ឋាន កំពុងភ័យស្លន់ស្លោ។

សាក្សីនៅកន្លែងញ៉ាំអាហារ បានបញ្ជាក់បន្ថែមថា គ្មានអ្នកណាម្នាក់ ស្គាល់ស្លាកលេខរថយន្ត ជនសង្ស័យ​នោះទេ។ តែគេស្គាល់ថា ជនរងគ្រោះអង្គុយ នៅក្នុងហាងមានគ្នាពីរនាក់ ក្នុងនោះមានម្នាក់ ជាបុគ្គលិក​នៅ​ទូរទស្សន៍បាយ័ន។ ជនរងគ្រោះ បានទៅរំរបួសជាមួយមិត្តភក្កិរបស់ខ្លូន នៅមន្ទីពេទ្យ បន្ទាប់ពីរមាន​ការ​ស្ងប់​ស្ងាត់ទៅវិញ នៅក្នុងហាង៕