ប្រធានសហជីពសេរីកម្មករកម្ពុជា លោក ជា មុន្នី បានបង្ហាញនូវការហួសចិត្ត និងភាពងឿងឆ្ងល់ ដែល១១ឆ្នាំ​មកនេះ ប្រទេសកម្ពុជាស្ថិតក្នុងសន្តិភាព បែរជារដ្ឋាភិបាលមិនអាចដោះស្រាយ ឬស្វែងរកចាប់ខ្លួនឃាតករពិត មកផ្តន្ទាសទោសបាន។ លោក ជា មុន្នី បានថ្លែងឡើងថា ការប្រកាសបង្កើតគណកម្មការនេះ ទំនងជាស្ថិត​ក្រោមសំពាធណាមួយ ដែលត្រូវបង្ខំចិត្ត (លោក ហ៊ុន សែន) ឲ្យត្រូវតែធ្វើវាឡើង។ សំពាធនោះ  អាចមកពី​អង្គការពលកម្មអន្តរជាតិ តាមរយៈក្រសួងការងារ។ លោកបានលើកយកហេតុផល មកនិយាយថា ព្រោះមាន​សំណើរ របស់ក្រសួងការងារ ស្នើឲ្យមានគណកម្មការនេះឡើង នៅក្នុងការប្រកាសបង្កើតគណកម្មការនោះ។

ការថ្លែងភ្ញាក់ផ្អើល របស់លោក ជា មុន្នី ធ្វើឡើង បន្ទាប់ពីសេចក្ដីសម្រេចមួយ របស់លោកនាយករដ្ឋមន្រ្តី ចុះ​ថ្ងៃ​ទី១០ ខែមិថុនា ឆ្នាំ២០១៥ ហើយបានធ្លាក់ មកដល់ដៃអ្នកសារព័ត៌មាន កាលពីថ្ងៃទី២៥ ខែមិថុនាម្សិលម៉ិញ​​នេះ ប្រកាសពីការបង្កើតគណៈកម្មការ អន្តរក្រសួងមួយឡើង ដើម្បីអង្កេតទៅលើឃាតកម្ម ដ៏ឃោឃៅ ធ្វើ​​ទៅ​​លើ​សកម្មជនសហជីពដ៏ល្បីៗ នៅកម្ពុជា។ សេចក្តីសម្រេច ដែលចុះហត្ថលេខា ដោយលោកនាយក​រដ្ឋមន្រ្តី​នោះ មានបួនប្រការ ដែលបានសម្រេចថា៖ «ត្រូវបង្កើតគណៈកម្មការអន្តរក្រសួង ស៊ើបអង្កេតពិសេស លើ​ករណី​បណ្តឹងលេខ២៣១៨ ស្តីពីករណីឃាតកម្ម លើមេដឹកនាំសហជីព លោកជា វិជ្ជា ហ៊ី វុទ្ធី និងរស់ សុវណ្ណារ៉េត»។

ការបង្កើតគណកម្មការថ្មី របស់លោកនាយករដ្ឋមន្រ្តី ហ៊ុន សែន នេះ មិនត្រូវបានលោក ជា មន្នី ដែលជា​ដើម​បណ្តឹង​ព្រហ្មទណ្ឌ លើករណីឃាតកម្មយ៉ាងសាហាវព្រៃផ្សៃ ចំពោះបងប្រុសរបស់លោកនោះ ធ្វើការ​ស្វាគមន៍​នោះទេ។ លោកនៅតែបង្ហាញភាព«គ្មានជំនឿ»ថា គណៈកម្មការមួយនេះ មិនអាចស្វែងរកឃាតករពិត មក​ផ្តន្ទាទោស​នោះបានឡើយ។ លោក មុន្នី បានថ្លែងប្រាប់ទស្សនាវដ្ដីមនោរម្យ.អាំងហ្វូថា៖ «គណៈកម្មការ​ច្រើន​ណាស់ ដែល​បានបង្កើតឡើង សម្រាប់ដោះស្រាយបញ្ហា តែងតែមិនបានទទួលលទ្ធផល ជាដំកំភូនដល់​ជន​រងគ្រោះ។ ដូច​ជា​គណកម្មការ ដោះស្រាយបាតុភាព កូដកម្ម បាតុកម្ម ក៏មិនមានអ្វីជាលទ្ធផល ឯគណៈកម្មការ​ដោះស្រាយ​ជម្លោះ​ដីធ្លី បញ្ហាដីធ្លីនៅតែមានជាហូរហែរ គណកម្មការស៊ើបអង្កេត ការបាញ់សម្លាប់ នៅផ្លូវ​វ៉េង​ស្រេង​ដែល​ទើបនឹង​នៅ​ថ្មីៗ ក៏មិនឃើញមានលទ្ធផលអ្វី។»

