តើ​សម័យ​ណា ដែល​កាប់​បំផ្លាញ​ព្រៃឈើ​ច្រើន​ជាង​គេ?

តើរបបគ្រប់គ្រងកម្ពុជាណាមួយ មានការបំផ្លិចបំផ្លាញ ធនធានធម្មជាតិ ខ្លាំងក្លាជាងគេ? គេចាំបាច់ ត្រូវ​ធ្វើ​កំណត់​ត្រា​មួយ ដើម្បីកត់ត្រា និងចារជាប្រវត្តិសាស្រ្ត ពីសម័យកាលនៃបុគ្គលដែលដឹកនាំ និងគ្រប់គ្រងប្រទេសកម្ពុជា ពី​សំបូរ​ព្រៃឈើ​បំផុត ធ្លាក់​មក​រក​ភាព​ហិនហោច​បំផុត។
Loading...
  • ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) -ភ្នំពេញថ្ងៃទី១០ មិថុនា ២០១៥
  • កែប្រែចុងក្រោយ: June 12, 2015
  • ប្រធានបទ: ព្រៃឈើ
  • អត្ថបទ: មានបញ្ហា?
  • មតិ-យោបល់

ហេតុអ្វីព្រៃឈើ ចេះតែហិនហោច? ដោយសារអ្វី? ក្នុងសម័យកាលណាខ្លះ? ការកាប់បំផ្លាញព្រៃឈើ ដែល​អាច​ធ្វើទៅបាន មិនមែនអ្នកល្ងង់ឡើយ ហើយក៏មិនមែនជាក្មេងដែរ។ នេះ ជាការថ្លែងលើកឡើង ជាសំនួររបស់​លោក ប៉ុល ហំម តំណាងរាស្រ្ត មកពីគណបក្សប្រឆាំង និងជាប្រធានគណកម្មការទី៣ នៃរដ្ឋសភា ក្នុងទិវាបរិដ្ឋាន​កាល​ពីពេលថ្មីៗ​នេះ។ លោក បានថ្លែងរបៀបកំប្លែងថា៖ «អ្នកបំផ្លាញបរិស្ថាន មិនមែនកើត ពីអ្នកដែលអត់ចេះទេ ហើយ​ក៏មិន​មែន​ក្មេងៗយុវជនទេ គឺសុទ្ធតែពួកអត់សក់ ប៉ុន្តែអ្នកអត់សក់ដូចខ្ញុំ មិនដែលបំផ្លាញទេ»។

លោក ប៉ុល ហំម បានពន្យល់ទៀតថា ក្នុងទង្វើដែលខុសឆ្គង នៃការកាប់បំផ្លាញ ឬការគ្រប់គ្រងប្រទេស ដែល​បណ្តែតបណ្តោយ ឲ្យមានការបំផ្លាញព្រៃឈើ យ៉ាងរង្គៀលនោះ សម្រាប់យុត្តិធម៌ ឬមិនយុត្តិធម៌ នឹងត្រូវបាន​ប្រវត្តិ​សាស្រ្តចារទុក។ លោកថា ប្រវត្តិសាស្ត្រនឹងផ្តល់ការកត់ត្រា ទៅឲ្យមេដឹកនាំប្រទេសនោះថា៖ «សម័យ​អ្នក​ណា ដែលកាន់អំណាច ហើយកាប់បំផ្លាញព្រៃឈើ គឺអ្នកហ្នឹងហើយ»។

ការលើកឡើងដូច្នេះ របស់លោក ប៉ុល ហំម ធ្វើឲ្យមតិសារធារណៈ មួយចំនួនយល់ថា មានតែសម័យកាន់​អំណាច ដោយលោកនាយករដ្ឋមន្រ្តី ហ៊ុន សែន ទេ ដែលបានបណ្ដែតបណ្តោយ ឲ្យមានការកាប់បំផ្លាញ​ព្រៃឈើ ច្រើនជាងគេ។ ហើយលោក ហ៊ុន សែន ខ្លួនឯងផ្ទាល់ធ្លាប់បាននិយាយថា បើសិនជាលោកមិនអាចទប់​ស្កាត់ ការ​បំផ្លាញ​ព្រៃឈើបានទេ លោកសុខចិត្តកាត់ ក លោកចោល។

