ជាករណីរំជើបរំជួល រកសើចមិនត្រូវ (សម្រាប់អ្នកឃើញ) និងរកយំក៏មិនត្រូវ (សម្រាប់ម្ចាស់រូប) នៅលើបណ្ដាញ​សង្គមទ្វីសធើរ ក្នុងរយៈកាលប៉ុន្មានថ្ងៃចុងក្រោយនេះ នៅទ្វីបអ៊ឺរ៉ុបខាងលិច។ អ្នកសារព័ត៌មាន ល្បីឈ្មោះ​មួយ​រូប លោក អូឡាហ្វ៍ កូអេន (Olaf Koens) ជាតិហូឡង់  ដែលធ្វើជាអ្នកឆ្លើយឆ្លងព័ត៌មាន ឲ្យស្ថានីយ៍ទូរទស្សន៍ «RTL Nieuws» ប្រចាំនៅប្រទេសរ៉ូស្សី បានទម្លាយរូប«អាអូនតូច»របស់ខ្លួន ដោយចៃដន្យ តាមរយៈរូបថត​មួយ​សន្លឹក ដែលលោកបានដាក់បង្ហោះ តាមបណ្ដាញសង្គម។

នៅខណៈពេលដែលលោក ត្រូវចុះបេសកកម្ម ទៅកាន់តំបន់ស៊ីបេរី (Sibérie) អ្នកសារព័ត៌មានវ័យ ៣០ឆ្នាំ​យើង បានចែករំលែករូបភាព​មួយ​ចំនួន ពីសណ្ឋាគារ ដែលលោកបានទៅស្នាក់នៅ។ ប៉ុន្តែក្នុងរូបភាពទាងនោះ មាន​ទូរទស្សន៍មួយដែល​លោក​បានថត ហើយមិនបានចាប់អារម្មណ៍ ពីរូបចំណាំងផ្លាតចេញពីអេក្រង់​ទូរទស្សន៍​នោះ ដែល​បង្ហាញគេឯង ថា​លោក បានស្រាត«ននលគោក»ទាំងស្រុង នៅពេលលោកថតរូប។

បន្ទាប់ពីបានបញ្ជាក់ថា លោកពិតជាទើបនឹងចេញ ពីបន្ទប់ទឹក នៅមុនពេលថតរូបនោះ លោក កូអេន បានលប់​រូបថតដ៏ញាប់ញ័រនេះ ចោលចេញពីទំព័រទ្វីសធើរ របស់លោកភ្លាម។ ប៉ុន្តែវាហួសពេលហើយ ព្រោះរឿង​អពមង្គល បានកើតរួចជាស្រេច នៅលើបណ្ដាញសង្គម ដែលមានមនុស្សរាប់លាននាក់ អង្គុយសំកុកនៅពីមុខ ជារៀង​រាល់​វិនាទី។​ អ្នកប្រើប្រាស់បណ្ដាញសង្គមដទៃទៀត បានថតផ្តិតពីអេក្រង់ (PrintScreen) ពីលើ​រូបភាព​របស់​លោក ហើយបានចែករំលែកគ្នាព្រោងព្រាត។សារព័ត៌មានក៏មិនបានបង្អង់នៅស្ងៀមដែរ ដោយបាន​យក​រឿង​នេះ មកបន្ទរធ្វើជាអត្ថបទ បង្កការសើចក្អាកក្អាយថែមទៀត។

ករណីនេះ បានធ្វើឲ្យលោក កូអេន ឆេះដុំឡើង។ អ្នកសារព័ត៌មានល្បីរូបនេះ បានសរសេរជាយោបល់ នៅលើ​ទំព័រទ្វីសធើររបស់លោកថា៖ «សុទ្ធតែពួកចង្រៃ ដែលយក"ប្រដាប់ភេទ"របស់ខ្ញុំ មកធ្វើជាបច្ចុប្បន្នភាព។ ខ្ញុំគិត​ថា នឹងនៅ ស៊ីប៊េរី បានយូរបន្តិចទៀត។ (...) ឥឡូវនេះ នាំគ្នាទៅប្រកាចឲ្យអស់ទៅ!»

លើកក្រោយ សុំឲ្យប្រយ័ត្ន ចំពោះរាល់ការចុះផ្សាយ រូបថតណាក៏ដោយ នៅលើបណ្ដាញសង្គម៕