អ្នកដែលនៅក្នុងហេតុការណ៍នេះ បានឲ្យដឹងថា ដំបូងជនរងគ្រោះ និងជនសង្ស័យ ជាអ្នកជិះម៉ូតូដូចគ្នា នៅ​លើ​ផ្លូវ សហព័ន្ធរុស្សី ស្រាប់តែមកដល់កន្លែងកើត ជនសង្ស័យបានជិះម៉ូតូមអៀប ជនរងគ្រោះហើយបាន​ឆក់​កាបូប ពីដៃស្រ្តីជាប្រពន្ធដែលនៅជិះ ពីខាងក្រោយ។

បន្ទាប់ពីធ្វើសកម្មភាពឆក់បានសម្រេច ជនរងគ្រោះបានស្រែក ឲ្យអ្នកនៅជិតនោះជួយ ខណៈដែលចោរ​មាន​គ្នា​ពីរនាក់ កំពុងបើកម៉ូតូរត់គេច យ៉ាងលឿន។ ពីទីតាំងកើតហេតុ ឆ្ពោះទៅលិចតាមបណ្តោយផ្លូវ សហព័ន្ធ​រុស្សី។ ភ្លាមៗមានអ្នកដេញ តាមម៉ូតូជនសង្ស័យពីក្រោយ រហូតដល់ភូមិជម្ពូវ័ន្ត ត្រង់ចំនុចក្រោយ ហាង​សាំង​មួយ ទើប​ចាប់​បានជនសង្ស័យ។

សាក្សីបានបន្តទៀតថា នៅពេលទៅដល់ទីតាំងនោះ គេចាប់បានតែជនសង្ស័យ តែម្នាក់ប៉ុណ្ណោះ រីឯម្នាក់ទៀត បានបើកម៉ូតូគេចខ្លូន បាត់ស្រមោល ខណៈដែលកំពុងតែរើកាបូបនោះ យករបស់ចេញ ហើយបម្រុងនឹងបោះ​កាបូបចោល។ ហេតុការណ៍ដេញតាម ក្រុមចោរមានគ្នាពីរនាក់ ចាប់បានម្នាក់នេះ បានកើតឡើង កាលពី​វេលា​ម៉ោង ១១ យប់ថ្ងៃទី១៧ ខែមិថុនា ឆ្នាំ២០១៥ នៅតាមបណ្តោយផ្លូវ សហព័ន្ធរុស្សី រហូតដល់សម្រេចចាប់​បាន នៅចំណុចខាងលើ ដែលស្ថិតក្នុងសង្កាត់ចោមចៅ ខណ្ឌពោសែនជ័យ រាជធានីភ្នំពេញ។

មន្រ្តីសមត្ថកិច្ចខណ្ឌពោរសែនជ័យ បានបញ្ជាក់ថា ជនសង្ស័យ ដែលក្រុមពលរដ្ឋ តាមប្រមាញ់ចាប់ខ្លូននោះ ឈ្មោះ ម៉ៅ វុទ្ធី អាយុ ៣៤ឆ្នាំ គ្មានមុខរបរពិតប្រាកដ រស់នៅភូមិជ្រោយ ឃុំវិហារហ្លូង ស្រុកសួង ខេត្តត្បួងឃ្មុំ។ បច្ចុប្បន្ន មកស្នាក់នៅជាមួយម្តាយ នៅសង្កាត់ជ្រោយចង្វារ ខណ្ឌជ្រោយចង្វារ រាជធនីភ្នំពេញ។ សមត្ថកិច្ច​បានបញ្ជូនខ្លួន ជនសង្ស័យខាងលើ ទៅកាន់អធិការដ្ឋាន ខណ្ឌពោសែនជ័យ ដើម្បីធ្វើសំនុំរឿង ទៅតាមផ្លូវ​ច្បាប់៕