អស់រយៈពេលជិត១ឆ្នាំហើយ គិតចាប់តាំង ពីថ្ងៃទី ១៥ ខែ កញ្ញា ឆ្នាំ ២០១៤ ដែលយុវជនពីរនាក់ បានត្រូវ​កង​កម្លាំងសមត្ថកិច្ចចាប់ខ្លួន បន្ទាប់ពីក្រុមហ៊ុន ស៊ិនូហាយដ្រូ (SINOHYDRO) និងអាជ្ញាធរព្យាយាម ចូលទៅកាន់​តំបន់អារ៉ែង។ ជុំ ហួត និង ជុំ ហួរ ដែលជានិស្សិតមកពីខេត្តបាត់ដំបង រៀនឆ្នាំទី២ និងទី៣ ផ្នែកអក្សរសាស្រ្ត​អង់គ្លេស  នៅមហាវិទ្យាល័យឯកទេសនៃកម្ពុជា (CUS) បានត្រូវមហាវិទ្យាល័យនេះ ព្យួការសិក្សារយៈ​ពេល​៧ខែ និងពិន័យជាប្រាក់ ជាង២០០ដុល្លា រួមទាំងការប្រលងសងឡើងវិញ។ មូលហេតុ ដោយសារអ្នកទាំងពីរ ជាប់មមាញឹក ក្នុងការចូលរួមសកម្មភាព ជាមួយក្រុមចលនាមាតាធម្មជាតិ នៅតំបន់អារ៉ែង។

យុវជន ជុំ ហួត ដែលជាប្អួន បានប្រាប់ឲ្យទស្សនាវដ្តីមនោរម្យ.អាំងហ្វូឲ្យដឹង នៅព្រឹកថ្ងៃទី២៥ ខែមិថុនា ឆ្នាំ​២០១៥​នេះថា សាលារបស់យុវជនហាក់លំអៀងណាស់ ព្រោះមាននិស្សិតមួយក្រុមផ្សេងទៀត ដែលគេ​ស្គាល់​ថា ជាក្រុម«និស្សិតសម្តេចតេជោ» (ជាអ្នកចុះវាស់ដីធ្វើប្លង់) ដែលមិនបានមករៀនដូចគ្នា ប៉ុន្តែពួកគេត្រូវ​ជាប់​ដោយស្វ័យប្រវត្តិទាំងអស់ ហើយរដ្ឋាបាលសាលា បានថែមលុយឲ្យ៣០០ដុល្លាទៀត ទាំងគ្មានហេតុផល​ច្បាស់​លាស់។

ដោយឡែក ចំពោះយុវជនទាំងពីរនាក់បងប្អួនវិញ ទោះជាមានការមមាញឹក ក្នុងការចូលរួមជាមួយចលនា​ស្ម័គ្រចិត្ត នៅតំបន់អារ៉ែងនោះក៏ដោយ ក៏នៅតែឆ្លៀតដើម្បីបាន មកចូលរួមប្រលង ឲ្យខាងតែបាន នៅថ្ងៃ​កំណត់។ ប៉ុន្តែនៅពេលមកដល់ យុវជនបានដឹងថា ខ្លួនត្រូវបាននាយកប្រត្តិបត្តិថ្មី របស់មហាវិទ្យាល័យ សាខា​ស្ទឹងមានជ័យ លុបឈ្មោះចេញពីបញ្ជី និងចេញលិខិតព្យួរឈ្មោះ និងរងចាំ០៧ខែទៀត ទើបអាចប្រលង​សងបាន។ មិនតែប៉ុណ្ណោះ យុវជនថែមទាំងត្រូវបង់ប្រាក់២០០ដុល្លា សម្រាប់ថ្លៃប្រលងនោះទៀត។

ការរើសអើង!

ជុំ ហួត និងបងប្រុសបញ្ជាក់ថា៖ «កុំថាឡើយលុយ២០០ដុល្លា សូម្បីតែលុយថ្លៃអាហារថ្ងៃខ្លះ ខ្ញុំអត់បាយថ្ងៃខ្លះ​ក៏មាន»។ ព្រោះរាល់ថ្ងៃ អ្នកទាំងពីរ ជាអ្នកធ្វើការស្មគ្រចិត្ត ការពារព្រៃអារ៉ែង ហើយធ្វើដំណើរមករៀន នៅសាលា​នេះជារៀងរាល់ ថ្ងៃសៅអាទិត្យ។ យុជនបានបញ្ជាក់ទៀតថា ខ្លូនបង់ថ្លៃសាលាក្នុងមួយឆ្នាំ ២៤៥ដុល្លា។ ថវិកា​នេះ ជាជំនួយរបស់ជនជាតិ អ៊ឺរុប ដែលបានផ្តល់មកខ្លូន សម្រាប់តែថ្លៃសាលាប៉ុណ្ណោះ។

