«ជៀសមិនផុតទេ បើតាំងខ្លូនជាចោរនោះ កាលលួចគេបាន វាគ្រាន់ តែដល់ពេលគេទាន់ វាក្រែល» នេះជា​ការ​លើកឡើងរបស់បុរសម្នាក់ ដែលបាននៅក្នុងហេតុការណ៍ ចាប់បានជនសង្ស័យ ជាចោរម្នាក់ ដែលមិនស្គាល់​អត្តសញ្ញាណ។ មិនមែនមានតែបុរសនេះទេ ដែលបាន និយាយទាំងអាការៈខឹងសម្បារ និងដែលធ្វើខ្លួន ដូចជា​ម្ចាស់ទូរស័ព្ទនោះ តែពលរដ្ឋនៅជិតនោះផ្សេងទៀត ក៏បានលើកឡើងសដៀងគ្នាដែរ។ អ្នកខ្លះពោលឡើងថា៖ «គេខំរកលុយទិញ ទំរាំបានមួយៗមិនមែនថោកទេ ឯងបែរជាមកយកទៅ ស្រួលអីបែបនេះ»។

ក្នុងពេលភ្លាមៗ គេមិនទាន់ដឹងថា តើជនសង្ស័យជានរណា មានអត្តសញ្ញាណអ្វីនោះឡើយ ព្រោះជន​សង្ស័យ​ត្រូវពលរដ្ឋ​ចោមវាយទ្រោមខ្លួន បាត់មាត់បាត់ករ (មើលរូបថត)។

យុវជនរងគ្រោះឈ្មោះ ម៉េង ឡាយ អាយុ២៣ ឆ្នាំ បានប្រាប់ឲ្យដឹងថា សព្វថ្ងៃលោករស់នៅសង្កាត់ទួលសង្កែរ ខណ្ឌឬស្សីកែវ រាជធានីភ្នំពេញ សព្វថ្ងៃជាកម្មកររោងចក្រ នៅទួលសង្កែរ។ ហេតុការណ៍ ដែលចោរបាន​ឆក់​ទូរស័ព្ទដៃ របស់លោកនេះ បានកើតឡើង កាលពីវេលាម៉ោង ១០ និ៣០នាទីយប់ថ្ងៃទី ២៥ ខែមិថុនា ឆ្នាំ២០១៥ នៅត្រង់ចំណុច ជិតវត្តទួលសង្កែរ ខណ្ឌឬស្សីកែវ។ លោកបានរៀបរាប់ទៀតថា ទូរស័ព្ទនោះ ម៉ាកសាំសុង ពណ៍ ស សេរី៥៤ចុច ដែលមានតម្លែប្រមាណ ជា២០០ដុល្លា។

តែជាសំណាងល្អ សម្រាប់ម្ចាស់ទ្រព្យ ដែលជនសង្ស័យ ត្រូវបានប្រជាពលរដ្ឋ នៅជុំវិញតាមទាន់ នៅ​ពេល​ដែល​ជនសង្ស័យ​កំពុងព្យាយាមរត់គេចខ្លូន។ បច្ចុប្បន្នជនសង្ស័យខាងលើ ត្រូវបានប្រគល់ឲ្យទៅសមត្ថកិច្ច នៅ​សង្កាត់​​ទួល​សង្កែរ មុននឹងបញ្ជូនខ្លូន ព្រមទាំងសំនុំរឿង ទៅកាន់អធិការនគរបាលខណ្ឌ ដើម្បីដោះស្រាយ​តាម​និតិវិធី៕