រូបថតមួយសន្លឹកនេះ បានរត់ចេញពីគណីមួយ ទៅកាន់គណនីមួយទៀត ដោយសារការចែករំលែក ពាស​ពេញ​បណ្ដាញសង្គម ដែលបានបង្ហាញឲ្យអ្នកផង ឃើញ«ជីងចក់»មួយក្បាល កំពុងអើតក្បាល ពីចេញពី​ប្រអប់​ម្ហូប​ចំណី ដែលដាក់សម្រាប់ភ្ញៀវបរិភោគ នៅលើយន្ដហោះ «Air India»។ នេះជាជើងហោះហើរមួយ ដែលដឹកអ្នក​ដំណើរ ហោះចេញពីរដ្ឋធានី ញ៉ូដេលី ប្រទេស​ឥណ្ឌា ឆ្ពោះទៅកាន់រាជធានីឡុងដ៍ ចក្រភពអង់គ្លេស កាលពីថ្ងៃ​ព្រហស្បត្តិ៍​សប្ដាហ៍មុន។

កាលពីថ្ងៃសៅរ៍ អ្នកនាំពាក្យឲ្យក្រុមហ៊ុនអាកាសចរណ៍ «Air India» លោក ប្រាវីន បាណាហ្គារ (Praveen Bhatnagar) បានថ្លែងទទួលស្គាល់ ថាមាន«ជីងចក់» នៅក្នុងចានម្ហូប។ ប៉ុន្តែអ្នកនាំពាក្យ បានបដិសេធ ពីភាព​ខ្ជីខ្ជាគ្មានអនាម័យ របស់ក្រុមហ៊ុនរបស់ខ្លួន។ អ្នកនាំពាក្យបានថ្លែងឡើងថា៖ «យើងនឹងដឹកនាំការស៊ើប​អង្កេត​មួយ ដើម្បីឲ្យដឹងថា ជីងចក់បានមកនៅ ក្នុងចានម្ហូបនេះយ៉ាងដូចម្ដេច  ពីសំណាក់ក្រុមហ៊ុនដៃគូរ ខាង​ចំអិន​ម្ហូប រួមនឹង​ផ្នែកសេវា​កម្មនេះ ​របស់យើងផង»។

ប៉ុន្តែនៅប៉ុន្មានម៉ោងក្រោយមក ក្រុមហ៊ុនអាកាសចរណ៍ បានវាយតម្លៃពីព័ត៌មាន ដែលនិយាយពីវត្តមាន របស់​ជីងចក់ ថា«មិនពិត និងគ្មានមូលដ្ឋាន»។ អ្នកនាំពាក្យឲ្យក្រុមហ៊ុនម្នាក់ទៀត ដែលមិនប្រាប់ពីអត្តសញ្ញាណ បាន​ថ្លែងឡើងថា៖ «យើងច្រានចោល ពីករណីដ៏ហួសហេតុនេះ។ ទីមួយ ព្រោះយើងមិនដឹងថា តើរូបថតនេះ ពិតឬ​មិន​ពិត។ និងទីពីរ ព្រោះថាគ្មានអ្នកដំណើរណាម្នាក់ បានដាក់ពាក្យប្ដឹង ឬតវ៉ាមកក្រុមហ៊ុន»។

ក្រុមហ៊ុនដឹកជញ្ជូនជាតិ តាមផ្លូវអាកាស របស់ប្រទេសអាស៊ីខាងត្បូងមួយនេះ មិនសូវជាជួបនឹងរឿងល្អៗ ប៉ុន្មាន​ទេ ក្នុងរយៈពេល ប៉ុន្មានឆ្នាំចុងក្រោយនេះ។ តាំងពីឆ្នាំ២០០៧មក ក្រុមហ៊ុនមិនមានប្រាក់ចំណេញ ពី​ការ​ធ្វើ​អាជីវកម្ម​របស់ខ្លួនឡើយ។ ហើយក្នុងពេលថ្មីៗនេះ យន្ដហោះរបស់ក្រុមហ៊ុន បានជួបនឹងបញ្ហា​បច្ចេកទេស ជា​បន្តបន្ទាប់ ត្រូវការដំណោះស្រាយ សឹងជាប់ជាប្រចាំ ហើយនៅមានបញ្ហា បណ្ដាលមកពីបុគ្គលិក នោះផង​ទៀត។

កាលពីខែមេសាកន្លងទៅ យន្ដហោះភ្ជាប់ជើងហោះហើរក្នុងស្រុកមួយ របស់ក្រុមហ៊ុន «Air India» នេះ បាន​បង្កឲ្យមាន ការភ្ញាក់ផ្អើលយ៉ាងខ្លាំង ដោយសារជម្លោះទាស់ទែងគ្នា រវាងអ្នកបើកបរយន្ដហោះពីរនាក់ (មេបញ្ជាការ និងជំនួយការ) នៅមុនយន្ដហោះកម្រើកខ្លួនពីព្រលាន។ ហេតុការណ៍ ដែលធ្វើឲ្យអ្នកទាំងពីរ ត្រូវ​បាន​ហាម​ឃាត់ លែងឲ្យកាន់ចង្កូតយន្ដហោះតទៅទៀត។ សូមអានអត្ថបទនេះឡើងវិញ ដោយចុចនៅលើ​ទី​នេះ៕

» រូបថតពេញ៖