លោក ជា មុន្នី បានថ្លែងថា​៖ «អស់ពេល១១ឆ្នាំមកហើយ សម្រាប់ឃាតកម្មលើលោក ជា វិជ្ជា និងប្រាំបីឆ្នាំ​សម្រាប់​លោក ហ៊ី វុទ្ធី។ ការបង្កើតគណកម្មការនេះ ហាក់បីដូចជា ទើបមានការភ្ញាក់រលឹក។ ចុះពេល​ឃាតកម្ម​ភ្លាមៗ ម្តេចមិនបង្កើតគណកម្មការ? ហេតុអ្វីទើបមកបង្កើត នាពេលនេះ? ។ (…) វាដូចជាចម្លែក មកដល់​បច្ចុប្បន្ន សាក្សី​ជា​ច្រើន​ទៀត​ពិបាករកណាស់។»

សមាសភាព​ក្នុងគណកម្មការអន្តរក្រសួងនេះ រួមមាន រដ្ឋសេខាធិការក្រសួងមហាផ្ទៃ ជាប្រធាន - រដ្ឋលេខា​ធិការ​​ក្រសួងការងារ និងបណ្តុះបណ្តាលវិជ្ជាជីវៈ ជាអនុប្រធាន និងរដ្ឋសេខាធិការក្រសួងយុត្តិធម៌ ជាអនុ​ប្រធាន និង​ក្រៅពីនេះជាសមាជិក។ សេចក្ដីសម្រេច ដែលមានសំណើ ពីរដ្ឋមន្ត្រីក្រសួងការងារ និងបណ្តុះបណ្តាល​វិជ្ជាជីវៈ​នេះ បានបង្ហាញពីភារកិច្ច នៃគណៈកម្មការពិសេសនេះ ថាត្រូវមានតួនាទីប្រមូលព័ត៌មាន និងភស្តុតាង និង​ពិនិត្យ​ស្រាវជ្រាវ ឲ្យបានគ្រប់ជ្រុងជ្រោយ ទាំងអង្គហេតុ និងអង្គច្បាប់ ទាក់ទិនករណីឃាតកម្ម​ទាំងបី​ខាង​លើ។

យ៉ាងណាក៏ដោយ លោក ជា មុន្នី នៅរង់ចាំមើលថា តើគណកម្មការនេះអាចស្វែងរក និងអាចផ្តល់យុត្តិធម៌ ដល់​ជនរងគ្រោះយ៉ាងណា នាពេលខាងមុខ។ ប៉ុន្តែលោក បានរំពឹងរួចហើយថា ក្នុងបរិបទប្រទេសកម្ពុជា​សព្វ​ថ្ងៃ​នេះ «បញ្ហានីតិភាព»នៅមិនអាចដោះស្រាយបាន ហើយក៏បន្តនៅមានដែរ ជាពិសេសចំពោះករណី នៃ​ឃាតកម្ម​នេះ ក៏ដូចជាសម្រាប់ជនរងគ្រោះ និងពលរដ្ឋក្រីក្រ។ លោកបានសួរទៅវិញថា នៅពេលដែលគណកម្មការ​នោះ ពិត​ជា​ឈរលើគោលការឯករាជ្យ ធ្វើឡើងតាមបច្ចេកទេស អព្យាក្រិត្យ និងមានឆន្ទះ ក្នុងការវែកមុខឃាតករពិត ហើយ​រកឃើញថា មានការជាប់ពាក់ព័ន្ធនឹងឧត្តមមន្រ្តីធំៗ អ្នកមានអំណាចនោះ ជាអ្នកផ្តើមគំនិត អ្នកឃុបឃិត អ្នករៀបចំ ឬអ្នកបញ្ជា តើគណៈកម្មការអន្តរក្រសួងនេះ ហ៊ានមានវិធានការបែបណា?

