ក្នុងសន្និសិទ្ធសារព័ត៌មានលោក តឹករ៉េត សំរេច រដ្ឋលេខាធិការទីស្តីការ គណៈរដ្ឋមន្ត្រី ជាមួយនឹងការលើកឡើង​របស់លោក ដោយអានតាមលិខិត ដែលបានត្រៀមរៀបចំជាស្រេចនោះថា តំណាងរាស្រ្តពីររូប មកពីគណបក្ស​សង្គ្រោះជាតិ មានលោក សុន ឆៃ និងលោក ហូរ វ៉ាន់ ជាមនុស្សមិនមានការយល់ដឹងពីច្បាប់ ដែលអ្នកតំណាង​រាស្ត្រទាំងពីរ បានលើកឡើងនោះ។

ប្រតិកម្មនេះរបស់មន្ត្រីជាន់ខ្ពស់ របស់ទីស្ដីការគណរដ្ឋមន្ត្រី បានធ្វើឡើងជាប្រតិកម្ម ទៅនឹងសំដីលោក សុន ឆៃ និងលោក ហូរ វ៉ាន់ ដែលបានថ្លែង ក្នុងការសែតភ្នំពេញប៉ុស្តិ៍ ចេញផ្សាយថ្ងៃទី១៩ ខែមិថុនា ឆ្នាំ២០១៥ ប្រឆាំង​ទៅនឹង«សេចក្តីជូនដំណឹង» របស់ទីស្តីការគណរដ្ឋមន្រ្តី កាលពីថ្ងៃទី៥ ខែមិថុនា ឆ្នាំ២០១៥ ដែលបានដាក់​ទៅ​កាន់ គ្រប់ក្រសួងស្ថាប័នរបស់រដ្ឋ ដែលត្រូវឆ្លើយចំពោះមុខ គណកម្មការនៃរដ្ឋសភា ចាំបាច់ត្រូវបានការយល់​ព្រមជាមុន ពីរដ្ឋមន្រ្តី ឬពីប្រធានស្ថាប័ន។ លោក តឹករ៉េត សំរេច បានពន្យល់ថា សេចក្តីជូនដំណឹង របស់ទីស្តីការ​គណៈរដ្ឋមន្រ្តីនេះ ត្រូវបានតំណាងរាស្រ្ត មកពីគណបក្សសង្គ្រោះជាតិ ពីររូបខាងលើ បានចាត់ទុកថា ជាការ​រំលោភសិទ្ធិតំណាងរាស្រ្ត និងរដ្ឋធម្មនុញ្ញ។

លោកបានបន្តថា ទីស្តីការគណរដ្ឋមន្រ្តីបានចេញសេចក្តីណែនាំនេះ ព្រោះថា៖ «កន្លងមក មិនមែនមាន​គណកម្មការ​នៃរដ្ឋសភា ចុះសួរពីទង្វើ (សកម្មភាពការងារ) របស់មន្រ្តីថ្នាក់ក្រោមទេ។ (...) អង្គភាពថ្នាក់ក្រោម​អាចមិនយល់ មានការស្រពិចស្រពិល អាចឆ្លើយមិនត្រូវ ឬឆ្លើយថាមិនដឹង។ (...) នេះជាការណែនាំ ជាបែបបទ​ដើម្បីធានាថា មន្រ្តីថ្នាក់ក្រោមមានការយល់ដឹង មន្រ្តីថ្នាក់ក្រោមមានព័ត៌មានគ្រប់គ្រាន់។ មុននឹងឆ្លើយ គេអាច​ស្នើ​សុំយោបល់ ឬសួរថ្នាក់លើ ដើម្បីអាចមានព័ត៌មានមួយ គ្រប់គ្រាន់ក្នុងការឆ្លើយតប។»

មន្រ្តីជាន់ខ្ពស់ នៃទីស្តីការគណរដ្ឋមន្រ្តី បានវាយបកទៅតំណាងរាស្ត្រ មកពីគណបក្សប្រឆាំងថា៖ «ឯកឧត្តម សុន ឆៃ ជាតំណាងរាស្រ្ត តែមិនយល់ ពីខ្លឹមសារមាត្រា៩៦ របស់រដ្ឋធម្មនុញ្ញ។ (...) តំណាងរាស្ត្រមានសិទ្ធិ​ដាក់​សំណួរ ដល់រាជរដ្ឋាភិបាល។ សំណួរនេះ ត្រូវសរសេរជាលាយលក្ខណ៍អក្សរ ប្រគល់ជូន តាមរយៈប្រធាន រដ្ឋសភា។ ចម្លើយ អាចធ្វើឡើងដោយរដ្ឋមន្ត្រីមួយរូប ឬច្រើនរូប នេះមានន័យថា មានត្រា៩៦ នៃរដ្ឋធម្មនុញ្ញ មិន​បើកផ្លូវឲ្យមន្រ្តី ដែលមិនមែនជាសមាជិករបស់រដ្ឋាភិបាល ឆ្លើយបំភ្លើទៅគណកម្មការនានា របស់ស្ថាប័ន​នីតិបញ្ញត្តិ ឬរបស់តំណាងរាស្រ្តទេ។ មានតែនាយករដ្ឋមន្រ្តី និងរដ្ឋមន្រ្តីប៉ុណ្ណោះ ដែលទទួលបានសិទ្ធិឆ្លើយ​តប ទៅនឹងសំនួរបស់អ្នកតំណាងរាស្រ្ត។»

