ប្រជាពលរដ្ឋ ដែលមានដើមកំណើត ជាជនជាតិវៀតណាមបីនាក់ រួមមានប្រពន្ធ កូន និងអ្នករស់នៅ​ជាមួយ​ម្នាក់ ត្រូវបានកម្លាំងចម្រុះ ដែលដឹកនាំដោយព្រះរាជអាជ្ញារង អមសាលាដំបូងរាជធានីភ្នំពេញ លោក កែវ សុជាតិ ចុះចាប់ខ្លួន កាលពីថ្ងៃទី២៨ ខែមិថុនា ឆ្នាំ២០១៥ នៅវេលាម៉ោងប្រមាណ ជាងពីរសៀល នៅម្តុំ​ផ្សារ​នាគមាស ក្នុងសង្កាត់ផ្សារដើមគរ។ បើទោះជាការចាប់ខ្លួន ពលរដ្ឋដើមកំណើតវៀតណាមទាំងនោះ ក្រោម​បទចោទប្រកាន់ ថាបានបើកមុខរបរចាក់បាល់ និងលក់កន្ទុយលេខ ជ្រកក្រោមស្លាកលក់កាហ្វេក៏ដោយ តែ​សម្រាប់​ក្រុម​គ្រួសារ​វិញ បានលើកឡើង ពីភាពមិនប្រក្រតីមួយចំនួន ដោយបានប្រៀបធៀប ការចុះមក​ចាប់​ខ្លួន​នេះ ទៅ​នឹង​ការ​ចុះ​មក​«ប្លន់» ដោយខុសច្បាប់។

លោក ង្វៀង យ៉ាំងថាន់ ដែលត្រូវជាប្តី បានលើកឡើងថា ការចុះចាប់ខ្លួនប្រពន្ធ កូន និងអ្នកនៅជាមួយនេះ មិន​បានផ្តល់ដំណឹងជាមុនឡើយ ហើយលោកក៏មិនដឹងថា គ្រួសារលោកមានធ្វើអ្វីខុសច្បាប់ដែរ ព្រោះលោក​លក់​ដូរ ដូចពលរដ្ឋខ្មែរដទៃទៀតដែរ។ ការផ្តល់កិច្ចសម្ភាសនេះ ត្រូវបានធ្វើឡើង នៅក្នុងប៉ុស្តិ៍នគរបាលផ្សារដើម​គរ ដោយបុរសជាតិវៀតណាម ជាប្តីនោះបានបញ្ជាក់ថា ពេលសមត្ថកិច្ចចុះមកចាប់នេះ លោកបានអវត្តមាន មិន​នៅជាមួយប្រពន្ធកូនទាំងនោះទេ។ ប៉ុន្តែអវត្តមានរបស់លោក តែក្នុងរយៈពេល មិនដល់ ៣០នាទីផង គ្រប់​គ្រាន់​នឹងក្រុមសមត្ថកិច្ចទាំងនោះ ចាប់ប្រពន្ធកូនរបស់លោក  ដាក់បញ្ចូលក្នុងឡាន និងដឹកចេញទៅបាត់ ហើយ​មិនដឹងថា យកទៅណាផង។ ហេតុនេះហើយ ទើបលោកមកប៉ុស្តិ៍ ដើម្បីសួរនាំក្នុងរឿងនេះ។

បុរសម្នាក់ ដែលនិយាយភាសាខ្មែរ បានច្បាស់ល្អនោះ បាននិយាយថា សកម្មភាពដែលចុះមកចាប់មនុស្ស របស់សមត្ថកិច្ចចម្រុះនេះ ជាអំពើខុសច្បាប។ បុរសម្នាក់នេះបានអះអាងថា ខ្លួនជាប់ខ្សែស្រឡាយ ជាមួយនឹង​ប្រពន្ធកូនជនជាតិវៀតណាម ដែលត្រូវបានចាប់ខ្លួននោះ តែមិនបាននិយាយឲ្យដឹង ពីឈ្មោះរបស់លោក​ឡើយ ដោយគ្រាន់តែបញ្ជាក់ថា លោកជាមេធាវី និងជាសមាជិកនៃក្រុមមេធាវីមួយ។ បុរសរូបនេះ បានថ្លែង​ឡើង​ថា៖ «បាត់លុយជាងមួយម៉ឺនដុល្លា ខ្សែរកមាសជាដើម។ (...) មកនេះដូចប្លន់អញ្ចឹង យើងត្រូវធ្វើកំណត់ហេតុ ទើប​យកចេញ តែនេះគ្មានទេ។ (...) មកចាប់ប្រពន្ធកូនគេទៅ កំពុងតែដេក ឃើញទេ មិនមែនជាករណីបទ​ល្មើស​ជាក់​ស្តែងទៀត។ មកត្រូវមានដីកា ធ្វើកំណត់ហេតុដកហូតត្រឹមត្រូវ? នេះឡើងទៅលើផ្ទះគេ យកទ្រពសម្បត្តិ​របស់​គេ។»

