«ខ្ញុំនឹងដើរតួ ជា ដូមីនិក ស្ត្រូកាន់ ហើយនេះ គឺដោយសារតែ ខ្ញុំមិនចូលចិត្តគាត់» ហ្សេរ៉ា ដឺប៉ាឌីយើ ដែលជាតួសំដែង ខ្សែរភាពយន្ត ជនជាតិបារាំង បាននិយាយ នៅក្នុងកិច្ចសំភាស របស់ វិទ្យុនិងទូរទស្សន៍មួយ នៅប្រទេសស្វីស (RTS) ។ គាត់បានបញ្ជាក់ថា គាត់មិនដែល ញញើតញញើម នឹងនិយាយ អាក្រក់ៗ ពី ដូមីនិក ស្ត្រូកាន់ អតីត នាយក មួលនិធី រូបីយវត្ថុអន្តរជាតិ នោះទេ។ បើតាម ហ្សេរ៉ា ដឺប៉ាឌីយើ លោក ដូមីនិក ស្ត្រូកាន់ គ្រាន់តែជាមនុស្សម្នាក់ មិនដែលច្បាស់លាស់ និងមិនមានអ្វីអស្ចារ្យ នោះទេ ។

ហ្សេរ៉ា ដឺប៉ាឌីយើ​ ត្រូវបានជ្រើសរើស អោយដើរតួសំដែង នៅក្នុងខ្សែរភាពយន្តមួយ របស់សមិទ្ធិករ ឈ្មោះ អាប៊ែល ហ្វែរ៉ារ៉ា ដែលនឹងដក់ស្រង់ យកគំរូតាម ខ្សែររឿងជីវិតពិតរបស់  អតីតនាយក មួលនិធី រូបីយវត្ថុអន្តរជាតិ​ លោក ដូមីនិក ស្ត្រូកាន់​ ។​ លោក ដូមីនិក ស្ត្រូកាន់ បានផុងខ្លួនយ៉ាងជ្រៅមួយ ក្នុងរឿងអាស្រូវ ជំលោះក្ដីក្ដាំ ជាមួយស្ត្រីជាអ្នក បំរើការក្នុងបន្ទប់សណ្ឋាគារ នៅទីក្រុង ញ៉ូយក ប្រទេស់អាមេរិក ហើយលោកក៏កំពុងជាប់ រឿងក្ដីក្ដាំ ចំនួន ២ផ្សេងទៀត ក្នុងប្រភេទរឿងដូចគ្នានេះ នៅក្នុងប្រទេសបារាំង ផងដែរ។

ហ្សេរ៉ា ដឺប៉ាឌីយើ​ បានបញ្ជាក់បន្ថែម ៖ «យើងទាំងអស់បានឃើញហើយ គឺជារឿយៗ មនុស្សដែលមានអំណាច បុណ្យស័ក្តិ និងលុយកាក់ បានកាន់ស្ថាប័នកំពូល ដូចជា  មួលនិធី រូបីយវត្ថុអន្តរជាតិ ជាដើម នេះ គេបែរជា យកវាទៅ ប្រើប្រាស់ ជាមួយនឹងស្រីញ៉ីទៅវិញ» ។ គាត់បានបញ្ចប់ ដោយ ឃ្លាយ៉ាងដូច្នេះថា « ខ្ញុំមិនដែល រំជួលចិត្ត ទាល់តែសោះ ជាមួយនឹងមនុស្ស ដែលគ្មានភាពថ្លៃថ្នួ ប្រភេទនេះ !»

ខ្សែរភាពយន្ដនេះ នឹងចាប់ផ្ដើមថត នៅខែ មិថុនាខាងមុខ នៅទីក្រុងចំនួន ៣ គឺ ប៉ារីស វាស៊ីនតោន និងញ៉ូយក ។ ​សមិទ្ធិករ លោក អាប៊ែល ហ្វែរ៉ារ៉ា ក៏បានជ្រើសរើសផងដែរ តារាស្រ្តី ឈ្មោះ អ៊ីហ្សាបែល អាដចានី អោយមកធ្វើជា តូ​ លោកស្រី អាន​ សាំងក្លែ ដែលជា ប្រពន្ធ របស់លោក ដូមីនិក ស្ត្រូកាន់។

ដោយ ៖ សេក មនោរកុមារ​​ -​ ប៉ារីស ថ្ងៃទី ១៥ មិនា​ ២០១២
Crédit Photo : wikimedia.org