លោក តឹករ៉េត សំរេច ក៏បានហៅលោក ហូរ វ៉ាន់ ថាជាតំណាងរាស្រ្ត ដែលមិនបានយល់ដឹង ពីច្បាប់ដូចគ្នាដែរ។ លោកបានស្រង់សម្ដីលោកហូរ វ៉ាន់ តំណាងរាស្ត្រមណ្ឌលភ្នំពេញ មកពីគណបក្សសង្គ្រោះជាតិ ដែលបាន​ថ្លែង​ក្នុងសារព័ត៌មានភ្នំពេញប៉ុស្តិ៍ មកបញ្ជាក់ថា៖ «ការចេញបញ្ជានេះ ជាចេតនារិតត្បិតសិទ្ធិរបស់តំណាងរាស្រ្ត ក្នុង​ការស្នើព័ត៌មាននានា សំខាន់ ពាក់ព័ន្ធអំពើពុករលួយ និងការបិទបាំងព័ត៌មាន នឹងអ្នកតំណាងរាស្រ្ត គឺបំពាន​លើ​រដ្ឋធម្មនុញ្ញរបស់កម្ពុជា។»

ការលើកឡើងរបស់ លោក ហូរ វ៉ាន ត្រូវបានលោករដ្ឋលេខាធិការ តឹករ៉េត សំរេច វាយតម្លៃថា បានប្រាសចាក​ទាំងស្រុង ទៅនឹងសេចក្តីជូនដំណឹង របស់ទីស្តីការកណរដ្ឋមន្រ្តី។ លោកបានថ្លែងឡើងថា លោក ហូរ វ៉ាន់ មិន​បានអានច្បាប់ ស្តីពីការប្រឆាំងនឹងអំពើពុករលួយ ពិសេសមាត្រា២២។

រដ្ឋលេខារូបនេះបានលើឡើងថា សេចក្តីណែនាំរបស់ទីស្តីការកនរដ្ឋមន្រ្តីនោះ គ្រាន់តែជាសេចក្តីណែនាំ​បែប​រដ្ឋបាល របស់អង្គនីតិប្រតិបត្តប៉ុណ្ណោះ ដើម្បីឲ្យមានការជួប និងពិគ្រោះជាមួយថ្នាក់ដឹកនាំខ្លួនជាមុន មិន​នឹង​មានការឆ្លើយបំភ្លឺ ជាមួយនឹងគណកម្មការ នៃស្ថាប័នអង្គការនីតិបញ្ញត្តិ (រដ្ឋសភា) នោះ។ លោកបានបញ្ជាក់ថា៖ «ឯកឧត្តម ហូរ វ៉ាន់, ឯកឧត្ត សុន ឆៃ ក្នុងនាមតំណាងរាស្រ្ត ដែលមានសមត្ថកិច្ចធ្វើច្បាប់ មិនគួនិយាយអ្វីដែល​បំពាន ទៅលើខ្លឹមសារនៃច្បាប់ទេ។ ឯកឧត្តមទាំងពីរ គួមានការប្រុងប្រយ័ត្នជាងនេះ ក្នុងការនិយាយពីច្បាប់។»

ទស្សនាវដ្តីមនោរម្យ.អាំងហ្វូ មិនអាចសុំការប្រតិកម្មតប ពីលោក សុន ឆៃ និងលោក ហូរ វ៉ាន់ បានទេក្នុងថ្ងៃទី២២ ខែមិថុនា ឆ្នាំ២០១៥។ តែលោក អ៊ុំ សំអាន តំណាងរាស្រ្តមណ្ឌលសៀមរាប មកពីគណបក្សសង្គ្រោះ​ជាតិ​បាន​ចាត់​ទុកថា នោះជាការគម្រាមកំហែងមួយ ក្នុងការបិទសិទ្ធិសេរីភាព ដល់សមាជិករាជរដ្ឋាភិបាល។ លោកបាន​ថ្លែងប្រាប់ទស្សនាវដ្ដីថា ការលើកឡើងនេះ គឺជាការជម្រុញឲ្យការអនុវត្ត តាមរដ្ឋធម្មនុញ្ញមិនបានទូលំទូលាយ។ តំណាងរាស្ត្រ អ៊ុំ សំអាន បានរំលឹកថា កន្លងមក លោកនាយករដ្ឋមន្រ្តីធ្លាប់បានប្រកាស់ថា គ្រប់មន្រ្តីទាំងអស់ ត្រូវឡើងឆ្លើយបំភ្លឺ មុខគណកម្មការនៃរដ្ឋសភា ឬចំពោះមុខសភា មិនចាំបាច់សុំការអនុញ្ញាតជាមុន ពីលោក​ឡើយ៕