និស្សិតផ្នែកអក្សសាស្ត្រអង់គ្លេស់ បានបន្តត្អូញត្អែរថា ខ្លួនមិនត្រឹមតែរងការរើសអើង ពីក្រុមហ៊ុននិងអាជ្ញាធរ ដែលចង់ចូលទៅ តំបន់អារ៉ែងប៉ុណ្ណោះទេ ប៉ុន្តែនាយកសាលារបស់ខ្លួន ក៏មានការរើសអើងមកលើខ្លួនដែរ។ ជុំ ហួត ដែលមានវ័យ២៦ ឆ្នាំ បានថ្លែងពីទុក្ខលំបាកថា ពេលខ្លះគ្មានអាហារហូបចុក នៅក្នុងព្រៃក៏មាន ហើយត្រូវ​ក្រុមអាជ្ញាធរនៅទីនោះ ចាប់ទៅប៉ុស្តិ៍ គម្រាមកំហែងយ៉ាងតឹងតែង មិនឲ្យការពារព្រៃ បើកដៃឲ្យក្រុមហ៊ុនចូល​កាប់ព្រៃក៏មាន។ ម្យ៉ាងទៀត ត្រូវប្រឈមមុខ ជាមួយសត្វព្រៃជាច្រើនប្រភេទ និងរស់នៅក្រោមដំណក់ទឹកភ្លៀង​ជាដើម។ តែផ្ទុយទៅវិញ គ្មានអ្នកណាមើលឃើញ ពីការតស៊ូដើម្បីព្រៃឈើនេះឡើយ មានតែភាពរើស​អើង​ត្រឡប់មកវិញប៉ុណ្ណោះ។

ទស្សនាវដ្ដីមនោរម្យ.អាំងហ្វូ មិនអាចសុំការបកស្រាយ ពីមហាវិទ្យាល័យខាងលើ ជុំវិញការចោទប្រកាន់ ពី​​បញ្ហា​នៃការ«រើសអើង»នេះ បានឡើយ។ ប៉ុន្តែលោក​បណ្ឌិត មាស បូរ៉ា សកលវិទ្យាធិការ​រង​ ទទួល​បន្ទុក​ស្រាវជ្រាវ​នៃ​សាកលវិទ្យាល័យ​ឯកទេស​នៃ​ កម្ពុជា បានបញ្ជាក់ប្រាប់វិទ្យុអាស៊ីសេរី ផ្សាយជាខេមរភាសា​ថា និស្សិត​ទាំង​អស់​មាន​សិទ្ធិ​ប្រឡង​បាន លុះត្រា​ណា​តែ​មិន​មាន​អវត្តមាន ​លើស​ពី​គោលការណ៍ ​ដែល​សាលា​បាន​កំណត់។ លោក មាស បូរ៉ា បានថ្លែងឡើងថា៖ «មិន​បញ្ហា​អី​ទេ គ្រាន់​តែ​បញ្ហា​វិន័យ​តិចតួច​ហ្នឹង​ណា! គាត់​អវត្តមាន​ច្រើន​ហ្នឹង​ណា»។

ទាក់ទងនឹងករណីលុបឈ្មោះ និស្សិត ជុំ ហួរ និង ជុំ ហួត ពី​សាកលវិទ្យាល័យ CUS នេះ លោកនាយកប្រត្តិបត្តិ សាខាស្ទឹងមានជ័យ បានហៅយុវជទាំងពីរទៅជួប កាល​ពីរសៀលថ្ងៃទី២៥ ខែមិថុនានេះ ដើម្បីពិភាក្សារពី​ការ​សើរើឈ្មោះ និស្សិតទាំងពីរ ពីសាខាចាស់នៅ​ទួលគោក​មកវិញ និងពិនិត្យឲ្យរៀនបន្ត។ លោកនាយក​ប្រតិបត្តិ​រូបនោះ បានថ្លែងនិយាយប្រាប់យុវជនទាំងពីរនាក់ថា៖ «កុំឲ្យគេដឹងរឿងនេះច្រើនអី លោកគ្រូនឹងបញ្ជូល​ឈ្មោះ​ឯងទាំងពីរវិញ»។

ប៉ុន្តែយ៉ាងណាក៏ដោយ យុវជន ជុំ ហួត បានបញ្ជាក់ថា ខ្លូននៅមិនទាន់បានទទួល លិខិតស្នាមមានបោះត្រា ពី​នាយកនៅឡើយ ដោយទទួលបានការអះអាងនេះ ត្រឹមតែជាពាក្យសម្ដីប៉ុណ្ណោះ។ ដុច្នេះ យុវជននៅមិនទាន់​មាន​​ការ​ទុកចិត្ត បាន១០០ភាគរយនោះទេ៕