ទាក់ទងនឹងការចោទប្រកាន់ របស់បុរសម្នាក់នេះ ថាការចុះចាប់ខ្លួននេះ គ្មានដីកា និងគ្មានធ្វើកំណត់ហេតុនេះ ទស្សនាវដ្តីមនោរម្យ.អាំងហ្វូមិនអាចសុំការបង្ហាញ ពីលោកព្រះរាជអាជ្ញារង កែវ សុជាតិ បានឡើយ ដោយ​ទូរស័ព្ទរបស់លោក មិនអាចភ្ជាប់ទំនាក់ទំនងបាន។

រីឯលោក ហែម សុវណ្ណរិទ្ធ មេ​ប៉ុស្តិ៍ផ្សារដើមគរវិញ បានគេចមុខ ពីការសុំស្នើសម្ភាសរបស់ទស្សនាវដ្តី ហើយ​ក៏​មិនទទួលឆ្លើយ តាម​ទូរស័ព្ទដែរ។ លោកមេប៉ុស្តិ៍ផ្សារដើមគរ បានរុញឲ្យទស្សនាវដ្តីជួបសម្ភាស ជាមួយ​នឹង​មន្រ្តី​ប្រចាំការ​របស់​ខ្លួន ឈ្មោះ ខិន ទិត្យ ជាជំនួសវិញ។

លោក ខិន ទិត្យ បានថ្លែងថា ការចាប់ខ្លួនជនជាតិវៀតណាមទាំងបីនោះ ហាក់មានលក្ខណៈ ប្រញាប់ប្រញាល់ ព្រោះការចាប់ខ្លួននេះ ត្រូវបានចុះមកភ្លាមៗ ហើយចាប់យកទៅតែម្តង។ ទាក់ទងនឹងការលើកឡើងថា ការ​បើក​ធ្វើអាជីវកម្មចាក់បាល់ និងកន្ទុយលេខ របស់ប្តី-ប្រពន្ធជនជាតិវៀតណាមខាងលើ ត្រូវបានដាក់ខែ ជាមួយ​ប៉ុស្តិ៍​នគរបាលផ្សារដើមគរនោះ ត្រូវបានបដិសេធ ដោយមន្រ្តីប្រចាំការខាងលើ យ៉ាងខ្លីថា៖ «អត់មានទេបង ដូច​អត់​ដែល​មានទេ»។

គាស់ទូរ និងកន្លែងសំខាន់មួយចំនួន...

លោក ង្វៀង យ៉ាំងថាន់ ជាប្តីបានបន្ថែមថា ក្រោយពេលចាប់ខ្លួន ប្រពន្ធកូនរបស់លោក ទៅបាត់ហើយនោះ លោក​បានទៅដល់ផ្ទះ និងចូលមើលឃើញមានការគាស់ទូរ និងកន្លែងសំខាន់ៗមួយចំនួនទៀត ហើយបាន​បាត់ នូវទ្រព្យសម្បត្តិមានតម្លៃមួយចំនួន ដូចជាប្រាក់ដុល្លា ១៧ ០០០ដុល្លាអាមេរិក, ខ្សែដៃមួយតម្លឹង, ខ្សែក​ពីរតម្លឹង, ចិញ្ចៀនពេជ្រមួយវង្ស, ជញ្ជៀនធម្មតា៣វង្ស, និងកាបូបដៃមួយ មានលុយ ៣០០ដុល្លាអាមេរិក។

មកទល់ពេលនេះ ទស្សនាវដ្តី ក៏នៅមិនទាន់មាន ការបញ្ជាក់ណាមួយច្បាស់លាស់ ពីការចាប់ខ្លួននោះ​នៅ​ឡើយ ព្រោះតែមិនអាចទំនាក់ទំនងបាន។ រីឯការបាត់បង់ទ្រព្យទាំងនេះ ក៏ទស្សនាវដ្ដីមិនទាន់មាន ប្រភព​ឯករាជ្យផ្សេងទៀត បញ្ជាក់ថា ពិតជាមានការទាក់ទង នឹងការឃាត់ខ្លួន របស់ម្ចាស់ទ្រព្យឬយ៉ាងណាឡើយ។សូមបញ្ជាក់ថា បានជាតិវៀតណាមទាំងបី ដែលត្រូវបានចាប់ខ្លួននោះ រួមមានឈ្មោះ ទីវ គឹមអ៊ុក (ជនជាតិ​វៀតណាម) ជាប្រពន្ធ ង្វៀង ហុងអាំង ជាកូន និងស្រ្តីអ្នកនៅជាមួយ ជាតិវៀតណាមម្នាក់ទៀត មិន​ស្គាល់​ឈ្មោះ៕