លោក ប៉ុល ហំម បានស្នើដល់អ្នកដឹកនាំ ត្រូវធ្វើការតាំងចិត្ត បញ្ឈប់អ្នកដែលមានបំណង កាប់បំផ្លាញព្រៃឈើ។ លោកបានថ្លែងឲ្យដឹងទៀតថា ក្នុងកិច្ចពិភាក្សា ជាមួយរដ្ឋមន្ត្រីក្រសួងបរិស្ថាន និងកសិកម្ម កន្លងមក លោកស្នើ និងគាំទ្រទៅជនបរទេស និងទេសចរណាម្នាក់ ដែលមានបំណងដាំដើមឈើ។ លោកថាត្រូវធ្វើការបណ្តុះកុមារ ដើម្បីចូលរួម ក្នុងការងារការពារព្រៃឈើ និងដាំឈើ ធ្វើឲ្យបរិស្ថាននៅកម្ពុជា មានភាពប្រសើរឡើងវិញ។

លោក អ៊ុក រាប៊ុន រដ្ឋមន្ត្រីកសិកម្ម រុក្ខាប្រមាញ់ និងនេសាទ ធ្លាប់បានថ្លែងប្រាប់អ្នកសារព័ត៌មាន ក្រោយពីចូលបំភ្លឺ នៅមុខគណៈកម្មការទី៣ នៃរដ្ឋសភា នាវិមានរដ្ឋសភា កាលពីថ្ងៃទី២៨ ខែវិច្ឆិកា ឆ្នាំ២០១៤កន្លងមកថា យោង​តាម​ការថត ដោយប្រព័ន្ធផ្កាយរណប ព្រៃឈើបច្ចុប្បន្ន នៅប្រទេសកម្ពុជា នៅសល់ប្រហែលជាង៦០ភាគរយ នៃ​ផ្ទៃដី​សរុប។

តែបើតាមរបាយការណ៍រូបភាព ផ្កាយរណប ដែលចេញកាលពីខែធ្នូ ឆ្នាំ ២០១៣ ផែនទីដែលមានលក្ខណៈ​ចលនា គេហទំព័រ Open Development Cambodia (ODC) បានបង្កើតពីរូបភាពផ្កាយរណប ណាស្សា (NASA) បាន​បង្ហាញ​លម្អិត អំពីការបំផ្លាញខ្លាំងក្លា ទៅលើព្រៃឈើរបស់ប្រទេសកម្ពុជា ដែលជាការបំផ្លាញ ដែល​​បាន​កើន​ឡើង​យ៉ាងខ្លាំង ​ក្នុងរយៈកាល៥ឆ្នាំចុងក្រោយនេះ។ គេហទំព័រ ODC បានឲ្យដឹងថា ការវិភាគ​រូបភាព​​ផ្កាយ​​រណប​បង្ហាញថា ក្នុងឆ្នាំ​១៩៧៣ ប្រហែល ៧២.១១ភាគរយនៃប្រទេសកម្ពុជា ត្រូវបានគ្រប់​ដណ្តប់​​​ដោយ​​ព្រៃឈើ។ រូបភាព​ថ្មីៗបានបង្ហាញថា គម្របព្រៃឈើបច្ចុប្បន្នមានតិចទៅៗគឺចំនួន ៤៦,៣៣ ភាគរយ ដោយ​រួម​បញ្ចូល​ទាំង​ចម្ការ​កៅស៊ូ៕

» ដើម្បីដឹងថា តើសម័យណា ដែលមានការកាប់បំផ្លាញព្រៃឈើ ច្រើនជាងគេ សូមទស្សនាការវិវត្តន៍ នៃផ្ទៃ​ក្រឡា​ព្រៃឈើនៅកម្ពុជា ដែលចេះតែហិនហោចទៅៗ របស់គហទំព័រ ODC ដូចខាងក្រោម៖

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...