ទស្សនាវដ្តីមនោរម្យ.អាំងហ្វូ មិនអាចសុំប្រតិកម្ម ពីអ្នកនាំពាក្យក្រសួងយុត្តិធម៌ ក្រសួងមហាផ្ទៃ ក្រសួងការងារ និង​ពីទីស្តីការគណៈរដ្ឋមន្រ្តីបាននៅឡើយ ក្នុងថ្ងៃនេះ ដោយទូរស័ព្ទជាប់រវល់ គ្នានអ្នកទទួលទូរស័ព្ទ ឬទូរស័ព្ទ​មិនអាចភ្ជាប់ ទំនាក់ទំនងបានជាដើម។ សម្រាប់សាធារណៈជនមួយចំនួនវិញ បានលើកឡើងថា ការសម្រេច​បង្កើត គណៈកម្មការអន្តរក្រសួងនេះ អាចជាយន្តការមួយជម្រះក្អែល ដែលតោងជាប់ខ្លួនរដ្ឋាភិបាល ជា​ពិសេស​ជាមួយ នឹងលោក ហ៊ុន សែន ខ្លួនឯង ជាយូរមកហើយ។

សូមរំលឹកថា លោក ជា វិជ្ជា ត្រូវបានឃាតករបាញ់ស្លាប់ភ្លាមៗ នៅនឹងកន្លែងកើតហេតុ ខណៈលោកកំពុង​អង្គុយ​អានកាសែត នៅតូបលក់កាសែតមួយ ក្បែរវត្តលង្កា កាលពីថ្ងៃទី២២ ខែមករា ឆ្នាំ២០០៤។ រីឯលោក រស់ សុវណ្ណារ៉េត និងលោក ហ៊ី វុទ្ធី ត្រូវបានគេលួចធ្វើឃាត ជាបន្តបន្ទាប់ក្នុងឆ្នាំ២០០៤ និងក្នុងឆ្នាំ២០០៧។ អ្នក​ទាំង​ពីរ ជាមេដឹកនាំថ្នាក់មូលដ្ឋាន មកពីសហជីពសេរីកម្មករកម្ពុជា។ ជាង១០ឆ្នាំមកនេះ ឃាតករ និងជនដៃដល់​ពិត​ប្រាកដ មិនដែលត្រូវបានវែកមុខ និងនាំខ្លួន មកផ្ដន្ទាទោសឡើយ។ ផ្ទុយទៅវិញ អាជ្ញាធរបែរជាបាននាំខ្លួន ឃាតករ​សិប្បនិមិត្តពីរនាក់ ឲ្យទទួលកំហុសជំនួសឃាតករពិត នៅក្នុងករណីឃាតកម្មលើលោក ជា វិជ្ជា ទៅ​វិញ៕

» ទស្សនាវដ្តីមនោរម្យ.អាំងហ្វូ សូមចុះផ្សាយនូវសេចក្តីសម្រេច ស្តីពីការបង្កើតគណកម្មការអន្តរក្រសួងនេះ ដូចខាងក្រោម (ចុចពីលើ ដើម្បីពង្រីកអាន)៖