ប្រសិនបើក្រពើ ជាសត្វសាហាវ តែមនុស្សបានធ្វើ នូវអំពើសាហាវជាងសត្វក្រពើ រាប់សិបដង។ នៅក្នុងរដ្ឋ ល្វីសាន (Louisiane) សហរដ្ឋអាមេរិក ក្រុមអ្នកទេសចរណ៍ធម្មជាតិ បានទស្សនានូវឈុត​ឆាក​ដ៏​រន្ធត់មួយ នៅ​ពេលដែលពួកគេ ត្រូវបានដឹកតាមកាណូត ទៅក្នុងដំណើរកំសាន្ដ ឈ្មោះហៅថា «Pearl River Eco-Tours» នៅលើទន្លេ ភៀល ដែលសម្បូរទៅដោយសត្វព្រៃ ជាពិសេសសត្វក្រពើ។

ក្នុងពេលដែលហ្វូងជ្រូកព្រៃជាច្រើនក្បាល បានចូលមករកចំណី និងផឹកទឹកទន្លេនោះ នរណាក៏បានដឹងដែរថា នៅមិនឆ្ងាយពីទីនោះ មានសត្វក្រពើមួយក្បាល កំពុងតាមសង្កេតមើល ហ្វូងសត្វចតុបាតទាំងនេះ ដើម្បីរង់​ចាំ​មើលឱកាសមកដល់។ ប៉ុន្តែមិនចាំបាច់ឱកាស ដែលនឹងកើតឡើង ដោយឯកឯងនោះឡើយ ព្រោះមគ្គទេស​ទេសចរណ៍មួយរូប ដែលស្ថិតនៅលើកាណូត បានបោះនុយជាចំណីជាច្រើន ទៅឲ្យជ្រូកព្រៃមួយក្បាល ដើម្បី​ឲ្យសត្វតិរច្ឆានមួយក្បាល ពីក្នុងចំណោមនោះ តាមមករកស៊ីចំណី និងរំកិលខ្លួន ឲ្យមកកៀកជាមួយ​សត្វ​ក្រពើ។

បណ្ដាទេសចរណ៍ ដែលនៅលើកាណូត ដែលចង់មើលឈុតឆាកនេះ ពិតជាមិនខុសបំណងទេ ព្រោះសត្វ​ក្រពើ​បាន​បើកមាត់របស់វា ហើយស្ទុះទៅត្របាក់យកសត្វជ្រូកព្រៃ ដូចការគ្រោងទុករបស់​មគ្គុទេស​នោះ​មែន។ មាត់ក្រពើ ដែលបានត្របាក់អ្វីមួយហើយ វាមានកម្លាំងខ្លាំងណាស់ ហើយមិនងាយនឹងព្រលែង ឬ​បើក​វិញដោយស្រួលៗនោះឡើយ ហើយសត្វជ្រូកព្រៃ ដែលត្រូវបានក្រពើខាំយកនោះ ក៏ត្រូវបានសត្វ​ដ៏សាហាវ​មួយនេះ ទាញនាំចូលទៅក្នុងទីទឹកជ្រៅបាត់ដែរ។

វីដេអូនេះ ត្រូវបានបង្ហោះនៅលើអ៊ិនធើណែត ហើយបានបង្កឲ្យមានប្រតិកម្មមិនតិចទេ ពីបណ្ដាមហាជន​ទូទៅ និងជាពិសេសពីសំណាក់ អ្នកការពារស្រឡាញ់សត្វ។ ប៉ុន្តែករណីនេះ មិនមែនជាលើកទីមួយទេ ព្រោះកាល​ពី​សប្ដាហ៍មុន វីដេអូមួយទៀត ក៏ត្រូវបានគេបង្ហោះ ទៅលើអ៊ិនធើណែត មានលក្ខណៈស្រដៀងគ្នានេះដែរ។ នៅ​ក្នុង​អាងចិញ្ចឹមក្រពើមួយ ក្នុងក្រុង អ៊ីគីតូស (Iquitos) នៃប្រទេសប៉េរូ (ទ្វីបអាមេរិកខាងត្បូង) សត្វឆ្មារមួយ​ក្បាល ត្រូវបានគេបោះចូលទៅ ក្នុងចំណោមហ្វូងក្រពើ ក្រោមសម្លេងសើចក្អាកក្អាយ ពីអ្នកបានឃើញ​ឈុត​ឆាក​នេះ។

ហេតុការណ៍បោះសត្វឆ្មារ ចូលទៅក្នុងអាងក្រពើនេះ ត្រូវបានសារព័ត៌មានជាច្រើន នៅប្រទេសប៉េរូ ធ្វើ​របាយការណ៍​អង្កេត ដោយបានអះអាងថា ម្ចាស់អាងចិញ្ចឹមក្រពើ ទំនងជាត្រូវបានអាជ្ញាធរសង្ស័យ ពីបទ​យក​សត្វពាហនៈរបស់អ្នកស្រុក មកចិញ្ចឹមក្រពើរបស់ខ្លួន៕

» វីដេអូបោះឆ្មារ ចូលក្នុងអាងក្រពើ៖